PIGGYBREAD: 2014年9月瑞士塵世美11日

Day 1 (14 September 2014)
HK ~ Zurich ~ Rheinfall ~ Schaffhausen ~ Luzern

離開萊茵瀑布，我地搭 14:07 開嘅 S33，14:14 就到左 Schaffhausen 沙夫豪森~

原以為呢個係一個細站，點知都好有規模，同剛才 Rheinfall 小站爭好遠~

但近車站都水靜河飛，無人嘅??

巴士站亦都無乜人等車.....其實歐洲 d 人星期日去晒邊??

去歐洲好鍾意去小鎮逛逛，好多建築物都好有歷史......下面呢座野咁高個設計咁特別當然有名堂，叫上門塔 (Obertorturm)，係呢個小鎮最古老嘅防禦建築~

沙夫豪森係一個古城，觀光景點都好集中，由火車站行到去最遠嘅 Munot 米諾要塞都只係大約二十分鐘，所以我地決定以步行方式慢慢逛~

呢度最出名係建築物嘅 bay window......

家家戶戶嘅 bay window 都各有特色.....

有 d 色彩鮮艷......

有 d 就有精緻嘅雕刻~

好快去到 Fronwagplatz.....

去過瑞士就會發覺成日都見到好多噴泉，噴泉中央往往都豎立一個歷史人物嘅石像.....不過如果論數量，伯恩就真係超多，過幾日我地就會去~

每一個石像都有歷史名堂吧，不過我地都無去深究，只係隨意拍拍照~~

廣場有出名嘅 Fronwagturm 塔......

據講塔上嘅天文鐘能夠顯示十種唔同嘅訊息，好似時間、星期幾、月升月落、季節等等......好厲害! 不過對於我呢 d 科技白痴來講，講真連而家係幾多點都唔係十分睇得出囉

我都係影下旁邊 d 靚靚建築物算把啦~~

去歐洲，我最愛漫步於充滿藝術氣息嘅老街，好寫意~

行下行下就去到「騎士之館」，當地其中一個最著名嘅景點，出名原因係佢外牆嘅濕壁畫......

呢個濕壁畫已經係 1570 年所繪畫，不過我地而家睇到嘅係 1943年重新所修復~

所繪畫嘅都係希臘神話同羅馬歷史故事~

真係好精緻，而且色彩豐富，到此一遊最宜拍照

響騎士之館再過 d 就係 Kirche St. Johann 聖約翰教堂.....

呢間教堂始建於1000年，歌德式建築風格，內部裝潢唔算華麗，但覺環境莊嚴而清雅......

好喜歡睇呢 d 彩繪玻璃~

無論有無宗教信仰，只要身處教堂，都總能夠感受到一種詳和同寧靜~

響教堂坐左一陣就繼續向前逛，好快又去到另一個廣場，又有另一個噴泉~

可愛嘅招牌，一睇就知係咩店鋪~~

Munster 大教堂

旁邊有個博物館，不過要 CHF12 入場費，所以我地無入去

又見觀光小火車~

逛下逛下忽然見到路邊有個細細嘅指示，指住呢條樓梯係通往 Munot 米諾要塞......呢條樓梯真係好唔起眼，一個唔為意就真係會 miss 左~

要上城堡，要行一條長長嘅石梯......

階梯兩邊係葡萄園，右邊係黑葡萄......

而左邊就種左紅葡萄~

邊行邊影下相都唔會太累.......

不過忽然發現原來有好多蚊蟲，好得人驚

，嚇到我都唔敢再停留，直衝上去頂~~

終於爬到上去.....竟然有種大地在我腳下嘅感覺

城堡係免費入場，不過有限時間~

一入去好暗呢，而且陰陰寒寒，講真，如果要我自己喺度，真係會有 d 驚

呢度無照明，只靠幾個大天井引入光線.....

個設計都幾獨特~

要上塔頂就要行螺旋形階梯，不過都只係斜坡道，唔算太辛苦~

之前響網上搵料時見 d 人話呢度會見到梅花鹿......都無嘅??

原來 d 小鹿斑比走左去遠遠樹蔭下 hea.....真識嘆~~

小小一個窗口都已經窺見外面嘅天地風光明媚!

塔頂係個圓形廣場，好開揚~

呢座城堡建於十六世紀，其實唔算好宏偉，不過到沙夫豪森嘅遊客應該都會到此一遊，最主要係因為響塔頂可以 270 度欣賞古城優美嘅風光......

剛才到過嘅兩座教堂，右邊係聖約翰教堂，左邊係大教堂~

風景真係好美!!

仲見到萊茵河呢~

最正係呢度有免費 toilet

呢座應該係瞭望塔吧?

d 水可以飲用~

剛巧呢一日有劍擊比賽......

睇左一陣就離開啦~

沿住來時嘅路離開......

