2009年2月日本東北8日溫泉之旅 - Day 2 (Part 2 蟹場溫泉)

2月15日   星期日   (東京 > 田沢湖 > 乳頭溫泉鄉)

離開鶴の湯，搭返旅館專車出返去アルパこまくさ站，等14:44巴士去妙乃湯~~

乳頭溫泉鄉總共有七個溫泉，除左鶴の湯地點位處一角，其他幾個湯都比較集中，步行過去就可以，所以我地就先去妙乃湯check in 同放低D行李先再去蟹場同孫六浸湯囉~~

等緊巴士時就入去候車室逛下，入面好大.....睇真呢個其實唔係真正嘅候車室，係一個溫泉館喎，可以響度日歸浴都得~~

(官方網頁圖片)

響鶴の湯浸完浴都未曾食飯，真係好鬼肚餓，不過呢處無咩野食賣，我地只係買左個麵包同D蒸餾水，老爺話浸完浴流失好多水份，要飲返多D水..... (其實我唔係好明佢講乜，不過佢啱啱響鶴の湯受過創傷，佢話乜就乜啦~~)

Hea 左一陣，巴士就到喇，好多人落車，又有好多人同我地一齊上車.....巴士行左大約十分鐘就到妙乃湯啦~~~

妙乃湯旅館個外形好靚呀~~

攪掂左 check in，個女職員同我地講解左旅館嘅設施，confirm 埋晚餐同聽朝早餐時間，就帶我地去我地間房喇~~

我地今次訂嘅房係叫櫻館 (さくらかん)，係全個旅館最貴嘅個室，有景同埋最重要係有toilet，夜媽媽無toilet 好唔方便，所以寧願貴D都係咁話.....因為全間旅館只得17間房，好驚訂唔倒有toilet 嘅房，所以我早響十一月一留意到可以訂房就第一時間上網reserve 喇~~

有張搖椅可以舒舒服服咁坐響度欣賞窗外嘅雪景嫁~~

窗外可以見到個人工瀑布，好靚呀~~

放低行李，我地就拿拿聲出發去浸今日第二個秘湯 -- 蟹場溫泉~~

臨離開妙乃湯之前，同職員預約左個貸切風呂，不過太遲約，只係剩返今晚11:00時段.....是但啦，反正呢間旅館D個室係無電視架，夜晚無咩做去浸下私家風呂都好啦~~

呢個瀑布就係響我地間房望出去果個瀑布喇.....右手面係旅館，二樓第一間就係我地間房啦~~

由妙乃湯去蟹場，行大約六、七分鐘倒，途經大釜溫泉，不過時間所限，而且呢個湯係無混浴嫁，所以我地今次唔會去浸呢個溫泉~~

行過條斜坡就到蟹場溫泉啦~~~

呢個溫泉旅館正常D，要除鞋換過旅館嘅拖鞋，經過reception俾左錢先可以去浸浴，唔似鶴の湯，多人嘅時候衰D唔走入去事務所就直入去浸湯都得~~

俾左入浴料，每人500 yen，個職員同我地講解左內湯同露天混浴嘅位置，仲提醒我地去露天風呂要經過一條雪路，記得著旅館供應嘅水鞋，好nice 呀~~~

時間所限，我地只係去露天風呂，即係唐子の湯~

跟住指示行左無耐就去到通去露天風呂嘅出口，門口有一堆水鞋.....著左鞋推開門就向混浴進發啦~~

要經過一條長長嘅雪路嫁~~

仲要行落一條鋪滿雪嘅樓梯.....名附其實嘅秘湯呀~~

落埋條樓梯就見到個混浴露天風呂啦~~

(官方網頁圖片)

望過去見到都有七、八個人響度浸緊.....風呂旁邊有間木屋仔，應該係更衣室~

落到去間更衣室發覺好簡陋嫁，一邊男一邊女，連門都無！一路除衫一路可以同老爺隔住塊板講野，而且因為無門關係，企響度已經可以望到個外湯，即係話基本上個風呂某D位置係可以望入黎女更衣室！.....呢度又係無沖身設備，又無暖氣，真係凍到滕滕震.....

下面張相係響蟹場嘅宣傳單張影嘅，想俾大家睇個更衣室係好open好簡陋嫁~~

除晒衫包返條毛巾就出去跳入溫泉度浸.....呢個浴池都幾大，而且D水好似熱過鶴の湯，一路浸一路欣賞四周嘅雪景，個感覺真係好正好舒服呀！.....個湯周圍都係鋪滿白雪嘅樹景，伸出手就可以玩下雪，好過隱嫁~~~

下面張相係經過裁剪.....呢個只見半身圍住毛巾只係唔覺意露左小小膝頭嘅人就係我喇.....上半身係唔可以睇嫁~~~

留意下呢個湯D泉水比鶴の湯清好多，水入面仲有一條條好似蟹肉咁嘅野響度浮浮下.....唔知係咪咁原因所以叫蟹場溫泉呢~~~

同我地一齊浸呢個湯嘅大部份都係男人，除我之外只有一個女人，佢都同我一樣有圍毛巾，另外仲有一班後生D嘅男仔.....咁我梗係唔放過機會落足眼力睇俊男啦.....老爺就慘D，因為果個女人身型比較龐大，老爺話無咩興趣睇喎......浸左一陣連個女人都走埋~~

呢個湯周圍好多石，細心睇石頭同石頭之間嘅空隙都有好多一條條類似蟹肉嘅物體....都幾核突....

浸夠後就上返去著衫，今次有經驗醒水帶定多條乾毛巾抹身~~

著晒衫離開時，有個男仔唔知做乜野赤裸裸咁蹲左響個湯旁邊果條小路度，佢背住我地面向條樓梯唔知望乜，我地行又唔係唔行又唔係....佢D同伴就笑住呼喝佢，佢先知有女仔響佢後面昅緊佢.....跟住就好鬼尷尬咁起身跳返落水，當然響佢掉轉身半向我地嘅時候，佢嘅全相已經一覽無遺啦......所有人都忍唔住笑晒~~~~

出返去大門口著返鞋就離開喇.....呢間旅館嘅外形雖然唔及鶴の湯同妙乃湯咁有特色，但係個混浴露天風呂就好隱蔽，而且環境優美，以混浴黎講一D都唔差得過鶴の湯，值得推薦~~~

Bye bye 啦~~~

告別蟹場，我地繼續向孫六溫泉進發.......

---> Day 2 - Part 2 趕頭趕命泡孫六