2008年10月東京長野川越6日 - Day 2 (白樺湖)

10月2日   星期四

今日係第二日，響酒店食過早餐，執埋D行李就 check out 喇。將兩個大喼留響酒店後，我地就起程去今次旅遊嘅重點 -- 長野白樺湖。

我地經網上訂左白樺湖池之平溫泉酒店，個package係包來回新宿及酒店架。集合地點係新宿中心大廈，就響我地酒店附近，集合時間係9:15。我地九點正響酒店離開，好快就行到去新宿中心大廈，不過企左一陣都唔見有shuttle bus 或者咩臨時車站咁囉。正當個心有D發毛嘅時候，忽然響另一邊見到有位阿姑手拎住個紙牌響度呼叫，咁我地就行埋去睇下，原來個紙牌係寫住池之平酒店，佢就帶我地行去後面條街，果度已經有架shuttle bus 響度等緊，咁我地就show 酒店張 confirmation letter 俾個司機睇，原來響車門貼左張乘客名單，有我地個名架~~

響shuttle bus等左一陣，上齊晒人就開車喇，唔知係唔係因為唔係旺季，眼見只係得四、五pair人咋，其中有一家四口嘅香港人。架車行左個半鐘倒，去到山梨縣一個叫雙葉嘅地方就停低俾我地休息15分鐘。話就話係休息時間，但我地一D都無休息嘅打算，架車一停我地就飛快咁落車去toilet，然後就走左上去一個展望台望下四周嘅風景同影下相囉。

影完相就走去toilet隔離果幾間店逛下，雖然唔知山梨縣有咩特產，但係都係咁意買左少少紀念品......然後又買左D熱狗小食咁，攪到 last minute 最後先上返車~~

差唔多十二點半就到達酒店，有個職員走左出黎響門口同我地講左一大堆野，不過我地都唔識日文唔明佢講乜，佢就用佢好有限嘅英文話俾我地知要兩點後先可以做check in。咁我地放低左D行李響酒店，然後就決定先去參觀酒店附近果間影繪美術館。

由酒店行去美術館大約十五分鐘，沿路靜悄悄，間唔中先見到有一、兩個人行過。沿途見到有個主題公園Family Land，有D機動遊戲，不過唔覺有人玩，反而有個mini golf 場地就有D人氣。

成段路兩旁都種滿樹，行起黎都幾舒服，最初plan黎白樺湖都滿懷希望會見到紅葉，不過大概只係十月頭，所以沿路一D紅葉都無呀 ...>_<

好有歐陸feel嘅建築物，就響影繪美術館對面，不過掛住影呢座建築物，反而唔記得影個美術館~~

白樺湖呢個世界影繪美術館嘅入場費係900 yen，館內基本上係一個叫藤城清治嘅藝術家嘅個人展，佢大部份嘅作品，講真其實都係剪紙藝術，不過佢識得利用燈光或者水嘅倒影去營造氣氛，再加上佢嘅畫作都表現出一種童心以及夢幻嘅感覺，所以即使館內嘅保養做得唔係咁好(近睇好多作品嘅燈箱都有褪色！)，但都真係好有趣味！其中一個叫「鏡之幻象」嘅大型作品，以透光嘅玻璃紙做多重剪貼，兩邊再裝上到頂嘅巨型玻璃同鏡，人企響中間望過去真係幾震撼。而另外一幅「白樺湖之四季」以360度展示白樺湖一年四季嘅面貌，望落去連綿不斷，使人感覺好似走入左童話世界咁~~~

不過最可惜係館內唔準影相，好彩有個紀念品店，可以買返D手信留念~~

除左售賣有關藝術作品嘅紀念品外，仲有精品館，同埋食品館，每一處我都掃倒貨呀......

間食品館仲有免費紅豆湯供應，都幾好味，我地仲買左D紅豆返屋企，可以就咁食，唔使再煮熟，用黎餸粥好好味架~~

離開影繪美術館，行過隔離有間熊仔博物館，不過入場費好貴，成1500 yen一個人，所以我地無入去，只係響門口影相就算~~

行返去酒店，攪好check in就上房放低行李，我地間房係和洋式。呢間酒店俾預期中有D失望，D裝修都幾舊，之前響大堂見D牆紙同地氈都有D剝落，好似無咩維修咁，最攪野就係間房入面個電話仲係用緊攪盤！

響房望出去可以見到個白樺湖架~~

放低野後已經三點幾，我地就出去搵野食，不過間酒店餐廳竟然close左，咁我地唯有行去酒店對面果間Plaza 21求其買D小食頂住先，橫掂酒店自助晚餐五點半鐘就有得食。

Plaza 21，就響酒店對面，外面有間小食店~

食完野就順便響湖邊行左一陣~~

之後就返酒店浸溫泉喇。呢間酒店除左一般男女湯外，仲有大露天風呂、洞窟風呂、泡風呂同檜風呂等等，都係男女混浴，不過要著泳衣架。響洞窟風呂隔離又有按摩浴，仲有桑拿同日光浴，都好多元化，總有一款合心意。我地每種風呂都去浸下，不過個洞窟風呂就比較焗，但係有個嘖射之湯，條水柱好勁，人企響水柱下，D水打落黎好舒服架！但我地最鍾意都係露天風呂，因為勁似戀愛世紀入面木村同松隆子浸過果個露天風呂look呀~~

浸夠後就去食晚餐喇，五點半就可以開始，係和洋式自助餐，雖然唔係想像中咁多野食，不過我地無食午餐，再加上浸完溫泉浴特別肚餓，所以都食左好耐~~

一邊食一邊欣賞外面白樺湖嘅黃昏景色~

食飽後都只係七點幾咋，我地上房hea左一陣，之後又再去露天風呂浸多次，夜晚個風呂無咁多人，浸得好舒服呀~~

浸完出黎見有幾部自助式電動腳底按摩機，咪入錢試下囉，不過D力道好鬼勁，按左無耐我已經頂唔順，反而我老爺就覺得好正，我諗係因為我身體D機能真係唔多妥所致...>_<

之後我地又走左去酒店個小型賭場玩左一陣，然後就返房瞓教，而呢一日算係幾悠閒嘅行程就結束啦~~

----> Day 3 (Part 1 白樺湖黃金之森)