鄉下婆又出城啦!!

Hello hello!! 我同老爺一年一度嘅「大旅行」又玩完返來啦!! 先來一張靚靚嘅湖景回味下先~ 



繼去年衝出亞洲去左巴黎同倫敦之後，今年我地又再踏足歐洲，去左德國十日呀......早響半年前我地已經決定今年個大旅行改響復活節假先去，本來一心諗住去九州睇櫻花，因為上次去福岡整親隻腳好多地方都無去，實在覺得意猶未盡，好想再去多次，不過後來我地又換左免費機票十月去北海道，老爺就話不如復活節唔好去日本，當然日本仍然係我地嘅至愛啦，不過佢話一年最多去兩次日本已經好夠，世界咁大，仲有好多地方我地未去囉，趁仲行得走得應該出去外面見識下，咁我都覺得佢講得有道理嘅，其實只要有得去玩我邊度都OK 嫁.......於是我地就揀左德國嘞，其實舊年去英法時老爺已經想去德國，不過俾我ban 左，響我印象中總係覺得德國無乜好玩，或者係因為希特勒嘅關係啦，硬係認為德國人好cool 咁，不過去完返黎個印象完全改晒啦，德國d 風景真係好靚，d 人又隨和，尤其係南方嘅Bavaria，d 人真係好nice，響條街行行下d 人都會同你say hello，我諗一個地方如果能夠俾到人有warm 嘅感覺就係一處好嘅旅遊地點........再加上細妹舊年又去完德國返來讚口不絕，所以最後我地就拍板去德國啦!!

(題外話︰好煩嘅細妹不斷要我響blog 多謝佢地推介我地去德國，雖然我唔知點解要多謝佢地，因為even 我響嗰邊whatsapp 問佢機場退稅d 野佢一d 都幫唔到我囉，不過如果講聲多謝佢兩條友仔會開心d 嘅話咁我響度講句thank you 啦)

雖然一向去日本玩慣自遊行，舊年都叫做盲中中睇地圖去過巴黎同倫敦，不過德國對於我地黎講始終都係一個陌生嘅國度，最初做planning 時真係一頭霧水無從入手，市面上關於德國嘅旅遊書又唔多，唯有上網不斷搵料啦........Planning 第一步當然係book 機票，舊年十一月咁啱見Lufthansa 做promotion，$3104 來回Frankfurt，計埋稅都係$7404一位，O 喎，於是拿拿林booking.......之後就又死性不改 hea 住plan 路線，期間又做planning 去左兩次日本，終於距離出發個多月先的起心肝去搞，好在德國係一個好先進嘅國家，交通好發達，尤其佢個國鐵網真係超讚，成個德國所有交通工具包括火車地鐵巴士電車等嘅資料班次都check 得到，對於自遊人士planning 真係好方便......至於酒店方面，我地仍然係先響Tripadvisor check 下做比較先再做booking，由於三月尾都仲未係德國嘅旅遊旺季，所以d 酒店去到好後期我地都仲改緊.......同往時一樣，超lazy 嘅我都總係去到last minute 個trip 都先叫做勉強搞掂，今次都唔例外，臨出發嗰幾日都仲改緊個行程同埋定到買幾多日嘅火車証，忽然又聽到德國有大風雪，連Frankfurt 個機場都要closed，真係屋漏偏逢連夜雨!! 都三月下旬啦，仲要落大雪，想玩我咩，有d 地方好似國王湖咁如果落大雪d 船會停航喎......都無辦法，終於到出發日鄉下婆鄉下佬兩個大鄉里攞住件羽絨就膽粗粗出發啦~~

十日行程好快就過左去，明明仲係day 1 響科隆好happy 咁shopping 緊嘛，點解一眨眼就玩完十日嫁，好唔捨得走呀!!.........今次個trip 都算順利，d 景點大部份都叫做去到，係響Munich 返Frankfurt 嗰程ICE 出左d 驚險事，但總括來講都好順利......不過成個trip 嘅天氣都唔好，每日都陰天，第三日仲開始落雪，有幾日仲要係好大雪嗰隻添，本來我好鍾意睇雪，而且都有兩年無見過雪，不過都唔好日日落好嗎，又凍天色又差搞到d 景色完全灰濛濛，影出黎嘅相都唔算靚囉

今次去德國飲左好多啤酒，德國人真係好鍾意飲啤酒，無論係正餐定tea time，個個一坐低都整杯啤酒歎下先.......德國啤酒真係好好飲，唔怪得咁出名，大部份都好易入口，唔會有苦澀味，好正!!


