PIGGYBREAD: 2010年2月日本中部北陸九日

返來啦!!!!!!

一眨眼九日嘅假期"zip"一聲就過左去，一年一度嘅「大旅行」又完結啦!! 今次呢個trip都可以話算係完滿結束嘅，同往常一樣，九日嘅旅程，當中有開心嘅時候，亦有愁爆嘅時候，當然更加唔少得嘅係兩人互片嘅時候啦

，只不過今次開片嘅頻率比往常較頻密咁解啫

........

雖然話完滿結束，查實成個trip都甚多阻滯，雖未至於叫多災多難，但就好唔smooth囉

.......首先有人響過年期間已經開始感冒，臨出發嗰朝仲開始發燒，攪到我一路擔心響日本唔能夠入境

.......結果境係入左啦，但最後都要響日本試我地嘅第一次，就係兩條友盲中中走去睇日本醫生!!

.......黑仔事件不斷發生，之後又成日俾個GPS老點，尤其自駕頭兩日，幾乎想打爆個GPS!!

個sensor慢到無輪，出路口D指示又唔清晰，真係媽媽聲

......去過白川鄉嘅朋友都知道，無論自駕或搭巴士，入口處係必須要經過一條隧道......唉.....呢條隧道，總計穿過或者擦身而過，我地一共經過過五次!!!........雖然白川鄉真係好靚，亦係我地今次旅程嘅重點，但都唔駛去咁多次掛

......唔知點解，白川鄉呢三個字對我地黎講，就十足一個魔咒咁，個GPS係都要點我地去完一次又一次，到最後我地直情要向上天祈求呢個trip唔好再俾我地見到白川鄉...........

另外一樣唔知點解嘅野，就係每次旅行我地兩個脾氣火爆嘅人都總會吵大鑊

，講真，每次我都覺得理虧嗰個係對方，但事過竟遷後又會覺得後悔，實在唔應該嘥左D時間黎唔開心囉，尤其今次老爺唔舒服，又要花精神日日揸車，我呢個小人仲要成日為D小事向佢發脾氣 (不過事實的確係事實，有時佢真係好鬼乞人憎嫁!!

)，而家諗返就真係覺得自己好任性，不過孔子都話唯小人與女子難養也，咁我咁啱既係一個小人又係一個女人，真係無計.......響呢度唯有同老爺講句gomennasai啦，但其實我都知道佢唔會怪我嘅，所以我仍然會堅守一向嘅座右銘︰勇於認錯，堅決不改!!!

今次嘅旅程，車程相當長，最南去到愛知縣嘅名古屋，最北遠至石川縣能登珠州......九日嘅行程，我地經歷過雪山上最冷嘅-8度，亦響名古屋20度氣溫下熱到飛起!! 日本D天氣真係變化莫測，直情難觸摸過本小姐D情緒，我地嚐遍狗屎一般嘅風雨，亦享受過風和日麗嘅藍天白雲，最慶幸嘅係都叫做欣賞到漫天飄雪嘅良辰美景，好嘅同唔好嘅都叫做受過，不過世事又點能夠盡如人意呢，其實只要樂在其中，處處都可以係樂土，過後回想仍然係美好難忘嘅回憶.......儘管車程唔係咁暢順有D地方無去到，但今次住嘅酒店同溫泉旅館都令我地好滿意，最期待嗰間此生暫時住過最昂貴嘅旅館甚至有驚喜俾我地添，呢D都留待以後再慢慢同大家分享~~