2008年2月北海道8日遊 - Day 5 (Part 2 - 小樽！我地又黎啦~~)

2月25日   星期一

返回酒店check out後，酒店的shuttle bus準9:45離開。返去札幌嘅路程，白天嘅景色跟夜晚實在相差太遠，尋晚好荒蕪嘅地方，原來係一片白茫茫嘅雪地，陽光照耀下雪地似在閃爍，定山溪真係好美嘅一處地方！

約一個鐘車程就返到札幌，響JR站放低D行李，我地就立刻去JR案內所reserve 11:14嘅班次往小樽。途中我地就攞返朝早響定山溪買嘅溫泉饅頭出黎開餐，雖然已經唔係熱剌剌，但係都好好味~~

由札幌去小樽嘅車程只係半個鐘，將近到嘅時候又再見到一列長長嘅海岸，間唔中會見到有海鷗響度滑浪呀~~

今次已經係第三次黎小樽喇！其實最初設計行程時我地無plan去小樽，不過因為無機位所以將個trip加多一日，咁咪又揀返小樽囉。老爺一聽見又係小樽就叫救命，他一D都感受唔到小樽嘅浪漫，仲覺得好悶，「來來去去咪又係淨得D玻璃同音樂盒！」係佢對小樽嘅comment.....真係比佢吹脹，就係因為D玻璃同音樂盒先令得小樽更為浪漫嘛，對牛彈琴，費鬼事理佢，反正去邊度一向都係我話事，佢只能夠 say YES~~~~

上兩次我地都係響小樽總站落車，然後經中央通由海嗚樓果邊沿運河一路行去堺町到蒸汽時計，不過每次行到去十字路口已經開始日落，銀之鐘、夢之音等店舖總係匆匆行個圈就算，所以今次我地決定響南小樽站落車，打算掉轉頭行返過去淺草橋囉~~

響南小樽落左車，唔使十分鐘就已經行到去小樽音樂盒堂本館，未入去響外面已經聽到悅耳悠揚嘅音樂聲~~

好多音樂盒呀~~

響音樂盒堂、夢之音行夠本後，我地就去左銀之鐘1號館歎返杯咖啡同cheese cake啦，食完仲可以攞走埋果套限定版嘅Hello Kitty杯碟，真係又食又拎呀~~~呢兩套杯碟我那超愛Hello Kitty 嘅細妹不知幾羨慕，不過佢自己去過幾次小樽都唔買，咁我梗係絕對唔會割愛啦....

有耳杯連碟一套750yen，無耳杯480 yen，都幾抵~~

食完後我地就繼續逛，指定 shopping 店舖如幾間北一硝子館、夢藏人、LeTao、小樽浪漫館等等我都唔肯放過，不過唔知係唔係呢兩年黎小樽黎得太密，D野熟口熟面，行晒成條堺町通收獲都係一般...>_<...，好似響北一磨左好耐，係玻璃都摸一餐，但竟然一樣野都買唔倒呀)))))).....

充滿浪漫色彩嘅堺町，耳邊仲不斷傳來悅耳嘅音樂聲同風玲聱~~~

行到去北菓樓，咁就梗係要入去做例行工作 -- 試食啦~~~我地最鐘意果D「開拓おかき」，真係好好味架....

有師傅響度做年輪蛋糕~

響北菓樓外面有兩個雪人，好 sweet 呀！

路邊D樹落晒葉光禿禿咁，好得意呀~~

中途見到有架車比好大舊雪蓋住，奇景！好多人同我地一樣響度影返張相~~

行行下響街邊忽然見到有帶子賣，一隻500yen，好大隻喎，咁我地梗係唔會放過啦，不過都幾貴，所以只係買左一隻兩份食~~

行行下又開始落雪，飄飄嘅白雪洒落小樽富歐陸色彩嘅街道，真係幾浪漫。街上嘅遊客唔係太多，至少無夏天時咁人迫。其實由十字路口至淺草橋一段路唔係好長，不過邊行邊買邊食邊影相，悠悠閒閒，倒是很寫意。

又有雪人啦~~

今次遊小樽我地打算以淺草橋為終點站，去到大正硝子館天色已經開始暗。

大正硝子館呢邊果截運河結晒冰，好多雪堆晒落條河度~~

出拔小路，好似屋台橫丁，不過勁遊客區feel囉....

終於去到淺草橋，小樽運河旁嘅煤氣燈雖然都未著晒，但係河畔嘅倉庫群反映落河面，連同雪花飄落河上面，已經有一種好淒美嘅感覺~~

河畔嘅舊倉庫群，D冰掛好似輕飄飄咁~~

走落去運河旁邊嘅散步道，白雪堆積一地，遊人稀少，D雪好乾淨呀~~

行左一陣，上返橋面，煤氣燈已經全部亮晒，D燈光映照響河面上嘅倒影，好有異國情調 feel，真係超浪漫~~~ ....諗返起舊年黎小樽係雪燈節，D人簡直迫爆，根本無閒情去欣賞白雪下運河嘅美，同今次係兩個極端，無咩遊人同你爭位影相固然舒服D、悠閒D，不過就相對咁有少少寂寥嘅感覺囉~~

舊年嘅小樽雪燈路，河面飄浮無數蠟燭，係好靚，不過D人就勁多呀~~

離開淺草橋，我地就沿住中央通行返去小樽站，途經舊手宮線跡地，嘩！D雪好深呀，成段鐵路都被D雪覆蓋住~~

去到小樽站，原本打算搭兩個站去Wing Bay Otaru逛下同食晚飯，不過經過尋日大災難日，我家老爺有D擔心仲會有暴風雪，所以最後改變主意都係早D搭JR返去札幌先食晚餐。去到車站check左班次後，趁仲有D時間，咁就梗係走去車站旁邊果間100 yen 店度行個圈入返D貨先啦~~

懷住非常不捨之情同小樽講bye bye，今次比較精簡嘅小樽半日遊，老爺都好滿意........返到去札幌，都未夠七點，經過FANCL就順手掃返少少貨，然後就去ESTA購物商場，陪老爺逛一陣Golf Shop，佢都總算有D收獲呀！

Shopping之後我地就打算響10樓拉麵共和國食拉面，不過實在勁多人排隊，於是就改去食炸豬扒飯。

我地叫左兩個炸豬扒飯定食，我果個set就加多兩隻海老...，有枝棍用黎磨芝麻，有得食又有得玩，幾得意，埋單 3600yen~~

食飽後我地又走返去拉麵共和國，食唔倒拉面，咁就買返D拉面補返數囉~~

之後響商場再留戀多一陣，最後就行返去JR站攞返D行李然後就返去酒店，咁呢一日嘅行程就完結啦~~~

-----> Day 6 漫遊洞爺湖 & 千歲 Outlet