2009年12月台北是是但但咁就玩完4日- DAY 1

12月25日 (星期五)
香港 > 台北

今個聖誕假期去左一個小旅行，就係唔駛兩個鐘機嘅台北，雖然台灣係香港人熱門旅遊點之一，但因為我地事前一D準備都無，究竟而家香港人去到台北蒲邊度又或者hit買D咩我地一D都唔知，只係靠早幾年去過台灣嘅DD記憶，所以呢個旅程非常之是但，無咩地方我地係一定要去，亦無咩野食係一定要食，去倒就去，食倒就食咁啦，不過睇落好似好他條，但唔知點解去完返到黎仍然攰到想死........

我地搭國泰機，不過check in 前要先去中華旅行社攪個落地簽証，雖然25號係假期第一日，不過都唔駛等好耐~~

旅遊大使又係靚靚嘅紫bear呀

........

今個trip係同埋細妹兩公婆去，所以加多一個旅遊大使，就係好爛口嘅橙汁熊

兩隻野同大家打個招呼先啦~~

原本搭兩點半機，點知delay左差唔多成個鐘，好似話因為大霧，D登機閘口改到七彩，返黎同同事講開佢仲慘，原本佢去夏門只係一粒鐘，點知delay左七個鐘.......

飛機起飛無耐就派野食，係一個bread同橙汁，個bread仲暖笠笠都OK嫁~

去到桃園已經五點半，個天已經黑晒......因為個package包一程飛狗巴士，我地就揀左由機場搭去台北市，呢個飛狗都幾好喎，可以車到我地去酒店附近落車，最初仲以為要轉多一程的士......

巴士入面D座位好闊落，坐得都幾舒服~~

開左車無耐就一路塞車，終於去到西門足足坐左兩個鐘，想死.......我地今次住近西門嘅花園酒店，好似話係新開，五星級喎，不過門面同service都唔覺有幾五星，仲要話佢地個電腦record睇唔倒我地個package係包早餐，咁明明我地個hotel voucher係寫明包埋，攪左一輪好勉強先俾左第二朝早餐卷我地，仲話如果同agent check左後係無包就要收返我地錢.....真係媽媽聲，唔知係咩五星級service.........

放低D野我地就去附近嘅西門，睇書話由酒店行去五分鐘，不過頭先搭巴士黎經過西門町都好遠啫，所以我地都係打的算..........響台北搭的士真係好鬼平，尤其當你人多時就真係好抵，所以今個trip我地成日都打的........

西門町好旺，周圍都人頭湧湧~

用電單車就當做一個舖位，好攪野~~

阿宗麵線，以前已經試過，不過細妹佢地未食過，所以想試下，不過勁多人排隊，黐線!! 企響度揸住碗野熱辣辣，而且都唔係話好好食，唔知點解咁多人幫襯.....我地當然唔會嘥時間排隊，食唔倒就算.......

但真係好肚餓，又未諗到食咩，行過見到有香腸，整返兩條頂住肚先......

都OK幾好食嫁~~

行行下見到鴨肉扁......

好似旅遊書有介紹過，而且都幾多人食，咁就入去試下~

食落其實無咩特別，而且D野好油........

食完後再去埋杯野飲下先.....

我嘅薑母奶茶，好勁薑味!!

二樓呢間野D座位係鞦韆，幾得意~

逛左一陣，唔覺唔覺又兜返去阿宗麵線，夜左見唔駛排隊就買黎食下啦......

個個都企響街邊食........

雖然日本D立食都係企響度食，但sorry囉，你話我哈日啦，個感覺硬係覺得爭好遠.......

行到十一點幾，買左小小野，之後就打的返酒店.......酒店附近有間24小時嘅家樂福，好大有幾層樓逛，我地呢D夜鬼當然唔放過去逛埋啦~~

D麵包好大袋!!

返到酒店已經十二點幾，不過都要影下間房先......都OK幾闊落~~

最正係個toilet，好大同埋仲有浴缸同企缸分開，個企缸空間好大，沖涼洗頭都舒服D，呢樣野勝過日本!!

今次三晚都住同一間酒店，唔駃晚晚執野，yeah!!.....Good night啦~~~