2008年2月北海遁8日遊 - Day 4 (大災難日!!!!)

2月24日   星期日

今日係第四日，起身望出窗外似乎好寧靜，白雪鋪滿一地，大概尋晚落過雪。

個view好平靜呀，幾條火車路軌都見唔倒有火車行或停泊喎~ (其實係事出有因...)

響酒店食左個無咩野食嘅早餐後就check out，一踏出酒店門外就比D強風迎面咁吹過黎，D風真係好勁，吹到頭髮亂七八糟，甚至寸步難行。平時習慣性要企響酒店門外對住 view cam 講下感受同介紹果日嘅行程，但今日D風實在太勁，兜口兜面咁吹埋黎，幾乎呼吸唔倒呀！不過就仍然見唔到落雪 >_<

尋晚上去果個函館山呀，山頂座建築物就係涷到我地癡肺嘅展望台啦~~

今日嘅行程係搭8點30分開嘅super北斗3號返札幌，11點47分到，打算響札幌食完午飯就會去定山溪，我地預約左定山溪萬世閣酒店嘅免費巴士接送，兩點鐘響札幌等。幾經辛苦，同D風搏鬥左一輪，終於去到車站，望下個班次顯示屏，好奇怪，都8點10分啦，仲未見到北斗3號嘅資料，響呢個時候，我地仲未知驚，唔知道已經大禍臨頭，見未夠鐘咪又走去車站果間手信店度行個圈，買左D箱館麵咁囉。買完出黎，見個顯示屏仲未打出班車嘅資料，有無攪錯，夠鐘lu喎，架車仲未到？！響呢個時候，我地先發覺唔對路，大堂不斷有廣播，個車站閘口堆滿晒人，響旁邊原來棟左個告示牌喺度，唔睇由自可，一睇就知今次好大鑊......

雖然唔識日文，但都估倒唔荒好野，睇見暴風雪同運休幾個字，又見到北斗3號，呢個時候就知死啦！暴風雪？！唔係掛！有無搞錯？呢兩日一粒雪都未見過由天落過黎喎！呢兩年冬天黎日本旅行，次次都見到有新聞報導話大風雪影響機場鐵路班次，次次都求神拜佛唔好遇到，今次終於避唔過啦！最可怕嘅事終於發生！我地望住個告示牌都唔知比咩反應好.....運休？即係點呀？咁幾時會有車呀？我地個行程好趕架！.....即刻走入去個人群堆入面，問下個車站職員知唔知幾時有車啦，點知個職員都唔識英文，嘰呢咕嚕同我講左一大堆野都唔知佢講乜！無計可施，唯有企響度等，又唔敢行開，驚唔知幾時會有消息。等左一段時間，見到有個大D嘅電視屏show左D資料出黎，一睇見就想暈，原定由札幌開10點11分到函館嘅車都運休，無車黎又點會有車走！

雖然明知問唔倒D咩，但係點都要揾個職員問下點先得架，今次呢個職員識小小英文單字，淨係響度話 notice later, sorry sorry 咁囉！今次死硬啦，莫講話趕唔切搭shuttle bus，連返唔返得到札幌都唔知呀，唔通要滯留響函館？！今晚住嘅定山溪萬世閣酒店重係已經比晒錢，真係好愁.........正在徬徨之際，忽然有兩個香港人走埋黎同我地搭訕，正所謂他鄉遇故知，梗係即刻大家交流下D information先啦！原來佢地見到我同個職員糾纏左咁耐，以為我日文好掂，我都真係唔係幾好意思.....經過大家一輪推敲，應該係由札幌至苫小牧一段路有暴風雪，所以呢段路D車就全部停駛。佢地仲大鑊過我地呀，因為佢地買左機票下午由札幌去東京，而家都唔知點算，今次真係各自聽天由命啦！

