PIGGYBREAD: 2009年2月日本東北8日溫泉之旅 - Day 2 (Part 1 鶴之湯超騎呢泡湯記)

2月15日星期日 (東京 > 田沢湖 > 乳頭溫泉鄉)

今日係旅程嘅第二日，一朝早起身就已經好興奮，因為今日開始要正式離開東京去東北連續玩五晚~~

朝早唔係好願起身，要搭八點半新幹線，七點半鐘先去食早餐.....呢間酒店包先助早餐，不過野食真係非常一般~

食完早餐就上房執埋D行李，check out 後將兩個大行李箱寄存響酒店，然後就出發去搭新幹線喇。

其實之前一路都愁緊，因為要響東北連續過五晚夜，究竟應該帶一個大喼上路好，定帶細個D嘅旅行袋呢，由於每日都要轉幾程車，如果帶大喼就驚上車落車好麻煩，但帶細旅行袋就拎得辛苦而且都唔係好夠，成五晚咁多都有好多衣物同日用品，最後老爺決定都只係拎兩個可以抽又可以拉嘅旅行袋，因為怕途中有D地方會無大locker放大行李箱，事後發覺呢個決定係正確架，最主要係因為有幾程車係D細van，D座位已經好窄，如果拎大行李箱真係唔知點放~~

今日嘅目的地係秋田縣嘅乳頭溫泉鄉，呢個地方JR係去唔到架，需要先搭新幹線去田沢湖然後再轉巴士。乳頭溫泉總共有七個湯，其中一個名湯--鶴の湯嘅地點好隱秘，公共巴士係去唔到架，要預約旅館專車響某個巴士站等接送.....秘湯嘛，梗係轉折D啦~~

我地搭8:28開嘅Komachi 7 號去田沢湖~

無得一齊坐，兩個位隔左條走廊~~

途中開始見到雪山喇~

坐左成三個鐘頭車，11:34終於到田沢湖車站喇.....

叫得田沢湖，顧名思義係一個湖啦，不過田沢湖車站離個湖都好遠，如果想去湖畔就需要搭大約十分鐘嘅巴士先到架，個情形就好似北海道洞爺湖咁~~

出左閘就首先去觀光案內所，入面D職員識講D英文架，溝通大致上都無問題~~

今晚我地會入住乳頭溫泉鄉嘅妙乃湯，日間就打算去鶴の湯、蟹場同孫六溫泉浸日歸浴。所謂日歸浴嘅意思，係指只係日間響溫泉旅館浸佢地嘅溫泉而唔住宿，我地未試過咁樣浸溫泉，所以好緊張~~

因為鶴の湯係日本第一秘湯，所以好期待，亦算係呢次旅行嘅其中一個重點....佢嘅入浴時間只係到三點，所以第一站一定係先去鶴の湯囉。

由田沢湖火車站去乳頭溫泉鄉需要搭當地嘅羽後交通巴士，之前響網上check過時刻表，大約一個鐘頭一班巴士，途中會經過田沢湖畔，原本我諗住搭12:10巴士先去田沢湖畔，響果度hea一個鐘食埋午飯，然後就catch 13:27巴士去アルパこまくさ站再轉旅館專車去鶴の湯，浸一個鐘再搭14:44巴士去妙乃湯........不過最後老爺話響鶴の湯得一個鐘驚好趕，果一個鐘嘅時間仲要包埋來回アルパこまくさ站至鶴の湯，況且話晒鶴の湯係日本聞名秘湯，應該留多D時間響果度浸完浴都周圍逛下同食埋飯，至於田沢湖畔就睇情況或者聽朝先去囉.....事後又發覺老爺嘅決定係正確架，因為我地響鶴の湯真係好 "呢 hea"，預一個鐘嘅話係唔掂架~~~

於是我地就請觀光案內所嘅職員幫我地打電話俾鶴の湯，預約旅館專車12:44響アルパこまくさ站等我地喇~~

之後就響觀光案內所旁邊嘅羽後交通案內所購買巴士票~

響火車站隔離間Kiosk買左D小食就夠鐘上巴士喇.....

