2009年2月日本東北8日溫泉之旅 - Day 6 (Part 2 最上川懷古雪見舟)

2月19日    星期四    (銀山溫泉 > 最上川 > 天童 > 葉山溫泉)

離開古山閣，我地拎住重重嘅行李行去巴士站......

試過朝早老爺PK嘅經歷，真係一路行一路驚，短短五分鐘嘅路程，行到連手心都冒汗，不過好彩都大步"檻"過，平安無事行到去車站~~

成個巴士站候車室都被厚厚嘅白雪蓋住~

當時已經有幾個人企左響候車室站入面等車，個候車室好細，我地只能夠排響候車室後面，不過兩袋行李實在太重，雪又愈落愈大，所以我地都唔理咁多叫聲su-mi-ma-sen就走入去候車室入面，先將行李放響巴士站入面櫈上面，兩條友就響候車室外面玩雪....

記得唔知邊個網友講過話銀山溫泉D雪花係六角形，但我地搵左好耐都搵唔倒

等左大約十分鐘巴士就到喇，巴士其實唔係好多位，不過都幾多人上車，成架車都full晒....巴士行左無耐我地就開始好自然咁釣魚....

過左四十分鐘倒就到大石田站，我地會搭9:37班次嘅新幹線去新庄.....望下個電子時刻表，見到9:27有另外一班車去新庄噃.....

不過呢班只係普通車而唔係新幹線，我地唔敢肯定會停幾多個站，都係等多十分鐘啫，所以我地都係照搭9:37嗰班~

閒來無事就周圍逛下......車站大堂有個攝影展~

無無聊聊逛左一陣就入閘喇....個月台水靜河飛，一隻人影都無...，老爺開始用好唔信任嘅眼光望住我問究竟呢個最上川有無遊客去嫁????

我地搭13號指定席~

玩下鞋印.....

火車終於到啦.....大家睇下，成卡車廂得最後幾丁友.....記唔記得之前Day 1 響東京JR站嗰位阿姐幫我地mark位時係話連唔倒位呀? 我無屈佢嫁，呢張相仲唔可以証明佢係有心玩野????

唔使十五分鐘，9:51就到左新庄站喇，月台好大，仲好古色古香~

芭蕉丸.....點解日本好似成日叫D船做乜乜丸咁嘅?

出左閘拿拿聲先將D行李放入locker先~

好喇，攪掂D重型野，一身鬆晒，係時候要講下我地晨咁早走黎新庄做咩啦.....黎到山形縣，樹冰見識過，至靚嘅銀山雪景又睇過，連要行到死死下嘅山寺都去埋，係時候要做返D悠閒嘅活動，就係超靜態嘅和風遊船河喇！山形縣呢條最上川係日本三大急流之一，好出名嫁，所以點都一定要去坐下佢嘅最上川扁舟，欣賞一下川流嘅美態~~

我地會搭10:14班次嘅陸羽西線去古口~

未夠鐘就逛下個車站先，新庄呢個車站都幾大~

睇下個地下幾得意，有水自動由地底噴上黎嫁，老爺話係用黎溶雪用喎~

有隻好大嘅模型船放左響車站大堂中心展覽~

鄉下地方D人都特別nice，有個女人見到我響度影架船，就好熱心咁指住上面叫我上去二樓話先可以影晒成隻船....真係唔該晒佢呀~

車站大堂樓底好高~

當初計劃黎最上川，響網上搵資料，見有D網友話乘船要先預約，咁咪走去最上川芭蕉遊船嘅web site做booking啦，見仲有船上牛肉湯鍋同便當.....船上食鍋咁有風味喎，所以就reserve埋，點知佢地一路無confirm俾我地，send email去問又唔覆，所以去嘅時候都有D擔心去到話我地無預約無得上船，我地已經做定最壞打算，如果真係無得上船，咁就要響古口車站齋坐兩粒鐘，因為下一班返新庄嘅車要到12:30先有呀~~~

所以響新庄車站逛緊嘅時候其實個心都仲十五十六，因為真係唔想去到無得上船，你地知啦，旅行時如果遇到D咁樣嘅挫折真係會好down嫁

......我地都有諗過不如唔去最上川改去酒田睇下阿信嘅故鄉，不過來往酒田嘅班次又係好疏，去一去返到黎新庄要成四點幾，我地今晚將會入住此生暫時最貴嘅酒店，所以都係想早D去酒店hea返夠本唔好蝕底.....

響車站大堂見有間觀光案內所，即本走入去問下啦，個職員好nice，話如果唔係太多遊客基本上唔使預約，仲叫我地「大丈夫」~~

10:14上車啦~~

聽完個職員講個心都定D，不過火車離開新庄時落緊雨，又擔心落住雨嘅最上川無野睇.....

