2008年2月北海道8日 - Day 5 (Part 1 - 快速遊走定山溪)

2月25日   星期一

今日係第五日，話咁快個旅程已經去左一半。經過尋日如此驚險嘅災難日，希望今日順順利利啦~~~

為左彌補尋日失去嘅時間，今日晨咁早我地就起身，踏正七點就落去酒店餐廳食早餐。呢間酒店嘅朝食好多野食呀，除左一般日式同西式嘅野食外，仲有好多款中式點心，甚至有炸菜，用來送粥好好味呀....朝食都咁多野揀，可想而知夜晚個自助餐睇怕都會有數之不盡嘅美食啦！唉....呻都無謂，唯有而家食返多D補返數！

食飽後未夠8點我地就拿拿聲出去外面逛。一場黎到定山溪，無理由唔去行個圈就走架！我地預約左9點45分嘅酒店巴士返札幌，距離依家仲有個半鐘有多，我地要響咁短嘅時間行晒我地原本尋日打算行嘅景點呀！

今早天色幾好，只有點點雪花紛飛。我地沿住尋日行上黎果條小路落返山，絛溫泉街應該就響我地尋晚落車嘅地方附近。

呢幅相就係響條小路影返落去架~~

就係呢條斜路，尋晚行到我成隻狗咁...朝早睇返原來個view好靚架~~~

行到落山下，我地首先就去二見公園，點都要望下條出名嘅紅色二見吊橋先得架！

公園個入口，不過唔知點解叫源泉公園？

唔知係咪太早，個公園一個人都無。尋晚一定落過好大雪，因為周圍都鋪滿晒好厚嘅雪，旅遊書介紹會見到好多河童像，但係成個公園都係雪，大概D河童都比D雪掩埋。不過四周鋪滿晒白雪真係好靚，連條溪流都係雪呀~~

溪流中D石頭比D雪包實晒，好得意呀，好似D綿花糖咁~~

望落去D雪好似軟綿綿咁，好想瞓上去呀~~~

我地沿住定山溪旁邊條路行，睇地圖行到去盡頭就會見到二見吊橋。不過愈行D雪就愈來愈深，簡直有D舉步維艱！

睇下我隻腳踩落個雪地度係幾咁深~~~

河童大王呀，係河童之首~~

行左無耐遠遠就隱約見到條二見吊橋，紅紅的在一片白雪中份外搶眼，不過D積雪實在太深，都唔知前面果條係路定係條河流，因為見得到嘅地方都比D雪摭住晒！我地企圖試下繼續向前行，不過D雪實在太深，行左兩步我突然就跌左落去D雪入面，老爺扶都扶唔切，要從雪中抽返我出黎，嚇到我地唔敢再繼續向前行.....

無辦法行到去條二見吊橋，唯有影返張相留念囉~~

終於見到二見公園嘅標誌，估計應該有兩個河童響個石碑上面，不過比D雪摭住晒，好可憐~~~

觸目所見，所有野都被白雪掩蓋，完全分唔清邊條係路邊條係溪流~~

呢條基本上係一條散步道，旁邊就係條定山溪，不過D雪咁深，點夠膽行喎~~

響公園逛左一陣，做晒D指定動作，即係影相、影view cam、打雪戰等等就離開二見公園，然後就行返去溫泉街，即係尋晚我地落車嘅地方。

就係呢個湯之町車站喇，夜晚係完全睇唔清楚架~

繼續向前行就見到岩戶觀音堂，據講穿過個堂後面有個山洞，入面有33尊不同種類嘅觀音像，不過時間太趕，無入去睇，只係影張相算係到此一遊咁啦^_^

再向前行忽然見到有個足湯！原來係長壽と健康のほの足湯，我地未浸過足湯架，梗係即刻走去試下啦~~

之前睇旅遊書已經知道定山溪有幾個足湯同手湯，所以我早有準備，尋日已經帶左兩條毛巾仔放定響背囊，預備抹手抹腳用，尋晚太攰都無執返出黎....不過就算無帶都唔使愁，因為響足湯旁有自助毛巾售賣機，200 yen一條。

D溫泉水好熱呀，不過真係好舒服....最難得就係周圍一個人都無，鍾意點浸就點浸，點擺甫士影相都無人理！我地一路浸一路研究，得出嘅結論係呢個足湯D水係真溫泉水，因為晨咁早睇怕都唔會有人咁得閒特登整D假嘅溫泉水黎呃人掛....

響足湯旁邊終於見到河童喇，好可愛呀~~

地面上都係溫泉水黎架~~

浸左一陣，成個人都暖晒，見差唔多時間，就行返去溫泉街，見到尋晚問路果間店鋪竟然開左門，咁就梗係要入去shopping下以報答大叔尋晚教我地行小路啦~~

雖然時間緊迫，但shopping係我嘅天性，係扼殺唔倒架，響短短兩、三個字嘅時間，我就買左萬多yen喇....咩都買下咁啦，電話繩 (竟然比我揾到舒華洛世奇嘅紫水晶電話繩！)、鎖匙扣、河童公仔、河童造型嘅小擺設、盒裝拉麵、燒餅和果子等等....總之就一大堆....其實都唔係好過份，因為尋日我一D野都無買過，今日豪返D都係情有可原~~

河童陶器擺設~~

回程時經過一間專賣溫泉饅頭嘅商店，見係新鮮出爐，好多大嬸排緊隊，咁我地又忍唔住買左盒。買完後就趕返去酒店執野check out啦~~

又見到河童，個造型好得意呀~~

呢幅係今個trip響定山溪影嘅最後一張相，個view好靚呀~~

清晨嘅定山溪真係好寧靜、好悠閒，有一種靜態嘅美，可惜時間所限，唔能夠細細欣賞。望住被白雪掩蓋住嘅溪流，我就同自己講，將來有機會一定要再黎過....

美麗的定山溪，要講聲 bye-bye 啦~~~

-----> Day 5 (Part 2) 小樽！我地又黎啦)))))