PIGGYBREAD: 2010年2月日本中部北陸9日

2月19日 - DAY 1 (PART 1)

籌備左幾個月，今年呢個中部北陸之旅終於成行......繼早兩年嘅北海道，同埋舊年嘅東北，我地都希望每年嘅冬天可以去日本睇下雪浸下溫泉，今次呢個trip，我地就揀左期待已久嘅世界文化遺產白川鄉........其實中部北陸好大，我地今次嘅主力係岐阜縣同石川縣，周邊嘅愛知縣同富山縣就叫做停過下咁啦~~

自遊行，當然一早買定D旅遊書逐本逐本鋤啦.........

以往去日本，我地都係搭火車同巴士，因為日本嘅交通網絡好完善，所以只要事前響網上check定晒D班次買定JR pass 就可以輕鬆出發.......但係自從舊年夏天我地響北海道試過自駕遊後，又發覺好正喎，揸住架車呢度去嗰度去，完全唔駛受火車巴士班次嘅限制，真正係自由自在享受人生樂趣呀!! 所以今次一開始我地又打算自駕

.......但問題係我地未試過雪地自駕，於是有人就成日響度猶疑，打唔定主意係自駕好定搭JR好

.......正因為呢個人係負責揸車嗰位人兄，佢一日唔做決定，我呢個執行人就一日都唔能夠做schedule

，因為自駕嘅路線可以偏遠D，我份人又貪心總係想去多D地方，於是拖下拖下攪到距離出發日唔夠兩星期先真係立定心意決定自駕~~

幾經辛苦，終於響出發前一日攪掂個行程表，一共62頁紙!! 睇住呢份嘔心瀝血口嘅精華，未出發都真係已經好有滿足感啦~~~~

之前都提過下，我地今個trip唔係咁順利，成日都好似好多阻滯咁，D阻滯響未出發就已經開始

......出發前係農曆假期，本來正好可以有D時間他他條條咁執下野同趕埋個行程，點知有人唔生性偏偏響過年期間開始作感冒

......大佬，平時就好閒，遇啱就快去外地玩，都咪話唔愁

.........

條友休息左兩日無好轉不特止仲開始發燒添，你知啦，過年時節D有錢醫生全部放晒假，唯有去睇急症食住D藥希望吽到出發已經好返.......點知真係唔得佢死，到左出發嗰朝條茂利都仲未退燒，攪到我成日都無心機做野好擔心條友去到日本發住燒唔入得境........出發日響公司做到六點D野都未攪掂，話時話公司D廢柴都唔知係咪有心整蠱

，係都要響最後一日先攞晒D野出黎希望你攪埋佢，我當然話之你，有D野拖得就拖，等得就等，唔理咁多攪到last minute都要閃人

......好消息係返到去屋企老爺已經好番D暫時退左燒啦!!

Funny, Good, Happy, Emotion, Excited, Excite, Silly, Excitement, Hurray, Encouragement, Applause, Groovy, Fun, Great, Awesome, Teriffic, Good Job, Nice Job, Well Done, Best, Encouragement, Fan, Cheering, Success, Fantastic, Cheer

講左個前奏咁耐，係時候要正式開始講個trip喇~~~

Yeah Yeah Yeah!!! 我地終於出發啦)))))))

今次我地又係揀搭凌晨機出發先去羽田再轉機........趁仲行得走得，捱捱眼瞓唔緊要啦，慳番多D時間嘛，第時老左想捱都頂唔住有心無力啦~~

我地會搭1:00機，去到機場都係十點鬆D，ANA個counter仲未開，不過已經有人開始排隊，我地呢D咁怕蝕底嘅人當然都拿拿聲跟住排啦.....等左一陣D地勤就出黎預備，不過我覺得佢地好似未瞓醒咁，懶懶行，手腳好慢，比較起黎好似JAL好D喎~~

攪掂check in，就周圍逛下......都係行下D duty free shop咁囉，當然必入嘅係Godiva 朱古力，響途中做小食最正!!

差唔多十二點，D shop都close得七七八八，響Starbucks 買左D咖啡同cake，買埋本忽然一周就去閘口食住等上機

......咁啱嘅，呢期忽周介紹飛驒牛呀，橫掂齋等，趁無咩做就做定功課先~~

雖然好無聊，但每次都要影........

上機無耐就派餐.....食完就大教瞓喇.........

5:45去到羽田機場，響國際航廈check out後，攞返D行李，跟住就搭無料shuttle bus去Terminal 2，跟手我地會轉機去金沢嘅小松空港，之前響香港check in時ANA已經出定埋由羽田去金沢嘅boarding pass，所以響Terminal 2 只係需要做行李寄艙.........

好快攪掂埋行李寄艙，呢個時候都只係六點鬆D咋，8:40機，仲有大把時間，首先去toilet執返掂D眼耳口鼻先........

之後就逛下Terminal 2 個 Market Place，不過全部都只係賣野食，太早其他D shops都未開~~

逛左一陣都無咩好行，於是就過關行去閘口........

去到閘口只係七點鬆D，都未見到我地班機有打出黎，仲係對上嗰班機做緊登機咋.......

無無聊聊坐左個幾鐘，終於可以登機......呢D內陸機好自助形式，自己將個boarding pass響入口拍一下就會出張搭乘券俾你就得嫁喇~~

最初以為去金沢係比較偏僻嘅地方會無咩人，點知成班機好full，好多著住西裝嘅行政人員都係搭呢班機嫁........只係一個鐘頭機，飲杯野睇下雜誌D時間都過得好快........差唔多到喇，望落地面一地都係雪呀!!

落左機老爺去等行李，我就去toilet方便下先.......入去時成條行李輸送帶都迫滿人，點知去完出黎唔夠三分鐘已經無晒人，只係淨番老爺一個人加我地兩件行李.......於是拿拿聲走人去買巴士飛出金沢..........

由小松空港去石川縣其他地方，基本上都係搭北陸鐵道..........開去金沢嘅巴士有兩種，一種係超級特快，途中只係停一個站，另外一種就會途經金沢市內，兩條線嘅總站都係響JR金沢站西口........我地響金沢住嘅酒店係響JR金沢站旁邊，所以當然揀搭超級特快啦.......之前響香港已經上網check 定巴士時間表......不過其實係無時間表嫁，因為佢話巴士開出時間係響航機到達後十至十五分鐘........好趕呀!!