坐左十九分鐘就到古口站....Yeah!! 無落雨呀~~

出左車站要行大約七、八分鐘先去到古口本社港船番所，即係乘船碼頭.....正當我地響車站外面個大地圖前面睇緊點樣行去嘅時候，忽然聽到有人呼喚我地，望過去發覺有個的士佬向我地招手，原來有兩個老人家要搭的士去碼頭，想叫我地join埋佢地一齊搭呀......唔使行都好嘅，咁我地就同佢地一齊打的去囉~

唔使五分鐘就到喇，的士費670 yen，個老人家第一時間俾左錢，落左車老爺梗係要俾返我地嗰份錢佢地啦，都未攞得切個銀包出黎，個老人家就好快速咁走埋黎同我地講要收返335 yen.....哈哈~我仲以為佢咁趕係話嗰小小錢唔同我地計添....我都承認有時候我係比較天真同傻嘅.....

呢個就係船番所喇.....好緊張呀，究竟有無得上船呢

入到去就第一時間走去買船飛，乘船料金每位1970 yen，唔係淨係俾錢就得嫁，仲要填張form寫低好簡單嘅個人資料.....原來真係唔駛預約都得嫁~~

又chop下個印章做紀念先~

賣飛個女職員好好人，佢知道我地唔係本土人，就俾左張地圖我地仲好詳細咁話俾我地知個遊船路線同遊完船河之後要點樣搭返巴士去JR站~

船番所都幾大，有好多野賣嫁~~

嘩~最可怕嘅納豆.....

鹽燒岩魚呀~~

逛左一陣就夠鐘上船，我地搭10:50由古口港出發，航程60分鐘，11:50到草薙溫泉港上岸~

呢個石像就係詩人松尾芭蕉先生，因為佢黎過遊船，仲作埋詩歌頌，所以呢條遊船路線都改個名做芭蕉線~

行落去搭船喇....好大雪呀~~

行緊落去嘅時候已經聽到有好古老嘅船歌響度播放緊~~

就係坐呢種最上川雪見舟啦~~

俾大家聽下陣陣古老嘅船歌~

正當我地響度影緊相之際，忽然聽到有人叫我個名，唔係掛，響咁山卡啦嘅地方都有人識我?......原來係個船伕響度點人名呀~

上左船要除鞋，因為要坐tatami嫁....呢種船個頂同船邊都係透明玻璃，方面大家睇出面嘅河光山色，冬天時船入面有暖氣，船嘅兩邊係座位，中間有一排枱，仲有暖氈，坐左一陣已經出汗.....

我身後嗰兩位就係同我地一齊打的黎嘅老人家，佢地仲預先order左牛肉鍋，再後面嗰個就係船伕.....

無牛肉鍋食唔緊要，我地仲有頭先響船番所買嘅花生糖~

呢個船伕著住江戶時代嘅古裝~

成個船程佢都響度講野，大概係講下歷史呀、介紹下風景呀咁啦，我諗佢應該都講得幾生動有趣嘅，因為成船D老人家都笑得好開心，不過我地兩條友就完全唔明佢講咩囉~

點解我淨係話全船嘅老人家? 因為成架船計埋我地只係有十個乘客咋，仲要全部都係上左年紀嘅老人家，我地兩個係最後生嫁，我諗佢地一定會奇怪點解會有兩個外國人山長水遠走到黎坐船....咁又係嘅，遊船呢家野，咁沉悶，仲要係響鄉下地方，又多數係上左年紀嘅叔叔伯伯公公婆婆先大興趣D嘅~~

沿途嘅山河景~

旁邊嘅窗係可以打開嫁~

連船頂都望到外面嘅景色，船嘅設計幾有心思~~

間唔中會見到有其他扁舟經過~

冬日啡色嘅山頭，披上左白白嘅雪，同河流組成左一幅秀逸嘅山水畫~

經過一個神社，船伕特別提醒我地影相~

D日本人仲即刻拍掌合十祈福，好似成日響天后廟附近見到D公公婆婆行過都會向住廟嘅方向拜拜~~

船伕不停咁響度講野，之後佢仲引吭高歌....

雖然唔知佢唱咩野，不過靜靜咁聽住充滿左江戶時代嘅古老船歌，身邊嘅叔叔伯伯都拍手和唱，我地雖然唔明箇中嘅情懷，但係音樂始終係共通嘅語言，身在其中都感受到一點點古雅嘅詩情畫意，絕對係難得嘅經歷~~

船行不知不覺左一個鐘，終於到達草薙溫泉港，遊船嘅旅程完結，上返岸我地又繼續出發去下一個景點天童......(待續)

---> Day 6 - Part 3 無啦啦去天童食個午餐