去德國唔駛講一定要食豬手啦......德國d 豬手真係好大隻，通常會有一大堆酸菜或potato 伴食，份量好勁，我無一次係食得晒，不過食多兩次已經開始覺得膩

當然仲有德國腸.......德國香腸有好多種，款款都好好味，不過都係嗰句，食到後期真係開始厭，尤其朝朝早餐都係嗰d 一片片嘅ham，初初就話貪得意學人夾芝士一齊食，後期真係見到都想喊，好懷念茶餐廳嗰碗餐蛋丁面囉!!

今次去左十日，德國咁大區區十日當然玩唔晒，我地基本上只係玩左南德嗰邊某幾個著名景點......詳細遊記當然唔知幾時先寫到，趁剛去完返來仲興致勃勃即刻打番個大綱先

Day 1 夜機飛第二朝早五點幾去到Frankfurt，響酒店check in 完就即刻坐ICE 去科隆.......科隆最著名當然係科隆大教堂啦，隔住一條萊茵河望過去依然好宏偉呀!!

大教堂入面嘅彩繪玻璃，好靚呀!!

夜晚返到Frankfurt，響美茵河影下個夜景先......不過始終無塞納河咁靚咁燈光璀璨囉~

Day 2 開始南下，朝早首先去羅曼蒂克大道嘅起點Wurzburg 逛下.......世界遺產主教宮，內裡有全世界最大嘅天花板濕壁畫......不過我覺得其實都只係一般啫


響山丘上嘅瑪麗恩堡要塞係Wurzburg 著名嘅景點，不過我地唔夠時間無上山，只係響舊緬因橋影下相算.......天色陰陰沉沉，d 相影出黎都唔靚

中午離開 Wurzburg，轉左兩程車先去到呢個行程中我最鍾意嘅小鎮Rothenburg ob der Tauber.......

去Rothenburg 就好似穿越左時空返左中世紀咁，呢度仍然保留住中世紀嘅城牆，古樸嘅木造屋，d 外形真係好童話feel......




呢晚入住已經有700年以上歷史嘅Romantik Hotel~

雖然有成700年歷史，但房間嘅裝修同設備都好齊全同四正.......Check in 時仲有三間房俾我地實地觀察慢慢揀選，我地最終揀左下面呢間，因為老爺一見呢張古老feel 嘅大床就話鍾意啦

白雪飄飄下，漫步於古城老街，別有一番風情

 

Day 3 離開 Rothenburg 去到Bavaria 首府慕尼黑，一到埗即刻衝去Concentration Camp......

偌大嘅集中營，展現左當年納粹帝國嘅瘋狂遺跡，好欣賞德國人肯忠於歷史嘅態度，雖然我地好鍾意日本嘅文化同風景，但相比下真係要對德國人講句

Day 4 去朝拜老爺嘅至愛BMW World......


老爺此刻嘅dream car........不過因為我掛住走去睇其他野搞到佢最後無得試坐，成朝俾佢怨左好耐

下午離開慕尼黑，山長水遠走到去近奧地利邊境嘅Berchtesgaden，一個寧靜而風景優美嘅小鎮~

好喜歡我地呢間Romantic Suite......個名唔係我老作嫁，book 房時佢個room type 真係叫 romantic suite，我諗係因為佢地響床上放左兩枝玫瑰所以叫romantic 掛


我地呢個suite 並唔係咩豪華套房，同我地響日本一向住開嘅溫泉旅館當然無得比 (of course room rate 都無得比啦)，不過我鍾意佢整體設計好warm，bedroom 同living room 分隔開，有個小小嘅陽台可以望到對山嘅風景，仲有就係除左獨立shower 另有個jacuzzi，dinner 完之後返去浸一浸，好relax 呀!!

 

Day 5 我地終於去到呢個trip 我最期待嘅景點，國王湖!! Wow, 呢度嘅景色真係超讚呀!!!