出左火車站嘅右手邊就係巴士站~

同火車站講bye bye喇......天公不造美，無落雪不特止仲落雨....

巴士入面有電子顯示屏show站名同車資，唔使驚落錯車~

巴士行左十零分鐘就經過田沢湖畔，望過去灰濛濛一片，落住雨嘅湖好冷清，好彩聽老爺話唔嘥時間響度hea.....

東北天氣嘅變化好大，離開田沢湖嘅時候係落住頗大嘅雨，行左一段路就開始變左落雪.....雖然已經唔係第一次見落雪，但依然好開心！......巴士經過迂迴嘅山路，大約30分鐘後就去到アルパこまくさ站，鶴の湯嘅專車已經響度等緊，巴士上原來都有好多人同我地一齊落車轉去鶴の湯~~

唔知係唔係因為今日係星期日，所以比較多遊客，成架旅館專車都坐滿晒人.....架車行左大約十五分鐘先到鶴の湯，沿路所見搵個人都無，行嘅都係九曲十三彎嘅山路，D雪愈落愈大，真係好有一種尋幽探秘嘅感覺~~

終於到左呢個日本第一秘湯啦~~~~

響白雪紛飛之下，成個鶴の湯好似被掩埋響D雪入面咁，好靚呀~~

門口有間雪屋呀~~

響門口興奮左一陣就入去.....

經過一條長長嘅雪路就開始左我地呢次十分之超騎呢嘅泡湯之旅喇....

雪路兩旁都係D古樸嘅芧屋~~

一路行一路掛住影相，行行下已經唔見晒一齊行果D人.....咦！點解行晒條雪路都唔見有reception喎，周圍都係一間間芧屋咁，唔對路，唯有行返轉頭，搵左一陣先見到有間事務所，應該就係reception掛，入去睇下，原來好多人已經響度排緊隊~~

排左一陣都未輪到我地，老爺話咁唔係辦法，前面果D人都好似係住客做緊 check in....於是我地就趁有個類似職員嘅人響前面閃過就攔截佢話想 onsen only 囉，佢就叫左我地行去前面個counter仔，跟住就科水俾入浴費，每位500 yen~

俾左錢我地就問埋佢地陣間搭返專車出去嘅時間，佢俾張野我地睇，14:20有班車，都無話要預約實，總之夠鐘就自己上車，遲者自誤....之後我地就問有無locker放低行李，佢就將我地果兩件旅行袋放左響入面近門口嘅位置，然後問我地個名，係咁意搵塊布鋪響兩個袋上面，叫做摭住個袋睇佢唔倒咁囉......但係我地仲有隨身行李喎，問左佢話更衣室入面仲有locker之後，我地就出發去浸浴喇......我諗當時因為實在有太多人同一時間塞住響個事務所，佢地根本應接不暇，所以都唔得閒同我地講解下浴池響邊 (其實我都唔知正常情況下佢地會唔會講解，不過後黎響蟹場就有囉~~)

出到去行過左條橋就見到男女湯喇....

但係點解唔見個聞名嘅露天混浴嘅？？？又無指示.....咁因為以前我地都試過去一D可以著住泳衣、男女一齊浸嘅溫泉樂園，都係首先各自入左去男女湯換衫沖身然後再出去溫泉度會合，所以今次我就自作聰明以為都係咁囉.....

我地諗住首先一齊浸左個混浴先，然後先再各自浸內湯，於是就約定入左去就拿拿聲沖身然後就響混浴見啦~~

一趟開女湯度門就見到好多對鞋放左響地上，除鞋除襪後就走入去，入面好簡陋架，只有兩排木架，上面放左D籃俾人放物品，連毛巾都無供應，好彩之前睇過網友嘅經歷，知道呢個湯女性係可以圍毛巾，所以之前一晚我已經響酒店攞左條好大好厚嘅白毛巾.....

