PIGGYBREAD: 2008年2月北海道8日遊 - Day 6 (死寂一片洞爺湖)

2月26日星期二

第六日啦！今日嘅行程係去洞爺湖同南千歲 outlet mall。

響酒店食過早餐後，我地就起程去搭8:34班次嘅Super北斗6號，10:15抵洞爺，然後再轉巴士去洞爺湖。之前已經響網上check左由洞爺站去洞爺湖嘅道南巴士時間表，據旅遊書講巴士站就響JR站外面，希望可以趕得切10:17果班車。

個多鐘頭嘅車程好快就到，不過班車delay左少少，遲左一分鐘，所以當架火車一抵達洞爺站我地就即刻飛奔出去，好在個巴士站果然就響JR站旁邊，跑到去個站時10:17果班巴士仲未到站。

呢個就係洞爺站前巴士站喇，呢一日好大雪呀~~

巴士車程約20分鐘，沿路又上山又落山咁，風景好美，不過都幾荒蕪，無咩人氣。觸目所見都係白茫茫一片，山、樹、路、屋等可以見到嘅野都被白雪覆蓋，再加上一路落住雪，真係覺得自己好似去左雪國咁~~

去到洞爺湖，落左巴士後，發覺個巴士站裝修緊，成個地方只係見到幾丁人，又無觀光指示，我地向前行左一陣，見到有個類似觀光案內所嘅物體，走埋去想話攞D資料睇下，發覺個案內所係鎖住左，無人響度不特止，仲係破破爛爛咁，雖然我地已經有心理準備知道冬天嘅洞爺湖唔係最佳旅遊時節，但係都無諗過會荒蕪到咁。我地向住湖嘅方向一路行，莫講話遊客，想話搵個當地人見下都無！周圍死寂一片，天色又灰暗，D雪就不斷咁落，個感覺真係幾淒清~~

行到去湖邊，個天同個湖都係灰濛濛，隻觀光船就泊左響湖邊，好似等緊我地咁~

我地走到去碼頭，一個遊客都見唔倒，正在猶疑唔知走唔走好，忽然有個哥哥唔知響邊度走左出黎同我地打招呼，又用手勢指住隻觀光船問我地搭唔搭.....唔係掛，得我地兩個乘客都開比我地去遊湖？咁我地就指下隻船，又指下我地自己，佢就笑笑口咁指住另外一面嘅小型遊艇，原來唔係搭大觀光船。咁我地望下個船費，1320 yen 一個人，都幾貴，成100蚊港紙，出到去又唔知有無野睇，但係一場黎到，唔搭又唔知做咩好.....是但啦，出外旅遊有D錢係唔慳得架，過後會後悔就無謂啦，咁我地最終就上左隻遊艇仔喇~~

上左遊艇後發覺負責揸船果個人就係同我地兜搭果位哥哥，佢真係one man ban，成隻船得我地三個人，包船出海遊湖，我地都係第一次，咁樣諗果200蚊就無咁肉赤啦~~ >.^

其實隻遊艇都未至於好細，都容納倒成6、70人左緊架。開左船後哥哥仔就開左個電視，不斷咁介紹洞爺湖嘅風景咁囉~~

出到去湖中心，隻船響D島附近兜黎兜去，D島仔同個天同湖都係咁上下顏色，灰灰白白咁，講得好聽就似一幅水墨畫，否則亦可以用單調黎形容都唔過份~~

哥哥仔兜左一陣就返歸喇，總計成段航程只係20分鐘倒，呢次遊船河真係超豪，不過比左出去嘅錢就等於潑左出去嘅水，多諗無謂，當如買個經歷囉~~

呢兩座建築物中間果條路就係我地頭先響巴士站行落黎果段路喇~

到碼頭喇，D冰掛形成嘅構圖好得意呀~~

上返岸後，我地就響湖畔嘅遊步道好悠閒咁逛下，四周圍靜悄悄，間唔中先見到一、兩個人行過。成條遊步道鋪滿晒白雪，圍欄都結晒冰~~

旅遊書介紹話呢條遊步道係一個彫刻公園，有58座雕刻，不過唔知係唔係D雪太深，沿路只係見到寥寥幾件雕刻咋，連果個大面具都搵唔倒 >_<

張凳都比D雪蓋住~~

行到去洞龍之湯，終於見到有兩個香港人響度搭起腳架影緊相，走上前同佢地搭訕左幾句，見佢地反應都幾冷淡，特別係個女仔木口木面一句聲都唔出，好似嫌我地左住佢地咁，咁我地就好知趣咁離開，因為見個足湯啡啡黃黃咁，好似唔係咁乾淨，我地都無浸連相都無影就走喇。

行行下見到一排天鵝船仔，我同老爺講橫掂無咩做，不如去踩船仔，佢只係好簡單咁答左我兩個字︰「癡線！」

行到咁上下，真係幾鬼悶，咁我地就離開湖邊，諗住去行下條溫泉街，無野睇都shopping下啦！點知行到去發覺成條街死寂一片，一間店舖都無開，有無攪錯？咁攪法即係逼我地走摭！！連紀念品都無得買咁黎洞爺湖做咩喎？！

但係都無理由就咁就走架，咁我地就打算去搵埋個藥師之湯影返張相到此一遊先囉。

經過萬世閣酒店附近忽然發現有個長壽之手湯，咁就梗係唔放過浸一野先啦~~

終於去到藥師之湯，咁我地就拿拿林除鞋除襪即刻浸返夠本啦~~

本小姐對肥美腿呀^_^

旁邊有自助毛巾售賣機，每條售 200 yen~

浸完足湯就過隔離浸手湯~~

浸完後手腳都暖晒，咁我地就行返去巴站諗住搭巴士走。去到巴士站，check左13:15有班車返JR洞爺站，距離而家仲有半粒鐘，見車站旁邊有間拉麵店，咁我地就決定解決左午餐先囉~

入到去間拉麵店又見到剛才見過果兩個香港人響度食緊麵，睇黎佢地都係等13:15果班巴士落JR站，不過佢地好似唔認得我地咁(？！)，望都無望我地，所以我地都無同佢地打招呼，真係奇怪，去過咁多次旅行，都係第一次比人咁冷面對待.... >_<

呢間拉麵店細細間，個老闆都幾好人，笑容滿面，又問我地邊處人。佢放左張世界杯嘅相響當眼處，唔知係唔係日本隧都黎過幫襯呢~~

我地叫左叉燒拉麵，因為無圖片，唔識點第二樣~~

食飽後就返番去車站等車，果然見到果兩個香港男女......>.<

D雪落得好大，我地響外面玩左一陣都頂唔住要走返入候車室度等。呢間就係我地幫襯果間拉麵店喇~~

終於等到有架巴士黎，不過架巴士好舊，成架車都見唔到有指示話去邊，但係車站所有人就全部上晒車，咁我地見果兩個香港人都好自然咁上左車，諗住佢地都應該知訂掛，就走去問佢地架巴士係咪搭去JR站囉，點知個男仔竟然答唔敢肯定，應該係掛....我心諗你有無攪錯，咁樣是但都得，搭錯車去左昭和山點算？咁我地唯有走去問下個司機confirm左先上車囉~~

落到去JR站，reserve左14:00開果班北斗9號車去南千歲，見仲有半個鐘，咁就響周邊行下囉，不過附近都無咩店舖，又係死寂一片，只係搵到一間類似便利店嘅細舖咋，不過即使係咁細間店都難唔倒我，我一樣可以掃倒貨架...