2009年2月日本東北8日溫泉之旅 - Day 3 (Part 2 小京都角館)

2月16日   星期一   (妙乃湯 > 角館 > 松島)

離開田沢湖，我地出發去秋田縣嘅角館.....

沿路嘅景色好似一幅一幅嘅水墨畫~~

由田沢湖去角館，搭新幹線只需13分鐘，10:10就到喇~~

出左站D雪落得好大，又大風，天氣真係好Q凍！....比尋日響乳頭溫泉仲凍.......因為響角館大部份時間都係戶外行逛，我地拿拿聲響行李攞返D頸巾手襪同打底衫褲出黎去搵toilet著返晒上身先~~

之後就將D行李存放響locker.....角館站嘅locker係響出左車站外面嘅左手面嫁~

攪掂就去搵觀光案內所轉個圈......角館嘅觀光案內所響火車站前面，座建築物好古色古香喎~~

呢個觀光中心叫角館站前藏~

入面都幾大.....除左有一般嘅旅遊資料可以拎之外，仲有行李寄存服務，每件200 yen ....早知唔放locker放響呢度啦~~~

拎左D資料同地圖後，就開始冒住風雪嘅角館漫步喇.....

角館市唔係好大，基本上徒步就可以......佢最出名之處其實係因為十七世紀好多諸侯聚居響度，至今仍然保留住當年武士嘅宅地，加上市內嘅街道好古色古香，所以角館又有東北小京都之稱......不過近火車站所見嘅屋都係一D普通民居.....

行左一陣就見到西京家嘅路牌指示，不過睇書話呢個武家屋敷嘅商業味較濃，我地只得兩個多鐘響角館，所以唔打算去.....我地嘅目標係青柳家~~

再行前就去到武家屋敷通，兩旁有唔少古色古香嘅武家，夾雜住鋪上白雪嘅櫻花樹，好淒美嘅感覺，都幾有古都嘅風情嫁......

好多人黎角館都係因為呢處係秋田縣最出名嘅賞櫻花勝地.....不過響漫天風雪下角館嘅景色一D都唔輸蝕喎，可以話係另一種風味~~

老爺話呢個構圖幾有意境喎.....(????)

我知好無聊，但係唔知點解，次次見到郵筒我都會好先自然影低....

呢間野入面有野賣嫁.....尋日到衣家未shopping過，話之你幾趕時間，梗係拱入去掃返D貨先啦~~~

終於去到青柳家.....青柳家係武家屋敷最具規模嘅建築物，入面有好多個展館，所以又叫角館歷史村.....其實即係一個頗大嘅武士住宅主題公園~~

要收入場費500 yen 一位~

入口係「母屋」，青柳家D族人其實響呢度住到1985年先搬走~

展示左當年嘅食器~

武器藏....一樓係武器展區~

二樓係武士日常生活用品同擺設~

從武器藏二樓望出去有個好大嘅庭園.....望過去對面係秋田鄉土館~

武器藏隔離有個青柳庵，有D古代字畫同古書....無咩興趣，好快速行完.....

神明水.....D水好凍嫁~~

呢個日式庭園其實都幾靘~~

庭園入面有一系列圖畫展覽，介紹角館當年名畫家小田野直武嘅生平....都幾得意，D畫前面果個就係呢位人兄嘅石像~~

秋田鄉土館，入去要除鞋.....一樓都無咩野，以前係客室，而家用作工藝示範展場~

二樓就差D喇，係以戰爭為主題嘅展館....其中有我地最討厭嘅太平洋戰事.......一路睇一路媽媽聲..(響心入面啫...)

睇怕著得上呢件好似綿胎咁重嘅衫嘅人，佢嘅size都應該好巨大.....

山車，入面果條好似係龍噃~

響青柳家行左大約二十多分鐘就離開喇，因為不知不覺已經十一點九，我地要搭12:49開嘅新幹線去仙台，唔能夠響青柳家停留太耐.....我地不嬲參觀景點都總係要攪到趕頭趕命.....(無奈....歎氣....)

離開青柳家，向西面行過D就係檜木內川堤，堤畔種滿連綿嘅櫻花樹，可以想像春天櫻花滿開嘅話一定好浪漫、好靘~~

響檜木內川堤影完相，D風雪真係好鬼大，頂唔順，唯有兜返去武家屋敷通.....

漫天風雪下嘅武家屋敷通更加淒英~~~

睇睇時間已經就快十二點，仲有九個字嘅時間.......呢個時候係抉擇嘅時候，究竟應該行去另一邊嘅安藤釀造元睇(= 試食！)醬油，定係去醫肚呢，食飯嘅話又夠唔夠時間呢......

最後我地都係揀左去食野，一場黎到秋田縣，無理由唔去試佢出名嘅比內地雞就離開架.......咁啱行經有間食店叫櫻の里，拿拿林走入去啦~~

入面得一個女人招呼客人....已經有幾pair人響度等緊.....

12:00坐低，即刻order佢最出名嘅比內地雞親子丼~~

一路飲住茶一路好心急咁等野食.....

12:17我嘅比內地雞終於黎喇......D雞真係好嫩滑嫁....o-i-shii~~~

個湯入面有朵櫻花....

12:20老爺嘅咖哩雞飯先到.....不過佢不嬲食野都快過我好多.....五分鐘攪掂，仲可以去埋toilet，但係我仲係響度趕頭趕命咁食緊......

好趕呀......12:26終於食完，我一路飲埋D湯老爺一路去埋單先.....

12:28離開櫻の里.....老爺一路拖拉住我一路開恆turbo冒住風雪全速直衝向車站......我一路走一路喊救命.....

12:42終於氣羅氣喘咁走到車站啦~~~~

12:49開嘅車，即係仲有7分鐘時間啦......老爺去locker攞返D行李，至於我呢個購物狂，雖然氣都未抖順，就梗係拱入去車站隔離間souvenir shop 橫掃一下先啦~~~~

12:46好開心咁買完野出黎......12:48上左車搵埋個位......12:49開車喇......

趕頭趕命響兩個零鐘頭行完角館，我覺得冬天飄雪下嘅呢個小京都都幾值得遊覽.....至於所謂古都風情，其實都係集中響武家屋敷一帶.....叫得小京都，即係京都袖珍版啦，梗係無京都咁靚格，但係有時間響度漫步幾個鐘，絕對係唔錯嘅選擇囉~~

告別角館，告別秋田縣.....我地向另一站松島進發~~~~~

---> Day 3 - Part 3 松島一‧海灣的優悠