2011年2月北海道道東道北12日 - 百去不厭嘅小樽 (四)

3月1日 - DAY 11 (PART 3) 
小樽 > 札幌 

逛完堺町通，血拼完畢，終於去到淺草橋，可以慢慢欣賞一下小樽運河.......呢度嘅日景、黃昏景、夜景、夏天景、冬雪景我地以前都睇過晒，最靚嘅當然係雪燈之路，不過亦都係最迫爆嘅時候，莫講話想細心欣賞d 雪燈，真係想好好咁影張相都好難，諗返起當時喧鬧嘅情景都有d 打冷震......


無搖曳嘅燭光，無趣緻而有心思嘅雪燈，亦無閃爍不停嘅閃光燈，運河靜悄悄一片，此刻嘅小樽係咪浪漫固然見仁見智，但無疑係少左份璀璨，多左份寂寥......只係無論幾多人話小樽已經俾人去到爛晒，無論而家堺町一帶已經俾強國人淪陷，響我心中冬日下嘅小樽仍然係永恆地美


現在氣溫 3.7度，都唔算好凍啦~


難得唔駛同人迫，走落去散步道逛下.......




四點半，運河旁嘅街燈仲未著.......

 

同雪燈之路真係無得比，想搵個人同我地影張合照都要等左一陣~


雪燈路嘅痕跡.......河畔原本佈滿晒雪燈好有情調，而家只剩低一個個雪洞，近睇真係好唔浪漫呢


有個小小雪人，好可愛呀!


運河旁嘅倉庫群......雖然無點點嘅燈火同燭光，但響白雪嘅覆蓋下，河上反映出古舊倉庫嘅倒影，仍然有一絲淒美

響散步道逛左一陣我地就離開.......靜靜咁響度漫步、影下相，好舒服好悠閒嘅感覺

離開運河沿中央通行返去車道，路經舊手宮線跡地.......呢度冬天永遠都俾深雪掩埋.......

行行下忽然煤氣燈亮起.......


又要同小樽 bye-bye 啦~


真係講都唔信，我地黎過小樽咁多次，竟然一次都未去過三角市場.......次次都唔係咁啱時間，通常一朝早黎食到飽一飽就諗住晏d 先逛，到逛晒堺町通同運河又已經開始夜收晒檔，一係趕住去溫泉旅館，一係就趕搭JR 返札幌趕下一場........睇黎下次真係要的起心肝搵次去一趟


旅程去到第十一日，唔知係咪年紀開始大，實在有d 攰，老爺話不如早d 返札幌食晚飯~



好鍾意車站入面呢一排煤氣燈~




我又要被stop 啦，唉!!