Dinner @ Hip Sushi

平時我地如果去開新城市廣場，如果唔係太多人要等好耐，好多時都會揀去Hip Sushi，因為價錢都算合理，同埋D野都幾OK~

呢個火焰三文魚腩係每次都必叫嫁，因為我好鍾意經過火焰處理過嘅三文魚味，不過就好似愈來愈薄片.....

老爺好鍾意食嘅腐皮壽司，佢老人家嘅獨食，因為我對於腐皮麻麻地，不過都只係$9啫，咪由得佢囉~

又係必叫嘅手卷，我嘅蔥粒吞拿魚腩，同老爺嘅三文魚脆，D紫菜好新鮮，隔左一陣依然好脆~

超抵食嘅三文魚壽司，$9兩件! 三文魚腩就貴DD，都係$15咋，至於好唔好味.....一般啦，咁嘅價錢想點呢~~

劍魚、油甘魚同池魚....

記得好耐之前第一次黎幫襯時，就係食過佢呢度嘅劍魚，真係好正，之後次次黎都有叫，不過我地都覺得愈來愈無魚味，D壽司飯又易散，好多食店都係咁，愈做得耐就愈唔能夠維持水準，食壽司除左魚生片要夠新鮮，握壽司飯都好緊要，係基本功嘛，再係咁真係唔再幫襯~

今次叫左幾樣限定野食....藍天使蝦刺身，右邊嗰堆係石螺刺身，蝦幾爽口，螺肉亦唔韌，都算OK~

仲有火焰帶子壽司，襯柚子汁幾好味

呢個三文魚他他就無咩特別....其實點解叫他他呢? 不過$38 真係唔係好抵食~

我好鍾意食嘅脆炸三文魚皮，抵食夾好味~

總括黎講，呢度D野食一般OK，不過開始有每況愈下嘅跡象，同初初開張時真係爭好遠，而且呢度D位好窄，尤其係bar枱，坐得好唔舒服，而且好多個壽司師傅響你面前邊做壽司邊不停講野同傾計，所以可以嘅話都係揀返order枱，不過就算order枱都係set得好窄，完全聽到隔離枱嘅談話內容，好似搭枱咁，枱面又細，即使想幫你豪食都唔得啦!!

Father's Day Dinner @ 小南國

今年嘅父親節，我地揀左去Mega Box 嘅小南國，因為兩老平時好小食上海菜，所以試下睇下佢地鍾唔鍾意~

人小小，細佬一家缺席，加上兩老自己逛街逛左一日話已經食左四餐，話一D都唔肚餓，所以只係叫左幾道菜.....

灌湯生煎包 (相入面嗰兩隻咁畸怪嘅手指唔係我係細妹嫁)，叫得灌湯果然幾多汁，食之前我已經叫住老豆要睇住熱，但佢恃住一向食得熱野，所以一口就大啖咬落去，果然辣親，唔駛講又俾老媽子怒啤 + 勁哦......

細妹一定要叫嘅外婆紅燒肉，雖然肥左D，但係一D都唔膩，腩肉蚊得好腍好入味，汁又甜，真係好好味，連汁都唔放過用黎送飯好正.....

上海炒年糕，比較膩，老豆勁唔鍾意，話無味又軟腍腍.....

呢個叫全家福，即係什錦砂鍋，真係超超超大鍋!!!  D料好健康，一窩只係$158，平時食個雜菜煲都要六、七十蚊啦，抵食! 每人足食兩碗仲淨好大鍋~

另外本來想叫兩條小黃魚，不過個waiter提議我地話一條都要$25，不如試下松子桂魚，用HK Bank card 有半價，我地諗左一陣就落order叫松子桂魚，但係竟然漏單.....好彩漏單，因為個什錦砂鍋都已經食唔晒，如果條魚黎埋真係要原條打包~~

之前試過同老爺黎食過，平時無咩人，覺得招呼好周到，唔知係咪呢日比較多人，所以唔覺有咩貼心嘅service，不過服務亦唔算差，一般OK啦，我地坐左好耐都無表示要催我地走，埋單唔駛五舊，整體質數唔錯囉~~

2009年2月日本東北8日溫泉之旅 - Day 6 (Part 3 無啦啦去天童食個午飯)

2月19日   星期四   (銀山溫泉 > 最上川 > 天童 > 葉山溫泉)

上回講到坐雪見舟去到終點站草薙溫泉港，之後我地就要搭巴士去JR高屋站，然後再轉陸羽西線返新庄喇~

上左岸就直接去到一個souvenir centre，因為未夠時間搭巴士，周圍又無野行，所以所有人都只有響度逛逛~

Dinner @ SaVoye Bistro

早兩晚去我地去左食法國菜，呢間餐廳嘅位置都幾隱敝，不過因為比較近我返工嘅地區，平時間唔中會經過，所以就去試下.....

