2008年10月東京長野川越6日 - Day 3 (Part 1 白樺湖黃金之森)

10月3日   星期五

今日係第三日。原本諗住晨早起身睇日出同浸溫泉，不過實在唔願醒，攪到七點幾先肯起身。八點零落去食早餐，D野食都係一般啦~~

朝早餐廳窗外嘅景色~

今早嘅行程比較輕鬆，食完早餐返房攤抖左一陣就去浸溫泉喇。因為去輕井澤嘅巴士一日先得兩班，要到中午12點先有車，我地酒店個package係免費extend 到12:00 先check out，所以可以慢慢浸完溫泉先再上房執野。之後我地就去逛酒店附近果個黃金之森花園，入場費1000yen，係酒店package包埋架~~

要坐吊車上去架~~

所謂黃金之森，即係黃金相思樹之森，係指成個花園種滿晒黃金相思樹同埋其他唔同種類嘅花。最佳觀賞時節係五月中至九月，呢段時間成個花園D樹都會金光璀璨，不過我地又係黎得唔係時候，唔係好多樹係金黃色.... (次次都係咁，我老爺話我次次去D咩花園之類都總係唔啱時候，第一次去富良野係五月，乜野花都未開，又有一次去神戶果個布引香草花園係冬天，明知D花謝晒我係都要去....其實我都唔想咁架，D時間有時候真係好難夾....)

有個人造小型瀑布~

吊車下面本來應該種左好多唔同種類嘅花，而家大部份都謝晒....

上到去上面只係一大片草地，無咩特別，不過可以望見整個白樺湖~~

白樺樹呀~~

影左一陣相後，無咩好睇又無咩好做，咁我地就走喇，好在唔使俾入場費，如果唔係真係唔抵.....要離開可以揀搭返吊車走，但我地就沿住條小石級行落山，行左無耐，忽然見到有個小路入口，行入去發覺原來種左好多黃金相思樹呀，D陽光打落去黃葉度都真係幾有黃金feel~~        

寥寥可數嘅鬱金香~

行完個黃金之森都未夠11:00，仲有成個鐘先夠鐘搭巴士，百無聊賴，我地唯有又走去Plaza 21逛下囉，有巨峰提子雪糕賣~~

食完就去湖邊行左一陣，咁悠閒嘅行程對於我地黎講真係好少見....之後就行返去酒店check out，然後就去Plaza 21後面嘅巴士站等巴士去佐久平再轉新幹線去輕井澤喇~~

----> Day 3 (Part 2 輕井澤雲場池)