2009年2月日本東北8日溫泉之旅 - Day 2 (Part 4 妙乃湯‧上篇)

2月15日   星期日   (東京 > 田沢湖 > 乳頭溫泉鄉)

返到去妙乃湯五點幾，外面天色開始好暗~~

我地約左七點鐘食晚餐，趁有時間梗係即刻換返件浴衣去浸浴啦~~

呢兩個係去浸浴用嘅袋仔，入面放左條毛巾仔同牙刷牙膏，基本上溫泉旅館都會供應嫁，呢種索繩袋好好用，可以帶走留返黎下次旅行用~

妙乃湯最著名嘅就係金之湯同銀之湯，金湯含大量礦物質，泉水係泥黃色，而銀湯就係炭酸泉，小小偏奶白色，睇書話交替浸呢兩種浴可以令皮膚光滑D嫁~~~

妙乃湯總共有七個湯，除左混浴露天風呂有金湯同銀湯，男女湯都各有金銀兩湯，每晚八點交替，另外仲有一個貸切風呂~

走廊有地圖顯示各個湯嘅位置，同埋介紹每種湯嘅療效嫁~

男女湯每晚八點交替，兩塊布就會調轉放~

入口有電子locker，比鶴の湯先進好多~~

入到去女更衣室見無人，拿拿聲影兩張相先......妙乃湯嘅更衣室係今日浸咁多個溫泉之中最完善嫁，好似酒店大浴場咁，除左乾淨，設施都好齊全，仲有埋風筒添，又有地方沖涼....不過最重要嘅係，有暖氣嫁！終於除衫唔使凍到癡肺啦~~

因為呢間旅館嘅個室係無浴室嫁，所以要響女湯入面沖身.....今日不斷響幾個溫泉度走黎走去，趕頭趕命，終於可以舒舒服服好他條咁咁沖返個涼喇.....

沖乾淨晒後，包返條大毛巾就先去混浴同老爺會合。今次唔駛再用自己條毛巾喇，妙乃湯每間個室都有四條大毛巾~

通去混浴要經過一條木板通道，未去到混浴D冷風已經吹到打晒冷震，去到見到老爺已經響金湯浸緊，一踏出去就俾佢呼喝住叫我小心D行，原來個地板有D地方結左層冰，好跣腳......點解佢咁清楚？嘻嘻....因為佢又發生瘀事頭先中左招囉.....咁鬼凍，佢一黎到梗係二話不說就直衝去個風呂度，所以無留意地下狀況，就咁樣就成個人跣低左，仲要係四腳朝天果隻.....你知啦，佢全身光脫脫嫁，跣低果下仲要係對正個金湯，真係乜都俾人睇鬼晒.....好彩當時個金湯無女性響度浸緊，如果唔係就真係益晒街坊喇......

唔踩冰就唯有踩落雪地度，真係凍到媽媽聲.....慢慢行到去個金湯就拿拿聲走入去，成個人當堂暖返晒.....呢個金湯都幾大，應該可以容納倒十零個人，D水係泥黃色嫁，好似鐵銹咁，所以浸左落去唔係好睇到野.....當時有三、四個人響度浸緊，全部都係男人。今日已經同唔少男人一齊光脫脫浸浴，所以已經習慣晒~~

近入口另外有個細D嘅銀湯，兩個湯都係面向個人工瀑布，同響房望出去差唔多，不過個景就比房再近D.....當時個天已經黑晒，但係望出去就好光，因為D雪白雪雪，好似反光咁，一路浸一路欣賞咁靚嘅河川美景，塊面凍冰冰，個身就暖笠笠，真係好鬼正.....響金湯浸夠後就走去銀湯浸下，銀湯D水熱過金湯，一走落去個下真係辣到跳起~~

兩個湯都浸夠後就走返入去室內各自浸下其他湯.....其實男女兩邊都有兩個湯，一金一銀，不過個人覺得八點前女湯呢邊嘅湯好似正D，因為有個岩露天風呂....我地比較鍾意浸露天多D，因為始終覺得室內風呂比較焗~~

呢個岩露天風呂唔算大，底部好似沉積左好多沙石咁，不過因為係金湯，所以睇唔清究竟係乜東東....話就話係露天風呂，其實四周無咩景睇，不過風呂旁邊堆滿晒雪，可以邊浸邊玩下雪~~

浸完個露天金湯就走去搵個銀湯~

不過入到去唔見個銀湯，只係見到有條樓梯通上上面，上面有個牌寫住喫茶去.....

走上去昅下，原來喫茶去就係銀の湯.....銀湯就銀湯啦，因乜叫喫茶去喎，拗頭.....入到去又係無人，不過就煙霧迷漫影唔倒相......見無人二話不說就除左條毛巾跳入去個浴池度.....嘩！呢個湯個底部鋪滿晒石春，踩落去好似玩緊獎門人咁.....

兩個湯都浸晒後就去著衫返歸喇....出到去見到老爺正響入口處旁邊唔知攪乜野....原來旁邊有水供應俾人飲，佢又響度補充緊水份.....

攪掂後就上返房.....上去二樓要行樓梯，不過旅館D拖鞋好鬼硬，著住對拖鞋行樓梯好難行，行唔夠兩級就飛甩左對拖鞋......

呢個著住浴衣嘅人兄就係我家老爺喇~~

返到去房仲爭十零分鐘先夠鐘食飯，有時間就攤抖下影下間房先啦~~

呢間房雖然話係全間旅館最貴嘅個室，不過其實都幾細，一入門口基本上係一眼見晒，無電視無浴室，可謂十分之簡單~~

睇下張枱鋪左暖氈嫁，好似D日劇咁.....開著電源對腳放入去枱底真係好暖嫁~~

我地間房叫雪柳，都幾別緻~

連鎖匙牌都有個室個名~

呢個係門鎖.....咁樣係鎖左~

咁樣係未鎖~  (我知，係好無聊....)

影完晒相就坐低hea下飲杯茶食下迎賓和果子~~

攤抖緊時忽然發現左D野......其實響黎旅行之前做左個好無聊嘅實驗，就係究竟溫泉D水係咪堅嫁呢，同埋又有幾勁呢，於是就以身試法，手腳搽左兩種唔同牌子嘅甲油.....以下嘅相片係比較嘔心，唔想睇嘅人可以快速skip左佢，唔睇都無咩損失，因為其實真係好無聊.....

¯

¯

¯

¯

¯

呢對就係我對腳喇.....腳指甲係搽左雜嘜牌甲油，今日浸完幾個浴後，甲油開始脫落，尤其係右腳尾指......睇下已經脫得所剩無幾.....雜嘜果然係雜嘜~~

至於手指甲就搽左隻名牌，D字頭果隻呢....睇下全部都完好無缺嫁，名牌始終係可靠D嘅~~

泡過溫泉後睇下連條銀鍊都變左色....

阿媽俾我旅行傍身條頸鍊仲慘，全條變晒黑色....以前都有戴過佢浸過溫泉，但係就無試過咁變色，莫非以前浸果D係假嘅溫泉水？？

響房攤抖左一陣就夠鐘去食晚飯喇...... (待續)

---> Day 2 - Part 5 妙乃湯‧下篇