上星期六閒來無事，我地走左去沙田科學園逛，雖然剛剛掛左三號風球，但個天仲有d陽光.....科學園成個範圍都幾大，d建築物大部份都係玻璃幕牆，望落去好現代化，周圍都有綠色植物，人少幾清靜，個感覺幾舒服~
我地先去醫肚，搵左間酒樓叫囍慶，兩條友無無聊聊去飲茶~
叫左幾個點心.....叉燒腸
濃湯山珍菌泡牛肉球，味道一般啦~
脆米芋茸酥，普普通通~
蝦餃皇，睇點心紙時見係$10，以為咁平，黎到發覺原來係$10一粒....
呢堆野嘅賣相真係.....
其實係長方形嘅珍珠雞
古法干牛河，老爺話一間酒樓睇佢地嘅牛河做得好唔好就知呢間食店d野食有無水準....結果係我地剩左半碟無食.....
脆麻花，已經飽都仲係要點，老爺鍾意食，無計，因為似佢，蛋散一名~~
我地揀左"露天"位，呢道d野食一般，不過環境就幾舒服~
可以睇到玻璃屋頂
酒樓響二樓，望落去係一片樹海....
其實係一樓嘅長廊種左兩排樹.....如果唔鍾意飲茶，一樓其實仲有一個food court，同其他食店，都算幾多選擇~
食完野都三點幾，見外面無落雨，個天氣仲ok，就出去四周逛下......
以集團連鎖食店黎講，其實我地都幾鍾意和民，價錢OK，食物選擇大眾化，D野普遍幾好食，而且樣樣菜色都有一D，總會揀到合自己口味，分店又多，只要係大型商場就會有，shopping完都真係總有一間響你左近，不過通常就好多人等候....
尋晚老爺響新界開完會費事返公司，見佢竟然可以早放工
，咁啱我仲有對鞋響德福未去攞，於是就叫佢出返九龍去德福等，六點幾估到和民應該未有咁多人，於是一夠鐘放工我就拿拿聲收工去同佢會合啦~~
去到果然未full晒，唔駛等即刻安排到座位~
一口牛肉，唔錯，點蘿蔔蓉食幾好味~~
魷魚刺身，隻魷魚好大隻，好有咬口，好多冰伴碟，幾好味~~
鮭魚野菜卷....入面個芝士好膩，我唔係咁啱，不過老爺幾欣賞，大部份佢攪掂晒~
雜錦串燒，OK啦，不過不失咁.....
蒜香海鮮炒飯，飯炒得幾乾身，海鮮料都幾多，幾好味!
刺身冷麵....冷麵煙煙韌韌，都唔錯~
總括黎講食物嘅質數都OK，選擇嘅種類都好大路，價錢又平，想經濟咁食一餐日本野，和民係唔錯嘅選擇，不過真係無時無刻都係咁多人等位，食完出黎門口又係一大班人.....已經好耐未試過可以咁早食完晚飯....如果老爺成日可以咁早收工就好啦~~~
真係俾yahoo玩殘
，唔知點解無啦啦會睇唔到呢篇blog，唔識點攪，唯有再re-post多一次......yahoo blog成日都有問題，真係有D擔心會唔會有一日所有嘅網誌會突然消失晒~~
----------------------------------
上星期我地去左海洋公園，事緣係因為早排美心有張coupon話兩個人去第二個人可以有半價，六月尾到期，張coupon其實放響一邊好耐，有日揾野突然見到，所以就響最後限期前用左佢，同埋我已經好耐好耐無去過~
通常星期六日唔駛返工都瞓到日上三杆，不過老爺話太晏驚會好多人，一朝早就不斷咁鏟我起身....
十點鐘去到，已經好多內地同胞響度，剛剛開門放人入~
好彩去左，遲D又話加價~
首先去探下安安同佳佳~
等左一陣都淨係見到一隻唔知係安安定佳佳，另外嗰隻唔知去左邊....
只得一隻熊貓好寂寞咁響度食緊早餐...
之後去左坐升空氣球....
