2009年12月台北是是但但咁就玩完4日 - DAY 2 (PART 1)

2月26日 (星期六)
台北．信義區

第二朝九點幾先去食早餐.....呢間酒店嘅自助早餐都幾多野食，唔錯~

食完早餐就去搭捷運開始我地今日台北shopping之旅........呢棟就係尋晚我地光顧過嘅24小時家樂福喇，真係好大嫁!

無啦啦響條街度有座城樓，好似韓國D咩咩門.......

由酒店行去最近嘅捷運站係小南門站，只需要四、五分鐘就到.......

台北嘅捷運都幾乾淨，月台個feel仲有D似日本!

捷運車票係膠幣，同深圳一樣~

同日本一樣有夜間婦女候車室，唔該港鐵學下啦!!

車廂同香港嗰D差唔多~

今日基本上都打算響信義區一帶流連，第一站係全台最大嘅誠品.....

不過去到發覺要十一點先開門做生意，我地就無無聊聊咁響外面影造型照.......

呢間誠品有八層咁多，二至四樓係書店，其他垃垃雜雜咩都有，衫啦、食店啦、兒童館啦、生活雜貨啦，唔鍾意買書都總有一樣啱你行.....我地響度溜連左差唔多兩個鐘，都買左十本八本書，不過始終覺得如果大陸有出版嗰D留返響深圳買會平D囉，所以都唔算大量入貨~~

之後當然係shopping時間，逛新光三越呀!! 好大，行到腳都軟~~

好多好靚嘅boot呀! 真係試鞋試到唔想走，男士就悶到嘔電........

行到攰一攰，兩點幾係時候要醫肚，是是但但搵左間春水堂，呢間野響台北都好出名嫁，仲記得早幾年第一次黎台北，台北D朋友就帶我地黎飲過野~

食飯時間都要等左一陣位，不過等位地方都幾舒服~

好似香港D茶樓咁，先用order紙點好野食，然後再出櫃檯點單~

一埸黎到，當然要試下佢出名嘅珍珠奶茶啦.......

茶壺入面好多珍珠嫁~

仲試左觀音拿鐵，好清香，180台幣，極力推介!!

右邊嗰個綜合滷味好難食!!

飯後甜品係紅豆湯同今早響酒店「外帶」嘅台灣益力多~~

飲飽食醉真係唔想郁，如果唔係有shopping嘅原動力，睇怕我地可以響度hea到四點..........

呢個新光三越信義新天地實在太大!! 單係shopping已經行一日都行唔完，仲俾我地見到響某個館(唔記得係A11定A9)做緊Teddy Bear展覽同Hello Kitty展銷會場，超愛bear bear同Hello Kitty呢兩姐妹當然唔理三七二十一抓緊機會去踩踩場啦，就係咁一去就去左兩粒鐘.......(待續)