呢個時候真係好無奈，又唔敢行開，如果知道幾時會有公布，都話可以出去行下shopping下吖！等下等下，個站愈黎愈多人，唔知點解忽然又見到有人開始響閘口開始排隊，咁我地又跟住排囉，雖然唔知排黎做咩，但係橫掂都係企響度咪跟住D人排下囉，無蝕底格！不過排左一段時間都無動靜，睇黎暫時都唔會有咩新消息，等到鬼死咁悶，咁我地就決定唔理咁多走出去行下先，好過響度呆啦！

出到外面真係勁大風，唔怪得話刮暴風雪，D風打落塊面度尺尺痛，不過就仲係一粒雪都見唔倒落喎。行左一陣，都唔敢行咁耐，就返番去車站睇下有無咩消息。如是者行下等下，有時又一個人響大堂等另外果個就揾地方坐下，又或者逛下D舖，車站果幾間舖都比我行到熟晒！終於響差唔多12點時就見到個顯示屏打出左14:13分有班北斗13號車返札幌呀！好開心呀，終於等到有車開返札幌啦....

好快速地我同老爺就決定即刻出去食午飯，因為呢個時候想話去 reserve 指定席係無可能嘅事，一早就已經 full 晒，只有搏下自由席，既然係咁就梗係先去填飽個肚返黎排隊等入閘啦！我地嘅如意算盤係因為我地有 JR Pass 在手，咁係可以隨時入閘先架，如果問到咪扮唔明囉，唔比我地搭第二班車咩，咁入到去咪可以早D揾定個位排頭囉.....諗倒呢條橋我都覺得自己好聰明~~~

咁我地就拿拿聲走去朝市橫丁，諗都唔駛諗就揀左食拉麵，因為今次響函館都未食過佢出名嘅盬味拉麵~~

盬味叉燒拉麵~

食完就走返去車站，呢個時候都未夠一點，D人大概去左食飯所以個車站唔係咁多人。咁我地就走去入閘口諗住show個pass比職員睇，不過佢地掛住同一班人講野都唔得閒理我地，咁我地就好順利咁入左去啦。入到去我地就行到去5號月台嘅入口，果度已經有幾個人企左響度等，於是我地就揾左個近玻璃門嘅位置諗住響度排囉~~

等左一陣我就同老爺講都係出去月台度睇下到底個自由席響邊一號車卡好D，咁我咪走出去睇下囉，月台出面好鬼凍，行左好耐經過一間木屋仔，再行到去第6卡先見到自由席個牌。走返去話比老爺知，又叫佢再去check多次，佢返黎就話全車只有第6同第7個車廂係自由席！...得兩個車廂係自由席咁少？唔好嚇我，得咁小位而我地又拎住咁多野點夠人爭呀！咁我就同老爺講頭先我見到有個唔知係候車室定抽煙室，離自由席比較近，叫佢再去confirm下，佢又出去睇多次返黎就話應該係候車室，咁我地就決定都係攞埋D野走去個候車室度等穩陣D囉。老爺又話好奇怪見到有職員響月台度掛緊北斗9號而唔係13號嘅牌，不過都唔理得咁多，都係出左去先算啦！

走到去候車室見到原來已經有幾個人響度等緊，咁我地就好安心咁放低D行李揾個位坐，諗住仲要等成個幾鐘.....不過稱得上係大災難日又點會咁順利呢，等左無耐就開始見到出面有職員響度清場，然後D職員就走入黎請人出去，有個男人媽媽聲 (我估架，呢個時候唔係媽媽聲係咩喎！) 咁離開。咁我地就扮晒傻仔咁扮聽唔明佢講乜，佢指手劃腳又猛問我地sapporo sapporo？咁我地唯有點頭囉，於是佢就好有禮貌咁示意我地出返去入口度等，仲要荒死我地會偷走返入黎咁一路護送我地行返出去！

