2012年2月巴黎倫敦11日 - Lunch @ KONG

12 FEVRIER 2012 (DAY 2 - PART 3)


逛完古監獄同聖禮拜堂，望下錶已經一點半，係時候去食lunch.......離開西堤島，我地沿住交易橋 (Pont au Change) 行過去右岸........


所謂右岸，即係指塞納河北岸，而左岸就係另一邊嘅南岸~


欣賞下塞納河先.......因為塞納河貫穿巴黎嘅中央地帶，為左連接兩岸，跨越塞納河嘅橋樑有成三十幾座，每一座都各有特色........下面呢個就係由我地身處嘅交易橋影過去嘅新橋 (Pont Neuf)~


左邊嘅building 就係剛才去過嘅古監獄~


一過左橋就見到夏特雷廣場 (Place du Chatelet) 中央豎立嘅圓柱，頂端嘅金色雕像好顯眼，底下係仿埃及人面獅身像嘅噴泉台，據講又係為左紀念拿破崙某個戰爭勝利而建~


旁邊係城市劇院 (Theatre de la Ville)~


我地沿住塞納河慢慢逛，好寫意~


呢度景色好優美




 沿途有好多舊書攤.........


據講呢度嘅舊書攤唔係日日開檔，天氣唔好唔開，心情唔好亦唔開，好鬼有個性



行到去新橋嘞，呢條橋一d 都唔新，建於1607年，係塞納河上最古老嘅橋........


橋上每一個頭像雕塑嘅表情都唔同嫁!


由新橋上遠遠就望到呢座building，最上層嘅玻璃圓頂就係我地嘅目的地.......


忽然間見到旁邊有座LV! 個心即刻跳左出黎，以為可以乘機shopping，點知原來係office 唔係門市


我地想要去lunch 嘅餐廳，KONG......


呢間餐廳最大嘅selling point 係佢嘅interior design，最吸引人嘅一定係頂層嘅天幕型玻璃頂，係法國名設計師Philippe Starck 嘅傑作，呢位先生係乜水或者未必個個知，不過佢響香港都有知名作品嫁，半島嗰間Felix 咪出自佢手筆囉......據講呢度一開業就已經成為巴黎潮人最愛浦嘅餐廳之一，連 Sex & The City 有一集亦講到 Carrie 響呢間餐廳遇見佢男友嘅ex-wife.......反正我地呢日響附近觀光，就一於走黎朝下聖啦~

Building 嘅 lobby 已經好有型.......


KONG 除左係出自Philippe Starck 之手，仲有一位日籍設計師，所以處處都好有日式風格~

餐廳響五樓.......上到去 receptionist 話我地無做reservation 而家full 晒不過等一陣應該有位，咁就等下啦，一心走到黎都係想見識下名設計師嘅design........


餐廳有兩層，下層係酒吧，lunch 時間無開......可以想像到左夜晚呢度聚滿晒人個個響度飲酒聊天好熱鬧嘅場面~


呢度有好多日本漫畫......忽然好有親切感




等左一陣就叫我地上樓上，呢條迴旋形樓梯嘅colour 好鬼sharp!


一上到去就見到成個天幕型嘅玻璃頂層，感覺好光猛好開揚........


Ceiling 中間係一張長長嘅日本藝伎畫~


Waitress 安排我地坐window seat，正!


仲可以望到 LV 大樓


雖然係出名嘅大師級作品，但呢度個氣氛好causal 好熱鬧，唔會俾人好high class 嘅感覺，d 食客亦唔見得個個都係潮人 (至少我地兩條茂利唔係)，個個響度高談闊論，我覺得有d 嘈添


 成間餐廳基本上以透視設計，除左四面係落地玻璃大窗，凳同位與位之間嘅partition 都係透明設計，上面印有唔同臉孔，幾型格........








連waitress 都好有型~~


睇下有乜食先........


既然係潮人集中地，裝潢又係大師級設計，d 食物真係一d 都唔平.......


水，當然無free water......要左枝sparkling water，7e! 飲枝水都要七十幾蚊，你話響香港食野幾幸福


一不做二不休，索性整多枝可樂，行到攰一攰，真係好想飲


麵包係free，唔夠可以再要~



 　
先上starter，我地order 嘅 fresh foie gras terrine & toast.......好大片呢，好在兩個人share，真係超標死!!




老爺嘅main dish, pan fried tuna steak with red curry sauce & mashed potatoes......個薯蓉面頭層油好heavy 呢

而我就要 roasted duck breast with berry of sichuan, ok 唔錯~


仲有個白飯，加左d 唔知咩鹽，都幾好味

一邊食一邊欣賞外面優美嘅風景~


天幕形ceiling 可以飽覽180度景色

 

如果坐正最盡頭中間呢張枱甚至可以遠眺塞納河同新橋.......想像一下日落時份，同你在乎嘅人坐響度一邊食住鵝肝飲紅酒一邊講埋d 無謂野，你話幾型




食到咁上下，waitress 又走黎問要咩甜品同餐後酒，唔係掛，仲要?! 好飽呢.......望下旁邊周圍d 人，原來真係個個都響度食緊甜品，都三點啦，巴黎d 人真係好hea，仲要個個拎住隻酒杯，飲到wing 下 wing 下，真係唔駛做??........我地仲要趕下場，埋單走人......

Toilet 都型格過人.......不過響 toilet 無啦啦棟左個好似雙撲手嘅肥仔響度，個感覺怪怪咁囉


呢個lunch 好貴呢......不過學人做下潮人，感受一下巴黎嘅時尚，無所謂啦


下一站，我地打算去我至愛嘅美術館 Museum d'Orsay，不過食到飽一飽，我地決定沿住塞納河漫步浪漫一下~

(...待續)