2009年2月日本東北8日溫泉之旅 - Day 1 (Part 2 漫遊仙台)

2月14日   星期六   (香港 > 東京 > 仙台 > 東京)

去到仙台十一點，響案內所兜左個圈問左D資料就立即出發去作市內觀光喇~~

仙台算係一個比較大嘅城市，D景點都需要搭巴士或地鐵先去得到。時間有限，我地只係打算去瑞鳳殿同青葉城址，所以搭 Loople Sendai 循環巴士就可以。巴士站響仙台車站西口15號站，每程收費250 yen，亦有 one day pass 只係600 yen，我地估計至少要搭三程，梗係買 one day pass 啦，又可以留念~~

Loople Bus 每隔15分鐘一班車，去到巴士站啱啱有班車，拿拿聲響車站旁邊嘅售票處買pass上車啦~~

去瑞鳳殿大約要十五分鐘，車上大部份都係遊客，好多人都係去呢個景點~~

要先行條長長嘅石級架~~              

瑞鳳殿據講係一個叫伊達政宗嘅藩主嘅墓地......伊達政宗係乜誰？最初我都無乜理會，只係記得睇過下旅遊書介紹話係自小獨眼架，不過去完仙台同松島就對呢位仁兄嘅事蹟好熟落喇，因為到處都可以見到關於佢嘅介紹，佢好猛料架，仙台都係多得佢當年大興土木先咁繁榮~~

入場費 550 yen~

呢個瑞鳳毆係七十年代根據十六世紀嘅古建築模仿而建，係桃山時期嘅建築.....桃山時期究竟又係咩？唔好意思，真係唔知，因為本本旅遊書都無解釋，只係話好華麗.....講真，我覺得一般啦，點都唔及故宮咁宏偉.....

我地去到仙台呢一日唔算好凍，中午都有十度八度咁上下，不過就勁大風，D樹葉俾D風吹到一地都係.....連個圍欄都吹跌.......

行行下見到有條好粗壯嘅「廢柴」....老爺話真係好想帶返香港送俾公司D同事喎~~

日本人D野有時都幾騎呢，無喇喇響咁古雅嘅地方有一排印有UCC字樣嘅櫈.....

離開瑞鳳殿，行緊去巴士站時見到有間店賣野食，果時十二點幾，落機後都未有野落過肚，咁就入去逛下睇下有無野啱食~~

間野係專賣蕃薯食品，右手面果件薯仔蛋糕係老闆娘介紹，191 yen，都幾好味~~

Loople Bus 嘅標誌

等左一陣就有巴士，我地下一個景點係青葉城址，即係仙台城跡，唔知係唔係因為觀光巴士，所以車入面個電子顯示屏都先進D，仲有影片介紹景點~~

到站就按鐘落車...(老爺話我好無聊，乜都影一餐....我鍾意呀，吹咩~~)

青葉城址位於青葉山上，又係伊達政宗1601年建造架，不過響1945年被美軍空襲燒毀，只有一小部份重建成功....所以講真，其實係無咩睇嘅......

只有一堆亂石....不過係十七世紀留存落黎嘅亂石....

城址上可以望到個仙台市~~

不過呢日真係好大風，吹到癡肺，攪左好耐都影唔倒一張頭髮無被吹亂嘅相.....

伊達政宗騎馬像

響城址隔離有座護國神社~

影低D紀念品就唔使買啦~~

附近有間頗大嘅手信店，賣好多牛舌食品，不過我地齋行無買~

之後就搭返巴士去一番町商店街，響定禪寺通市役所前站落車行過去就係....將近兩點，好鬼肚餓，我地就響一番町街果間利久食期待已久嘅仙台名物 --牛舌~~

我地點左牛たん「極」定食 (1600 yen) 同咖哩牛たん定食 (1200 yen)

牛舌沙律

牛舌好厚好爽口，一D都唔韌，yummy....~~~~~

香噴噴嘅咖哩牛舌，不過D肉就無咁厚

麥飯

牛舌湯，好清甜~~

食飽飽後就逛仙台呢條號稱東北最長嘅購物大街~~

又係どんぐり共和國，真係分店遍佈全國~

行行下見到有間店賣茶葉產品

綠荼就唔買喇，綠荼雪糕就梗係買黎試下啦...o-i-shii~~

呢間Agnes B都幾大，不過D款唔新囉，所以空手而回~~

有人響條商店街上面表演彈琴喎~~

見到呢間店嘅門口有小丸子賣，150 yen 一串，當然唔放過啦~~

條購物大街都好長，行下食下，穿過中央通就可以行返去仙台車站，因為想今日去埋三井 Outlet Park，所以都無好詳細咁行，總計響一番町街食多過買，只係響100 yen 店入左DD貨咋~~

呢座AER大廈就響仙台車站旁邊，旅遊書介紹話頂樓有免費室內展望台可以欣賞仙台市全景，不過時間所限我地無去，而且頭先響青葉城址都睇過仙台景啦，都係咁上下啫~~

返到仙台站就搭仙石線去中野栄，班次都幾密，大約十零分鐘就有一班車....呢條線嘅車門係要乘客自己按掣開關架，最初我地唔知以為道門壞左開唔倒.....真係大鄉里....

由仙台站去中野栄站只需要19分鐘，不過一晚無好瞓，上左車就算無位坐都竟然瞓著左~~

由中野栄站行去 三井Outlet Park 都要十零分鐘，去到已經四點半~~

滿懷希望可以響呢個Outlet血拚一番，不過最後都無咩買到，個Outlet唔算大，唔係咁多牌子啱買，再加上日元高企，真係唔係好買得落手，就連我一向必入倒貨嘅Coach都無野啱....老爺就更加空手而回，呢個Outlet竟然連Nike同一般嘅Sport Shop都欠奉....最後我只係響間精品店ViceVersa 用 1050 yen買左三對保暖襪，呢種襪響CitySuper有得買，要成70幾蚊一對架~~

行左個幾鐘就行晒成個Outlet，之後又要行返去中野栄站，因為買唔倒野，所以行得好沮喪....

中野栄站係個細站，六點幾已經靜英英....

返到去仙台差唔多七點，行左成日真係好攰，唔想再行，於是就響車站度食晚飯....因為諗住呢個trip應該唔會再黎仙台 hea，所以就決定食多次牛舌....響仙台車站三樓有條牛舌通，就響新幹線閘口旁邊，果度集合左好多間牛舌店，中午試過利久，今次就揀左呢間

 (http://www.kisuke.co.jp/)

老爺點嘅1.5入前三種定食

我order嘅鹽燒牛舌定食.....感覺上利久D牛舌好似厚身D，口感好D囉

牛舌湯D料都無利久果D咁多....

整體黎講利久回味多D，而且呢間野D位比較窄，坐得無咁舒服，但埋單就貴過利久，計埋啤酒要4250 yen~~~~

食飽後就響仙台車站附近逛，行左一陣S-PAL商場，就行返去車站西口嘅手信街，響果度買左D牛舌食品咁啦~~

呢款牛舌有D似牛肉乾，不過好鬼韌，而且味道怪怪咁，食左兩塊老爺已經拒絕再食~~

之後就搭20:26開嘅新幹線返東京喇~

返到去東京，響Kiosk 同 Bellmart入左D小食就返酒店.....呢間酒店D房都OK，個style有D似商務客房~~

酒店房望出去可以見到東京夜景~

Hea 左一陣就沖涼瞓教，呢一整日嘅行程就完結喇....第二日就去秋田縣嘅乳頭溫泉啦，好緊張呀~~~~

---> Day 2 - Part 1 鶴之湯超騎呢泡湯記