2009年2月日本東北8日溫泉之旅 - Day 6 (Part 3 無啦啦去天童食個午飯)

2月19日   星期四   (銀山溫泉 > 最上川 > 天童 > 葉山溫泉)

上回講到坐雪見舟去到終點站草薙溫泉港，之後我地就要搭巴士去JR高屋站，然後再轉陸羽西線返新庄喇~

上左岸就直接去到一個souvenir centre，因為未夠時間搭巴士，周圍又無野行，所以所有人都只有響度逛逛~

我地見到有呢D類似魚翅嘅野賣，尋晚響古山閣嘅晚餐都有食過~

響souvenir centre買左小小手信，就出去外面行下......

外面係-1度呀~~

去古口同高屋嘅巴士站就響外面，我地會搭12:05班次去高屋站~

就係呢架巴士喇，佢專係行走草薙溫泉港至JR古口站/高屋站，一個鐘一班車，個時間都係夾啱雪見舟嘅航行時間~

車費每位200 yen~

巴士行左五分鐘就到高屋站~

呢個車站又係好細，一眼已經見晒~

通去另一邊月台嗰條樓梯舖滿晒厚厚嘅雪呀~

高屋站嘅四周都只係山同雪地~

候車室入面好細~

呢個站好荒蕪，完全見唔到有車站職員，周圍又無欄杆，我地無無聊聊周圍行，行行下發覺根本唔使經候車室都可以入到去月台.....

響月台等車期間有個男人走黎同我地搭訕，佢話黎過香港幾次，都係公幹性質，對香港嘅印象就只係好先進嘅城市囉....佢問我地點解山長水遠走到黎東北咁鄉下地方，咁我地咪是但答話鍾意睇雪囉，佢就話佢都好鍾意雪，不過居住嘅地方係無咩雪落，然後就講左個地名俾我地聽，大概係九州地方掛，佢好鬼健談，一路無停咁問我地野，攪到架火車黎要上車先停口，臨上車佢仲讚我地係nice couple呀!!

由高屋去新庄大約半個鐘，沿路都係大片雪地~

12:49 返到去新庄，響車站附近行左一陣，周圍靜蠅蠅，之後就去攞返行李再去搭新幹線喇~~

我地搭13:17 班次去天童~

其實當初都無計劃去天童，因為佢最出名係將棋，我地嘅興趣唔係咁大，不過唔去又唔知去邊度好，我地同旅館預約左四點專車響葉山溫泉站等我地，中間呢三個鐘真係踱左好耐都踱唔掂，因為JR D班次好疏，時間好難夾得到....講真搭JR就係有呢樣野麻煩，有時要夾D班次真係夾到頭都暈，尤其係比較偏僻嘅地方，可以係個幾兩個鐘先有一班車!! 如果夾唔啱淨係等車都浪費晒D時間，之前plan響呢一日嘅行程嘅時候真係諗到人都顛，本來都可以早D去葉山溫泉行下，但係又驚個車站無locker放行李，要拎住咁多野行真係好麻煩，所以最後就決定不如順住條行車線去天童行下啦~~

13:53 去到天童站~

諗住先搵locker放低D行李先，點知呢度D locker嘅size唔係好同一般locker嘅size，內籠係無咁深嫁，只可以將個行李袋打棟放，真係頂佢個肺，一個locker只能夠放一個行李袋!! 最後要用兩個locker，咁就無左1000 yen，真攞膽~~

無散銀就去買罐粟米湯同咖啡啦~

響天童只係得一個鐘鬆D嘅時間咋，拿拿聲走出車站周圍搵野食填肚先啦~

不過搵左好耐都搵唔啱，沿路好小食店，基本上只係見到好多醫務所，呢度好多人病咩? 真係行到有D沮喪，於是就行返去車站....

大家睇標題一定以為我地特登走去天童食午餐，一定係食左D咩特別好味嘅野......

Heee...其實最後我地只係是是但但求求其其搵左間食拉麵嘅....

我嘅叉燒正油拉麵，620 yen~

老爺嘅勁辣叉燒拉麵，750 yen~

真攞命，D叉燒好鬼肥嫁!!

兩個拉麵set都有野飲，今日淨係不斷咁搭車，搭到個人都吽吽地，所以我地兩個都係要咖啡~

食飽後都仲有四、五個字嘅時間先夠鐘搭車，於是就響車站外面周圍行下~

個地下有好多唔同嘅圖畫~

響車站地下有個將棋資料館~

好大隻將棋呀~

我地走入去睇下，當然無俾入場費入去參觀啦，不過接待處放左個模型免費俾人欣賞....

個模型其實係一盤人形將棋，D人仔都做得幾精緻~

周圍都係將棋~

資料館隔離係將棋交流室，真係有人響度捉棋嫁~~

逛左一陣就走返去車站攞返行李搭車喇....睇返車站大堂入面嗰個地圖，其實離車站再遠D都有野行嘅，不過頭先我地淨係掛住搵野食都無咩心機行啦~

除左將棋出名，天童都係一處出名嘅溫泉勝地~

入閘口都有一隻將棋~

連月台地下都有....

離開天童，我地搭15:08班次嘅奧羽本線去山形，然後再轉新幹線去今晚入住嘅溫泉旅館所在地，葉山溫泉.....(待續)

---> Day 6 - Part 4 橋本屋‧究竟有幾豪呀?!