以集團連鎖食店黎講，其實我地都幾鍾意和民，價錢OK，食物選擇大眾化，D野普遍幾好食，而且樣樣菜色都有一D，總會揀到合自己口味，分店又多，只要係大型商場就會有，shopping完都真係總有一間響你左近，不過通常就好多人等候....
尋晚老爺響新界開完會費事返公司，見佢竟然可以早放工
，咁啱我仲有對鞋響德福未去攞，於是就叫佢出返九龍去德福等，六點幾估到和民應該未有咁多人，於是一夠鐘放工我就拿拿聲收工去同佢會合啦~~
去到果然未full晒，唔駛等即刻安排到座位~
一口牛肉，唔錯，點蘿蔔蓉食幾好味~~
魷魚刺身，隻魷魚好大隻，好有咬口，好多冰伴碟，幾好味~~
鮭魚野菜卷....入面個芝士好膩，我唔係咁啱，不過老爺幾欣賞，大部份佢攪掂晒~
雜錦串燒，OK啦，不過不失咁.....
蒜香海鮮炒飯，飯炒得幾乾身，海鮮料都幾多，幾好味!
刺身冷麵....冷麵煙煙韌韌，都唔錯~
總括黎講食物嘅質數都OK，選擇嘅種類都好大路，價錢又平，想經濟咁食一餐日本野，和民係唔錯嘅選擇，不過真係無時無刻都係咁多人等位，食完出黎門口又係一大班人.....已經好耐未試過可以咁早食完晚飯....如果老爺成日可以咁早收工就好啦~~~
piggybread : 呢篇可以睇得到 , 睇D相食物唔錯喎 , 攪到我都心思思 , 想食番餐日本野 .
回覆刪除Bye Bye !
[版主回覆07/11/2009 22:46:00]好擔心呢篇又睇唔到，都唔敢post東北嘅trip住~
和民ok嫁，經濟實惠，搵次去試下啦~~
我都好喜歡去和民, 不過每碟都好細, 份量好像好小
回覆刪除[版主回覆07/12/2009 22:20:00]細細碟，咁咪可以叫多幾款啦~
魷魚刺身真係好大隻! 我都間唔中去嫁! 不過佢哋啲嘢細細碟, 我人多 (嗰啲化骨龍) 猛咁叫, 我次次都要好貴落樓.
回覆刪除[版主回覆07/13/2009 23:00:00]佢地d野真係幾的色，如果人多就真係要叫唔少野先可以滿足所有人，雖然每款都好似唔係好貴，不過小數怕長計，叫得多埋單就真係好係野....感覺上我地兩個人去就比較著數d~