再見啦，美麗嘅沙夫豪森~~

行到呢度老爺掛住影地上嘅白鴿，我百無聊賴，有班男仔用普通話不斷撩我傾計.....真係，人生得可愛，特別招搖

好可愛嘅 bear bear~

回程無點停留，好快返到去車站.......

終於今日第一次見到有間便利店，當然入去巡個圈......

呢度 d 價錢比較買得落手，入返小小貨

Check 下車站個列車班次先~

16:14 有班車直接去到機場，中途唔駛轉車~

行到攰一攰，食下野先~

又經過萊茵河......

望多次個瀑布~~

回程比朝早來時天氣好好多，藍天下嘅田園草地更加勁美瑛 feel 呢~

好多牛羊啊

17:00 就返到去機場......

Check 下去琉森嘅班次，17:13 有一班車，但要響 Zurich HB 轉車，18:25 到琉森，而再下一班 17:47 開嘅車就唔駛轉車直接到琉森，抵達時間 18:49，都只係遲 25 分鐘，但就唔需要轉車，所以我地決定搭 17:47 嗰班......

仲有半個鐘時間又可以響機場車站逛下~

逛到差不多就去 locker 攞返今朝寄存嘅行李去等車啦~

由機場去琉森呢程車好多人搭，好在我地早去月台早上車，眼見好快已經無座位，而且呢架車無位置放行李，我地唯有將個行李箱放響腳前，又驚頂住對面座嘅人，坐得好唔自在

18:49 去到琉森，我地呢兩晚住嘅酒店係 Ameron Hotel Flora，由車站行去只需約五分鐘~

呢間酒店係四星，響 tripadvisor 琉森六十多間酒店中係排名二十頭，住客 d comments 都唔錯，我地連泊兩晚，貪平 d 所以做 booking 時揀左 non-refundable plan，兩晚共 CHF450，當時係兌約 8.7，成二千蚊一晚，未去之前都有 d 期望......

做 booking 時已經俾晒錢，好快搞掂 check in~

Reception counter 旁邊有個細細嘅 shop，不過信我啦，你係唔會有興趣買

搞掂晒就上房.....

房間 size ok，同一向住開日本嗰 d 商務酒店相比已經闊落好多.......

一般商務酒店格局~

Washroom 都算乾淨企理......

歐洲酒店預左無乜 sanitary pack，但只 provide 一枝 lotion 似乎有 d 離譜......雙人房喎

無 mini bar，亦無 free 蒸餾水供應，得兩隻玻璃杯，仲要係唔同款，每款得一隻

......雙人房喎.....

窗外亦無 view.....ok ok, 呢 d 都唔緊要......

BUT 做 booking 時 room information quoted 嘅 slippers 同 coffee/tea maker 呢?? 我搵匀成間房都無

.......原來 slippers 係 on request，要自己走去 reception 問，仲要唔係即刻有得攞，講低房號過幾個字之後先落嚟攞唔該......Mini bar 仲搞野，大家唔好用字面或一向嘅概念去解讀呢個詞，呢間酒店所謂嘅 mini bar，係指響 reception counter 有一個小賣部，客人可以響度買......至於 coffee maker 到左呢一刻我地其實都唔特別期望所以都唔打算追問，只係問有無 kettle.......嗯...佢竟然答話酒店餐廳近門口有熱水機，24小時 open 可以自己落嚟攞熱水......吓?! 我有無聽錯? 以為自己住緊賓館

......講真，我對呢間酒店真係好失望，d staff 嘅面口亦唔係好，真正軟硬件都唔掂

四星?? Kidding!! 一 d 都唔值!!

響酒店 hea 左一陣我地就出去逛逛.......呢間酒店雖然比預期差，但佢嘅地理位置就真係好正，由酒店行出去湖邊都只係一分鐘，路口一出就已經見到琉森湖.......

最出名嘅卡貝爾橋響黃昏下顯得好寧靜~

不過開始天黑影出嚟嘅相片好暗，所以我地都只係響湖邊影左幾張相就算~

原本我地打算行過去對岸舊區食晚餐，心目中想去近獅子紀念碑嘅 Old Swiss House，之前上網搵料見 d 人話個龍蝦湯同 chocolate mousse 好正，不過時差再加上前一晚響機上瞓得幾個鐘，今日又玩左成日，去到呢一刻真係好鬼攰，所以我地就決定去超市買野返酒店食~

瑞士有兩大超市，Coop 及 Migros，絕對係自由行人士嘅恩物，入面 d 野較平同埋種類較多，好似蒸餾水，朝早響萊茵瀑布買嗰枝 750 ml 要 CHF6，但響 Coop 一枝 1.5L Evian 只係需要 CHF0.95 咋!! 所以今次呢個 trip 我地幾乎日日都走去超市掃下貨.......