去過函館車站嘅人大概都記得果條好靚好闊落嘅長廊，係呀，差唔多去到月台入口，望過去果條長廊已經密麻麻塞滿晒人啦！好得人驚呀~~~~短短幾個字時間，同我地之前所見嘅簡直係兩個樣....我一路行就一路流冷汗，咁多人....唔係要我地排返去最後呀？唔好咁對我地啩，連條龍尾響邊都見唔倒，咁樣我地實上唔倒呢班車架！我一路行一路唸喃嘸呵尼陀佛........終於行到去入口，個職員幫我地推開面玻璃門，咁我地見同我地一齊行返去果個男人一行入去就理直氣壯咁企左響前排唔郁，咁我地梗係跟佢一樣扮傻仔企響度啦！老實講，我地咁樣都唔算打尖喎，只不過我地係一早就去左月台度等，偷步左少少啫，法律都無規定唔比人響月台度等，無理由要我地排返去最後架！好彩D職員同D人又無出聲喎，咁我地總算鬆左口氣，迫左響最前排囉.......呢個時候我地發現原來13點30分加開左班車呀，唔怪得老爺頭先話見到職員響度掛北斗9號嘅牌啦。

雖然排響最前排，但我地仍然好緊張，因為我地都知道我係跑唔倒架，而且仲要行兩步就會PK....老爺就叫我比晒所有行李佢拎，只係叫我拎住果三把摭咋！佢又不斷咁吩咐我，要我一路向前跑唔好理佢響邊，又千祈唔好跌倒.....佢愈講我就愈驚... 就係咁樣我就緊緊地揸住三把摭好緊張咁響度等開門囉！

等左一陣，D職員終於打開道玻璃門，只係一眨眼嘅時間，所有人都衝晒出去，我拚命咁奔跑，初初只係見倒幾個人響我身邊同我差唔多距離一齊跑，但係跑左無耐就已經見到不斷有人從我身後超越左我喇！

根據我老爺事後嘅說法係咁樣嘅：
「一出閘明明見佢係第三個跑出去，唔夠十秒已經墮後，D人不斷響佢身邊經過，我又唔敢跑得快過佢，驚佢PK起唔返身會比人踩死.....」

就係咁樣，我雖然搏晒老命咁跑，但係就愈來愈多人超越我.....跑左好耐，忽然見到有間Kiosk (賣報紙雜誌便當果種store)！我雙眼發白幾乎要暈低，唔係掛....我跑左咁耐而家先見到Kiosk？！呢間野我記得好似離入口唔係好遠架喎.....我邊喊救命邊拚命奔跑，可見範圍又唔見老爺，D人就不斷咁爬我頭，心入面真係好驚，不過我同自己講點都要頂硬上跑埋佢.....幾經辛苦終於走到去果間候車室，呢個時候已經無晒氣，對腳又軟晒，我好肯定當時自己嘅速度係相等於行路咁款，正想放棄之際，忽然見到好多人衝緊入去一個車卡度，原來係第6號車廂呀！終於到啦~~~~正當想跟住D人跑上去時，突然聽到老爺響我後面大喊：「後面果卡！呢卡你唔夠人快架！！」聽佢咁講我仲係好迷惘，唔係第6卡咩？仲要繼續跑？真係跑唔郁，無氣喇喎....忽然就見到老爺從我後面超越左我向住第7卡跑過去，我當堂精神一振再發力跟住佢.....老爺好勇猛呀，好快就衝左上去仲竟然霸倒兩個座位！...

坐低之後，都未抖順條氣，老爺已經急不及待攞部view cam出黎影，咁又係，咁難得嘅「走難」場面真係難得一見....好快咁我地個車廂已經塞滿晒人，搭左咁多次特急都係第一次見到成車迫滿人，莫講話個走廊企晒人，連上落位都迫到陷，後黎老爺去個toilet都因為寸步難行而搞左十幾分鐘先返倒黎呀，可想而知成列車係幾咁迫！雖然已經迫到咁，望出車外依然見到仲有好多人企圖迫上黎，我見到有個女人著住對幾寸高嘅高跟鞋手拖住個大喼響到徘徊左好耐都上唔倒車，又見到有對夫婦拖住兩個小朋友好愁咁企左響月台度....心裡面雖然都覺得佢地好慘，但亦好慶幸自己上倒車仲有位坐.....