好似去左一個仙境咁.......d 景真係靚到不得了!!

雖然當日唔算好天氣，無一直祈求嘅藍天白雲，不過總算無落雪，間唔中都有dd 陽光響雲層透出，我地已經好感慁~


如果夏天到訪，天氣清朗，相信d 景會仲正

靚到我唔想走呀!!

響國王湖渡過左好悠閒嘅一日，我地仲要high tea 埋先走，一邊食住雪糕一邊望住靚靚嘅湖景，好開心喔

Day 6 又轉去另一個重點，新天鵝堡........

Disneyland 公主堡壘嘅藍本......我地好好彩呢一日都無點落雪，由瑪利恩橋望過去個全景都睇得好清楚......細妹同有個同事舊年去因為大霧係完全睇唔到嫁

新舊天鵝堡附近嘅Alpsee.....天鵝湖，點解一隻天鵝都無嘅?

傍晚入住Fussen 附近嘅Hopfensee 其中一間面向湖景嘅酒店，下面呢個view 係響房間個balcony 望出去嫁，天氣唔好灰濛濛不過個湖好平靜，見到個倒影已經好滿足，好似水墨畫咁呀.......第二朝起身再見唔倒呢個view lu

響酒店 check in 完當然拿拿聲走去湖畔逛下.......雖然天陰，睇唔到傳說中瑰麗嘅日落景，但漫步湖邊，白雪蓋地，湖水平靜如鏡，身處其中仍然有住一絲詩情畫意嘅感覺

之後仲落埋雨，不過現場睇個湖景都真係好靚!

Day 7 朝早告別美麗嘅Hopfensee，先去Fussen 市逛一下，不過是日假期，乜shops 都無開

中午返到去慕尼黑，晏d 我地就要離開Bavaria 返去Frankfurt，天氣竟然好起來，終於可以響瑪莉恩廣場影到清晰嘅新市政廳啦......藍藍嘅天，有太陽呢，係今個trip 第一次見到猛猛嘅陽光! 不過可惜我地要離開

走之前先去皇宮參觀下先.......呢個皇宮好金碧輝煌，有d 拍得住凡爾賽宮

遊完皇宮就要搭ICE 返Frankfurt........好唔捨得呀!!

Day 8 我地去左有大學城之稱嘅海德堡，不過陰天跟住我地走，一整日都暗暗沉沉，旅程已經接近尾聲，天色都未點靚過，面對古堡古城都無晒心機影相......

兩隻bears 好down 呀，因為過一日就要返香港啦

Day 9 last day!! 呢一日全日響Frankfurt city sightseeing，本來最啱我呢個shopaholic 出血，不過是日Easter holiday 兼Sunday，所有shops 都closed，連食店有d 都無開，成個死城咁，離晒大譜!!!

Frankfurt 其實係一個無乜趣味嘅地方，成個city 大概只有羅馬廣場比較有d 特色~

響Frankfurt 好無聊咁逛左大半日，我地就決定早d 去機場，雖然係假期，但斷估機場d shops 唔會close 掛.......我要SHOPPING 呀!! 好在Frankfurt 個機場無令我地失望，真係超多shops 逛呀!! 順帶一提，就算過左custom，機場入面仲有勁多shops 嫁!!!


Well, 十日旅程咁就過左去，寫到呢度都係時候去到重點，就係post 返晒我今個trip 嘅戰利品......其實今次買嘅野唔算多，好多都只係食物，因為超市d 野真係好平，反而其他d 精品呀手袋呀我都好忍手唔捨得買，而且今個trip 遇著有幾日係假期，d shops 全部無開，想大出血都無辦法，再加上臨出發前有人好無聊，竟然靜俏俏走去買左個行李磅(!)，幾乎日日keep 住check 我行李嘅重量，佢話經過舊年響巴黎嘅恐怖經歷，歐洲對行李嘅規管好嚴，實在唔可能唔監管住限制我喎!!!


所以今個trip 嘅戰利品真係唔多，不過幾小野都好都要另開一篇post 以示一個購物狂對shopping 嘅尊重嘅.......

(待續......下一篇「鄉下婆德遊之戰利品篇」)