2008年10月東京長野川越6日 - Day 3 (Part 2 輕井澤雲場池)

10月3日   星期五

由白樺湖乘巴士往佐久平需要約一個半鐘頭，車費1500 yen 一個人。沿路都係一D較鄉村嘅地方，無咩好睇，我地瞓下醒下，搭左個幾鐘吘到悶晒。13:20去到佐久平站，然後要轉新幹線去輕井澤，之前響網上check左時刻表知道13:26有一班車，下一班要到14:09先有車，所以落左巴士後我地即刻飛奔過去JR站，買票後再衝去月台，好彩趕得切仲有D時間淨，架車都未到呀....不過呢程車因為係新幹線好鬼貴，要成1200yen~~

去到輕井澤都係14:18，我地響觀光案內所兜左個圈攞左D資料，再搵個locker放低D行李，然後就去搵野食喇。我地響車站北口出，行左無耐就見到旅遊書介紹嘅高美亭，呢間食店係食蕎麥麵，入到去都見到有兩個香港人響度食緊~       

我order左個雜錦天婦羅冷麵，1500 yen~

呢個係老爺點嘅蝦天婦羅拉麵，1100 yen~

食完就起程去雲場池喇。我地沿住輕井澤本通向住舊輕井澤方向行，一路上遊人唔係太多，行得都幾舒服~

道路旁嘅長櫈有輕井澤市地圖，教埋你點行~~

唔係遊客都唔會影嘅渠蓋~~

轉左入小路後係一條林蔭大道，兩旁種滿晒樹~~

條小路望落去好似好幽靜，原來有人住架，間唔中會見到有D一、兩層高嘅小樓房，仲有郵筒添~~                  

行左大約20分鐘就行到去雲場池喇~

雲場池又叫天鵝池，不過我地一隻天鵝都唔見喎，只見好多水鴨響度游水。D池水都幾碧綠，但紅葉唔係太多，間唔中先見到一、兩棵咋，所以一見到紅色我地就唔放過，搏晒命影相~~ 

我地沿住個池一路行一路影下相，呢個景點都幾靚，環境好幽靜，不過如果D楓葉全變紅嘅話就應該會更靚囉....

離開雲場池，我地就行返去JR站，因為明天要去白糸之潼，所以去到車站就順手check下個巴士站位置先~~

然後就出發去車站隔離果個Prince Outlet，開始我地嘅血拚之旅！今日D時間都控制得幾好，去到outlet都未夠四點，有成三個鐘逛呀~~~

輕井澤呢個outlet都好大，仲分開左兩邊。我地嘅收獲都OK，老爺響Taylor Made同Nike磨左好耐，而我就當然買左好多無謂野，出血唔少啦，不過最開心係響Coach買左兩個袋呀...

掃晒貨後我地四隻腳真係勁攰，於是就響outlet入面果條味之街食晚飯喇，我地揀左間叫光州苑，係食韓國燒烤肉。我地order左兩款豚肉、一個和牛，又叫左個石頭窩飯，埋單5950 yen，不過掛住食完全唔記得影相或video cam...

食飽後都未夠八點，其實車站附近都算係較旺嘅地方，但周圍都靜英英，咁我地就返去車站搵返個locker攞返D行李，然後打的去今晚入住嘅酒店 --> Longing House....呢間酒店其實響雲場池再過D，打的都係1000 yen 啫~~

輕井澤真係一處渡假嘅地方，八點鐘之嘛D人大抵已經返晒屋企，我地架的士所行之處都無咩人，又無咩街燈....最攪野係去到酒店我地竟然搵唔倒個reception lobby，因為入到去只係見到有一張疑似reception嘅枱同兩張櫈，但係就無人響度囉....我地見枱面有個鐘咪按下佢睇有無人出現啦，等左一陣總算有位姐姐出黎，佢D英文都OK喎，咁我地就話book左房想check in，佢就帶左我地入去一間類似起居室嘅廳堂入面，又俾左兩杯香草茶招呼我地先再同我地check in~~

呢間酒店真係好英式，據講係仿照沙士比亞故鄉而建，全間酒店只得17間房咋，check in 果個大廳樓底都幾高，幾有氣派，有盞水晶吊燈同埋好似古董枱櫈嘅傢俬。我地入住果間房都幾大，不過雖然唔係日式房間，但係都唔準著住鞋響房內行...呢間野真係好有英式古老大屋feel，燈光好暗，D窗簾好厚架，推開個窗淨係聽到好大風吹落D樹度，但係就咩都見唔倒，夜晚都幾得人驚....

放低D野我地就出去想話行下間酒店，不過外面漆黑一片，搵個人見下都無，連頭先果個姐姐仔都唔知去左邊，講真個感覺都幾陰森，行左個圈就返番入房，見電視做緊Smap咪好悠閒咁睇左陣囉，無咩好做，之後就沖涼瞓教喇.....

---> Day 4 (Part 1 輕井澤白糸之潼)