淨係排隊都排左一個鐘，排響我地前面見到陳嘉儀，即係老婆大人入面宣萱個阿媽，佢真人都keep得幾好.....嗰日超熱，又排得耐，排到尾仲要見到有個中東肥女人帶住個豆靚靜雞雞響我地後面想打尖
，我捉住個女人隻手叫佢去後面排隊，佢怒睥我仲同我嘰哩咕嚕講一大堆中東話，其實對我地無影響，但係響我地後面俾佢打左尖嗰班人又唔出聲，我地話俾D工作人員聽但都無理就照放佢地上氣球
....離晒大譜!!
終於升空~
響高空見到安安佳佳嘅熊貓館~
另外一個熊貓館
永恆嘅標誌
坐完汽球就去搵盈盈同樂樂~
首先有小熊貓，走黎走去好鬼精伶~~
盈盈 or 樂樂
D熊貓真係好得意~~
娃娃魚
呢度D環境比安安佳佳嘅熊貓館正好多....覺得安安同佳佳好可憐~
熊貓公仔....當然無買啦~
跟住去睇金魚....
其實無咩好睇~
超騎呢許願燈....
仲有鱷魚
個小朋友好得意，忍唔住影佢~
跟住就去搭纜車上山，或者仲早所以唔駛點排隊~
首先去坐海洋摩天塔，都要排幾個字時間~
轉一圈，360度睇晒~
太平洋海岸
唔知係海獅定海狗 (我從來都唔識分....)
海獅定海狗呢? 抑或係海豹?.....
(其實有無海豹呢樣野呢??)
老爺唔肯玩機動遊戲，"哎"左好耐先肯同我玩滑浪飛船....
都排左成大半個鐘先有得玩......玩完後淋到一身都濕晒~~~
之後去食野....D魷魚好惹味
，不過我覺得最好食都係冰凍嘅生果，因為露天無冷氣，熱到飛起~~
食飽後行左去紅鸛池，不過D紅鸛鳥唔知係咪太熱"喱"埋晒一隻都見唔到....真係熱得好交關，我地連百鳥居都唔想行~
環保樹
越礦飛車，望落去都唔係好危險啫，不過老爺死都唔肯玩....
無得玩機動遊戲，我地直接行去水母館睇水母.....
入場都要排隊，其實唔係真係好多人，只係因為入場時D工作人員要你企響度影張相.....阻住晒D時間~
D水母都幾靚~
個珊瑚都靚~
D水母都好多種款嫁~
有間房入面勁多呢款水母，有唔同顏色嘅燈光打落去，好迷幻~
呢面牆好得意，有D水母響牆上面游黎游去，你用隻手拍落去D水母會彈開，D細路猛咁響度霹靂啪啦，拍得好興奮....其實我都覺得幾好玩~
我買左個jelly baby~~
睇完水母就去排隧入海洋館....
鯊魚baby & 蛋
D海星可以俾你伸隻手去摸，不過要先去排隊洗手，勁多人爭住洗手，真難頂....終於洗完手想去摸點知唔係好夠手長，我唔想太"烏"低身 (因為呢日件衫個領口比較低)，所以就叫老爺求其影張相算，跟住就俾佢鬧我混吉....
個海洋館同N年前黎睇嘅都係差唔多樣~
奇奇怪怪嘅魚
呢條鯊魚條尾斷左，攤左響度唔郁....
呢條唔知響度hea緊定瞓緊教，又係唔郁....不過唔郁都好嘅，如果佢郁就影唔倒相啦....
D魚遊得好快好難影，都係影video算~
自從海威死左之後，總係覺得少左D野....既然夾唔啱時間睇海豚表演，所以都無等下一場.....行左成日都好攰，係時候搭返纜車落山走人....單係排纜車都排左大半個鐘有多~
老爺話覺得呢個角度望落去D纜車好有型，好似傻左咁不斷勁影相....佢有時都好鬼低能~~
山下好多地方做緊工程擴展緊~
Bye-bye 啦
....又要等N年之後先再見~~
