2009年12月台北是是但但咁就玩完4日 - DAY 2 (PART 3)

12月26日  (星期六)
台北．信義區

離開新光三越，我地就向住101大樓方向行去......

呢一個區域好大，度度都係高樓大廈，好多shopping mall，所以周圍都人頭湧湧，個感覺有D似去左日本咁........

  

去101大樓之前，我地順道去左New York New York先......

我地嘅目標係日本100yen店嘅Daiso呀，響台灣呢度就所有物品一律39台幣~

因為地方夠大，所以都幾好行，我地逛左大約大半個鐘，係咁意入左D貨咁啦，雖然同日本一樣貸色，但硬係覺得點都唔及響日本買得咁高興嘅.......

之後就行去101大樓喇，唔知係咪聖誕節好多人，所以要由shopping mall嗰邊入.....

Shopping mall全部都係名店，個格局成個IFC咁款......

個天花板幾型~
 

入面好大，仲有做緊車展.....

幾時老爺先可以買番架載我去兜風呢??? (.....發夢中)

展望台入口有免費locker，大包細包放晒響度唔駛煩，免費嫁!!

 

好彩都唔係好多人排隊買飛......

超貴!! 400台幣一個人，未去過叫做點都要上去睇下啫，當時都仲係全球最高嘅建築物嘛.......下次咪攪，因為真係無咩睇.....

呢個logo係101嘅標誌，周圍都見到佢~~

 

升降機入面有圖顯示上升速度，真係超快嫁，由五樓售票處入口上到去89樓觀景台只需要37秒咋!!!

有唔同語言聲音導覽，廣東話都有嫁......

 不過講真呢個台北市夜景真係好無料到，360度行完一圈只係得一個位D燈光比較璀璨咁啦，其他黑媽媽無野睇嘅!!.....仲要呢晚無得上91樓嘅露天觀景台，真係媽媽聲!!!

搵匀全場最靚係呢個location嫁喇!!!

雖然無咩睇，但係一諗起俾左100大元出黎，梗係要響度吽返夠時間啦，我地揸住個聲音導覽器行晒所有景觀區聽晒所有介紹先肯離開.......

 

個souvenier shop仲要係超老土嗰D賣珠寶玉石，救命!!!

 

之後就去睇嗰個世界最大風阻尼器，即係減震器......

 

呢舊野係位於大樓嘅88同89樓之間，直徑5.5米，重660公噸，因為可以自己做反方向移動，當有強風或者地震就能夠產生一種反作用力，減低building嘅搖晃程度喎~~

 

16條鋼纜好粗嫁!!

響89樓睇完可以行樓梯落去88樓再睇成個球體......通路嘅地板好得意......

好好笑，當我地同橙汁熊影緊造型照嘅時候，有D遊客唔知走埋去影相，我諗佢地以為隻熊B係景點一部份，就係咁橙汁熊無啦啦做左一個拍照spot.......應該要問返嗰D遊客收版權費........

個阻尼器下底有四條可以移動嘅野支撐嫁......

逛完呢個101大樓我地就離開去搵地方食野喇......(待續)