班車好快就開啦，我地估計應該約莫五點倒就可以到札幌，雖然搭唔倒定山溪嘅shuttle bus，好在我之前都有睇過下點樣搭公共巴士去，但係個車站響邊度就唔係好清楚，不過唔緊要啦，睇返個時刻表，17:20 同 17:40分都有車，慢慢揾17:40分果班點都趕得切掛，一個鐘車程，去到定山溪都唔會太晏，諗到呢度就安心左D囉。

沿途都見到好多呢D雪山景呀~~

一路無話，平時搭長途車我地都會預備好多小食打發時間，但今次因為企左好多人響身邊，我地都唔好意思攞出黎開餐，咁咪瞓下又醒下咁囉。正當我地以為好快就到札幌之際，原來真係有黑開有條路呢樣野架！都話係大災難日，個天又點會咁輕易放過我地呢....架車去到東室蘭站就停低左好耐唔郁，係有廣播架，不過都唔知講乜，見D日本人又無咩特別反應....講真，比著響香港，咁樣停法，D人唔鼓譟暴動都媽聲四起啦，日本人真係好逆來順受，淨係睇住佢地企響充滿住暖氣嘅車廂入面，著住件羽絨都可以頂幾粒鐘唔除衫，就知點解香港市民成日比人話淨係識得投訴啦！不過架車真係停左好Q耐，差唔多成粒幾鐘....行返之後又開得好鬼慢，行下又停下，當時真係好驚響中途又遇大風雪會停駛。去到苫小牧見到勁多雪堆滿晒成個站，D樹又東歪西倒，可以想像場暴風雪真係好勁！

終於去到札幌啦，原本預算五點到達最後要攪到六點四十五分先到！個天都已經黑晒！睇返個時刻表，七點有一班車去定山溪，如果趕唔倒呢班車就要等成半個鐘先再有車，我地又唔係咁肯定個車站響邊，所以架車就快埋站時我地就已經著好晒羽絨拎定晒野預備第一時間落車。好衰唔衰，可能係頻撲左成日，又坐左幾粒鐘車，個人好攰，再加上個車廂好焗，對眼變得好乾.....就響呢個咁緊要嘅時候，我竟然捽甩左隻隱形眼鏡！！！簡直晴天霹靂大結局，我600幾度近視架！但已經咁趕，仲邊有時間去戴返隻鏡，或者響個袋度揾副眼鏡出黎呀，唯有單住一隻眼行路囉 ！落左車鬼咁多人塞住晒，我地左損右損好快速咁離開月台，落樓梯時真係好驚會 PK....終於出左閘，咁我地就向住站南面嘅方向奔跑過去，隱約記得果度好似有個巴士總站，不過我只得一隻眼睇倒野咋，所以走得好辛苦....去到巴士站，老爺今次好犀利，一去到就比佢搵倒定山溪線響邊一號站，咁佢就叫我唔使走咁急，等佢行快D去check下個站啱唔啱先，咁我咪跟住佢後面行囉，但係個站好暗，我又根本睇唔清楚條路，正所謂人衰行路打倒退，一個唔為意就踩中D冰"慣"低左啦..... 最慘就係老爺響前面掛住搵站都唔知我 PK，咁咪唯有自己慢慢爬返起身囉.....

去到個車站只有幾個人排緊隊，排響我地前面係個著西裝嘅男人，咁我地就拎住本旅遊書翻開定山溪果頁向佢問個站啱唔啱囉，個男人好好人呀，仲寫埋車資比我地睇，係單程750yen一位。上左巴士我地就搵左兩個位係睇倒個巴士路線圖。架車準七點就開啦，到左呢個時候我地總算可以鬆一口氣.....

