2014年4月日本中部立山雪之大谷又玩完啦~~

話咁快呢個期待已久嘅立山黑部之旅又玩完返嚟啦!!.....立山黑部雪之大谷，每年只係四月中至六月先開放，雖然嚮往左好耐，但總係湊唔啱時候，舊年去完北海道終於的起心肝落實今年四月尾點都要去一次......話就話係去立山黑部，但嚴格嚟講我地只係去左一半，因為我地去嗰段時間黑部峽谷未通晒車，幾經考慮最後我地都係決定唔去黑部，所以呢個 trip 實際只可以叫上半 part 立山而無黑部~

兩隻 bear bears 先同大家打個招呼.....嚟一張靚靚嘅室堂雪山景

同往常一樣，唔知點解每次最期待嘅景點總係遇啱唔好天氣，好似上幾次去睇嗚門漩渦啦、知床五湖啦、even 法國嘅 Mt. St. Michel 等等都係令人好沮喪嘅壞天氣，晦運真係數之不盡!!....今次上立山嗰朝簡直係落狗屎，幾驚會因為天氣惡劣而封山唔俾上，好在上到去室堂d 雨細返好多，雖然無藍天白雲，陰雨天影出嚟嘅相灰濛濛實在唔夠靚，但終於可以置身兩面厚厚雪牆之內，都玩得好開心啦~~

最高點只係去到 15m，我見人地嗰 d 去到 17、18m 噃......唔知係咪因為未算好高所以個感覺無預期中咁震撼，而且實在太多遊人太多團體客，除左香港人，仲有好多唔知係強國定台灣人，大家都知華人聲浪嘅威力，有時真係好嘈

除左雪牆，近立山自然保護中心嗰邊仲有一個雪之回廊，係一個小型版雪牆.....同雪牆有 d 唔同，呢度連個地下都係鋪滿晒雪，感覺真係一天一地都係白雪雪!!

呢度無咁多人，可以影好多造型照

上立山窒堂睇雪牆係今個 trip 嘅重點項目，所以我地特意響室堂 stay 左一晚，諗住唔駛咁急可以慢慢 hea 住玩 (當然，亦係同往常一樣，最終我地都硬係要趕頭趕命).....據講，室堂係日本距離星星最近嘅地方，夜晚可以毫無難度近距離欣賞滿天繁星，可惜我地去呢一日天氣實在太差，夜晚 d 雲厚到好似隨時要跌落嚟咁，所以原本我仲一心諗住可以見到 Du Min Chun Star 最後都係失望而回....

睇唔到星星，但 stay 室堂一晚仍然係好值得嘅，近黃昏時我地浸完個秘湯仲可以好悠閒咁響旅館附近周圍逛逛，四周都俾白雪完全覆蓋，無晒d 遊人嘅嘈雜聲，景色同氣氛真係超正呀!!

響室堂我地住宿嘅旅館係みくりが池温泉.......由室堂車站行去大約20多分鐘，但揹住背包行雪地仲要上上落落 d 斜坡，我真係行到好似一隻狗咁.....幾經辛苦行到呢個位置見到旅館嘅全貌嗰種開心嘅心情真係好難用言語去形容

好耐未住過咁細嘅和室，一眼見晒，無 TV 無 toilet 無凳無床，連夜晚瞓教嘅被鋪都要自己動手搞掂.....唔緊要，我地呢 d 港嬸好能屈能伸，住宿幾豪又得、幾唔豪亦無相干.......

推開房間嘅窗就見到咁靚嘅雪山景，一生人可以有幾次咁嘅機會呢? 幾簡單嘅部屋都無所謂啦~~

而且呢間旅館係入選日本秘湯守護會......響海拔 2410m 高嘅雪山上浸秘湯真係超正呀， d 泉水係源泉 100% 放流，無加水無加溫，浸完之後成身超滑，好掂呀

響立山第一日嘅天氣好差，不過第二朝早起身望出窗外竟然見到陽光，好開心呀!!!

雖然有好多雲但已經好滿足，陽光下 d 雪都靚 d 嫁~~

所以我地決定健行.....由旅館出發，圍繞みくりが池而行，經過室堂山莊再返去室堂車站......

有過舊年北海道攀黑岳嘅恐怖極度沮喪經驗，今次我嘅裝備好少少，揹背囊同著左對行山鞋，不過同其他健行人士相比仍然差好遠，沿途見其他人都揸行山杖同踩大腳八，行起上嚟真係輕鬆好多......

唔係講笑，雪山健行係行呢 d 山嫁!! 有無 d 好似攀緊珠穆朗瑪峰嘅 feel 呢

 雖然行到好辛苦，但我真係覺得自己都幾叻囉，今次無 PK 呀!! 俾 5 個自己

沿途嘅美景

最初行時都算幾好天有 d 陽光，但行左無耐就開始變天，一個唔覺意d厚厚嘅雲就已經趕走晒個藍天.....