餐廳佈置幾有氣氛，講得好聽就好有情調，其實就真係好暗......

我地叫左兩個五道菜嘅tasting set，先黎蒜蓉芝士法包，熱剌剌嫁，好鬆脆，仲有成個蒜頭伴碟，waiter教我地將個蒜頭塗上條法包食，真係好好味~

頭盤係安格斯牛肉薄片伴沙律，唔錯~

雖然話室內裝潢幾有情調，但真係好暗，影左兩張相都唔係幾好意思再用閃光燈，費事影響人地進食啦，之後D相我地就靠個燭光黎補光，名附其實嘅candle night dinner呀~~

跟住係煎鵝肝，鵝肝唔係好夠肥美，未至於入口即溶，但個dressing 就幾好味~

我地將個餐湯改左要龍蝦湯，味好濃，好好味....之前嘅蒜蓉包已經食晒，waiter見湯上又問我地仲要唔要麵包，之後就再拎多兩個軟身麵包黎~

Main course:
我嘅sword fish，未至於好好味，不過都OK....我食左一半又已經好飽.....

老爺原本嗰份係肉眼扒，不過佢加多$150改要澳洲和牛，佢話幾好味~

食飽飽整返杯cappuccino

甜品上得比較耐，因為話係即做即焗.....我嘅法式燉蛋，都幾滑，面頭嗰層焦糖唔會太甜，yummy yummy!!

老爺嘅Ginger Souffle, 呢個梳乎里真係好好味，淡淡嘅姜汁味，老爺俾左啖我食，之後我就唔肯俾返佢~

餐廳樓底好高，吊左古老嘅風扇同小燈泡，好有懷舊feel~

牆邊嘅酒架放滿晒紅酒~

整體嘅食物質數同service真係幾好，D waiter幾殷勤，每上一道菜都有介紹，上主菜時個chef 仲走埋出黎同我地傾左幾句.....呢餐晚餐食左差唔多兩個鐘，氣氛幾好，坐得好舒服，食完好滿足，好想再去，不過唔知仲有無機會，因為成晚計埋我地只係得三張枱，唔知點回本.....

SaVoye Bistro: www.villasavoye.com.hk/menu.html

 

2009年2月日本東北8日溫泉之旅 - Day 6 (Part 2 最上川懷古雪見舟)

2月19日    星期四    (銀山溫泉 > 最上川 > 天童 > 葉山溫泉)

離開古山閣，我地拎住重重嘅行李行去巴士站......

2009年8月北海道親親大自然之旅 - 準備篇

呢牌好忙....但係忙得黎好興奮呀，因為係忙住planning去日本呀~~

已經有一段時間無去北海道，唔知點解成日都好掛住札幌，我諗我真係愈來愈變態.....上兩次去北海道都係冬天，試過冬雪嘅浪漫，總係好想響夏天再去多次北海道，記得好幾年前第一次去北海道係五月，富良野一D花都未開，一直都引以為憾，成日都同老爺講點都要再去一次，或者俾我煩得多，佢終於決定八月再去我地至愛嘅北海道啦~~

同往年一樣，每年去到年中都已經剩返好小假，所以只能夠去六日.....今次嘅主題係"親親大自然"，顧名思義即係以睇大自然景點為主啦，so, 富良野同美瑛係主打!!

近呢兩年去日本，每去一處地方都希望將想去嘅景點玩晒，唔駛下次再重複，因為人生得嗰幾個十年，太小嘅假期，太小嘅金錢，但就太多想去嘅地方，實在唔想話明明已經去到一處地方但唔夠時間今次唔去住留返下次先再去過，世界咁大，仲有好多地方未去過，幾時先得輪返再去過同一地點喎......所以希望今次可以儘量去晒富良野同美瑛嘅景點，另外仲想去埋十勝同帶廣啦，層雲峽都係考慮之列.....唉~都未開始plan已經有咁多地方想去，六日時間點夠呀?????

今次呢個trip比較特別嘅地方，係我地諗住自駕遊，或者對於好多朋友黎講日本自駕遊已經係家常便飯，但係我地從來未試過響日本駕車，所以真係有D緊張，單係做planning已經有D無所適從，不過平時去日本，之前大部份嘅籌備都係本小姐一人負責，老爺好小參與，今次自駕係重點，未開始計劃行程，淨係睇join邊個package佢已經同我一齊研究喇，佢仲要一有時間就上租車網睇定先，佢平時工作好忙，今次真係唔該晒佢呀~~

因為八月中要考一個試，要等個試考完先去得，問題黎喇，八月中打後....富良野仲有無花呢?! 如果無咩花咁去黎做咩先??

仲有好緊要嘅一個問題，今次呢個trip究竟去唔去我摯愛而百去不厭嘅小樽好呢?????