架車去到大通公園個電視塔係七點七分呀~~

原本以為只係一個鐘嘅車程，點知架巴士響市內兜左好耐，我地一路睇住個巴士路線圖，本來都好老定，點知行行下D站開始對唔倒，仲以為搭錯車，好彩原來架車兜左去行支線，真係嚇餐死，大概某D班次係會咁行，我地就係比較黑仔搭正呢班囉，加上坐響我地後面有個癡線佬成個車程響度又唱歌又講野，幾驚佢會襲擊我地...

架巴士行左好耐，大概三、四十個站咁上下之後，睇個路線圖應該就快到，車上D人愈來愈少，望出去就愈來愈黑，有D站好荒蕪，而且係無街燈架，漆黑一片，好得人驚呀，如果要我地響呢D地方落車真係唔知點行....好彩過左條隧道之後就光猛返，有返D人氣。根據旅遊書我地係響湯之町站落車，落左車周圍寂靜一片，望下個地圖發覺有D唔對路，點解見唔到間酒店嘅？成條街又一個人都無，想話搵個人問下路都唔得。向前行左一陣終於見到有間店未close，咁我地就拿拿聲走入去問下個老闆，佢就帶我地走出去向住遠處山頭方向指住比我地睇，我地當堂嚇到傻左.......唔係掛！山頂？點行呀？個天仲要咁玩我地？！佢見我地好迷惘咁款，就好熱心咁指住山下教我地由絛小路行上去。多謝佢之後咁我地就開始遠征喇........就響呢個時候個天竟然開始落雪......終於落雪啦，不過我地實在無心情去欣賞，攪左成日，去到呢一刻仲要拎住咁多野響咁夜又咁寒冷嘅天氣下上山，如果我仲有心情去玩雪就一定係癲左.....

去到條小路入口發覺原來係條樓梯一路通上山，我望住條樓梯歎氣，真係有種想死嘅感覺，但都要行架，咁我地就開始一級一級咁爬上山，好彩有D街燈，未至於好暗，不過都好驚會踩冰 PK.....行下行下，行到成隻狗咁.....終於都行到上去啦。見到間酒店簡直想跪低喊.....我地拿拿聲走入去check in，望下個鐘，已經係晚上8點45分！呢間係一間溫泉酒店，個package係一泊二食，即係包晚餐，重係好豐富果種自助餐，但係已經咁夜，睇怕咩都無得食啦！但係我地比左錢無理由唔供應晚餐比我地架？點都試下問下仲有無得食先啦，幫我地check in 果位小姐好為難咁望住我地，我地就擺出好肚餓好可憐嘅姿態，佢就同個高級D嘅男人商量左一陣，然後就攞住兩張居酒屋嘅coupon同我地講左一大堆野，大抵意思係咁夜已經趕唔切食先助餐，就比居酒屋餐卷我地代替，我地見兩張coupon 合共6000 yen，都OK啦，仲想點，好過無得食啦！

就響我地等緊佢地搞check in 時，見到之前同我地一齊搭巴士黎定山溪果個著西裝嘅男人正響隔離度check in 緊！我好記得佢唔係同我地同一個站落車，因為佢坐響我地前面，仲曾經拎住張野向司機問路，好明顯響酒店附近係有車站啦，而我地果本旅遊書係教錯我地落錯站，要我地行餐矇，真係害人不淺 >_<！..... @$#XYZ#$%^!!!!

上房擺低行李後，我地就喳喳林走去酒店間居酒屋度食我地遲來的晚餐喇。我地計左一輪，終於好順利咁用盡果6000 yen，一個仙都無蝕呀....

食飽之後就返上房，折騰左成日，真係攰得好交關....，成個人好似散晒咁，連溫泉都無去浸就走去瞓教喇，而呢一日咁倒楣咁刺激嘅行程總算都係響有驚無險嘅情況下結束啦！....

-----> Day 5 (Part 1) 快速遊走定山溪~~