視野模糊，之後仲落埋雪.......but 四月尾竟然見到落雪，好開心呀!!

途中仲見到傳說中嘅雷鳥呀!! 好 lucky 呀!! 據講唔係咁易見到嫁!!

總括而言，響室堂嘅經歷真係好開心好難忘，如果行程唔太趕，強烈建議大家一定要 stay 一晚，慢慢細意去感受寧靜、零污染嘅白色世界

今個 trip 除左上雪山玩得好興奮，另外亦有意料之外嘅驚喜，就係見到櫻花呀!

四月尾原來飛驒高山一帶 d 櫻花仲未完全凋謝，雖然已經滿開到好盡，但可以有機會見到都好開心~~

宮川沿岸一帶 d 櫻花跟紫 bear 好襯呀

上次去中部唔夠時間無去下呂溫泉，今次去返.....當然要去睇下合掌屋......

呢個下呂溫泉合掌村唔係好大，環境都唔錯，不過比白川鄉仲要商業化多d.....我同老爺最喜歡嘅合掌村始終都係五箇山合掌造，仲記得尤如一個童話世界呢

去飛驒地區當然要回味一下朴葉味噌飛驒牛.....yummy yummy~~

聞名已久嘅溫泉街噴泉池，果然有人唔怕俾途人望響度泡湯，不過全部都係大叔伯伯，而且著左底底

條溫泉街其實好短，而且無咩買，不過景色都唔錯，可惜又係陰雨天，唉

下呂溫泉係日本三大名泉之一，d 酒店真係好貴，不過泉水果然名不虛傳，浸完 d 皮膚真係滑溜到完全唔需要搽 lotion，好正呀!!

去開立山今次順道響魚津住左一晚.......魚津靠海，d 魚生真係好新鮮，而且一d 都唔貴，我呢個滿滿魚生片嘅海鮮丼 set 都只係1050円咋!!! 真係食得好滿足.....不過若論海膽則仍然唔及北海道鮮甜啦~

響漁津我地入住金太郎溫泉旅館，房間有個小陽台，對正連綿嘅雪山，正!

Book 呢間旅館之前響網頁見佢標榜佢嘅近300坪壁畫大浴殿，不過親身所見實在無乜特別，最特別應該係無人浸，我同老爺都係各自包場，咁鬼 free 早知唔需要住私家風呂房啦.....d 住客基本上擠晒去佢另一個超大型溫泉館，嗰度真係超多溫泉設施，我第一次見有步行湯，而且佢講明泉水係源泉，不過浸完個人認為都係唔及下呂......呢間旅館 d 硬件確實唔錯，但 service 就真係一般，我地大大話話都叫做住過廿多三十間日本溫泉酒店，貴嘅平嘅都試過，從未遇過一間酒店嘅接待係咁差，對酒店同客房嘅 presentation 係零!....咁都算，以前都偶有遇到，但求其到連朝、夕食嘅時間地點都無同我地講就趕住閃人我都真係第一次見

Service 十分唔掂，但個夕食倒係喜出望外，每一款都好精緻，總算為酒店挽回唔少分數啦~

同樣都係大型溫泉旅館，加賀山中溫泉嘅翠明就令人滿意好多，最 like 佢地搵上左年紀經驗豐富嘅日本傳統女士做接待，感覺真係 warm 好多.......房間都好正，私家風呂對正鶴仙溪.......

一邊浸浴一邊欣賞美景，好爽呀!!

山中溫泉最出名嘅景點要算係鶴仙溪，雖然我地去逛時已經四點多，陰天無咩陽光，但景色仍然相當唔錯~

今次個 trip 除左主打立山雪牆，仲有就係去返上次 2010年中部北陸之旅無去嘅地方，上次因為要去最北嘅能登珠州所以無時間去南面嘅三重縣，今次一開始就堅決要去返......日本三大神宮之一嘅伊勢神宮係無論如何點都應該要去一次? 地方好大，不過其實無咩好行，或者我地唔係日本人對神宮無乜特別感覺，叫做到此一遊啦~

反而呢個夫婦岩仲比較過癮，雖然都係兩舊石加一條繩就成一個景點，但起個夫婦岩嘅名旁邊又整個神社，個感覺就有趣得多

另外又去左 Mikimoto 珍珠島，珍珠就無錢買，睇左海女採珠表演，都幾得意~

響鳥羽我地入住嘅 Altia Toba 其實算係一個 resort，酒店設施普通，但房間可以眺望無敵大海景，正到無朋友.....

晚餐係超級期待嘅伊勢海老.......

鮑魚.....

仲有仲有松阪牛

飲飽食醉，第二朝早較啱時間睇日出......

如果日日係咁樣生活狀態你話幾寫意呢

行程簡介完畢，又到左最令人雀躍嘅戰利品篇，heehee~

(...待續)