入面有幾個女人已經響度除緊衫，咁我就又跟住除衫啦，除除下突然醒起有個隨身袋喎，又話有locker嘅？望下原來只有一排好細嘅locker咋.....是但啦，個袋放響個籃度都唔緊要啦.....咁我咪攞晒D証件呀銀包手錶咁諗住放入個locker仔入面，點知原來要100 yen架！.....Shit!! 我邊有散銀啫，一向都係老爺管錢，佢淨係俾左幾張一萬yen 我傍身咋.....咁點算好呢，於是就好天真咁諗男湯果邊應該都係咁上下啦，老爺或者估倒我無100yen 會響出面等我呢 .....麻鬼煩唯有攞返晒D野著返衫褲鞋襪走返出去....結果當然唔見老爺蹤影啦 (其實老爺真係有出返去搵我，不過兩個人D時間唔夾咋，佢等左一陣就閃返入去男湯喇).....呆左一陣，無辦法啦唯有將所有衫褲摭住個袋放響個籃底囉，於是又入返去除鞋除衫.....入面其實係無暖氣架，好鬼凍呀，一路除衫一路喊驚咁.....

除晒衫褲圍住條毛巾就去搵沖身嘅地方，但係點解唔見嘅？我記得響EC2睇過網友話有架，仲話D污遭水會流入個湯度.......算把啦，咁我搵唔倒都無辦法.....於是就放棄沖身索性去搵個混浴啦，點知又係搵極都搵唔倒！只係見到個女內湯......大鑊！唔通個混浴唔係響呢邊？！其實之前響網上睇過鶴の湯個 web site，不過老人痴呆症發作完全唔記得個混浴位置.....諗下諗下唔對路，照睇個混浴九成響第二度，本來諗住已經除晒衫不如浸左個女內湯先啦，但係又記起同老爺約實先浸混浴嘛.....頂！於是唯有又(!)再著返晒D衫褲，執返晒D野連襪都唔著只係穿返對鞋就走返出去搵混浴喇.....

百忙中見女湯突然間無晒人就拿拿聲啪張相先~~

出到去依然唔見老爺影蹤.....行過D就見到個女性專用露天風呂~~

大家一路睇相都見到D雪愈落愈大，當時又凍又大雪，又搵唔倒個露天混浴，真係好忙亂，心情真係好緊張，所以之後發生嘅疼事真係唔怪得我.......

行過另一面，見到有條路唔知通去邊，於是就行過去睇下囉.....Oh! No!! 原來個露天混浴真係響呢處！！......好多人赤裸裸響度浸緊呀~~~~~

睇下下面個location plan，大家就會好明白我係點樣走黎走去......由事務所行出去經過條橋就見到個黑湯同白湯，我地以為個混浴係響黑白湯嘅後面，最初我入左去個白湯，老爺就去左黑湯，又除衫又著衫一輪之後，先走去右手面混浴露天風呂果邊~~

企響個混浴湯邊搵左一陣都唔見老爺，見再前D有間木屋仔就走過去睇下，原來係更衣室，又係好簡陋架，一樣無沖身嘅設備，真係奇怪，唔係話日本人好自律會沖乾淨晒身先去浸浴咩？點解個個湯都無得俾人沖涼架！......唉...唔理咁多啦又再除過晒D衫褲鞋襪.....好Q凍~~，呢間木屋仔好似透風咁，仲凍過之前果個女內湯，一路除衫一路媽媽聲，快手快腳除晒所有衫褲後，圍返條毛巾就由原路衝返出去.....嘩！唔著鞋行果條鋪滿石仔嘅路對腳真係好Q痛，而且好多遊客行緊過黎，我只係圍住條毛巾真係好鬼尷尬.....(其實更衣室後面有另一個出口係唔駛經過原路就直接可以去到個混浴，不過我太緊張無去check清楚....(歎氣~))

硬住頭皮走返去個露天混浴度，正準備跳落去個溫泉之時，忽然聽到老爺呼喚我呀.....Yeah!!! 終於見返老爺啦~~~~

原來老爺又係周圍搵緊我，我就叫佢快D去換衫啦，佢見我已經準備去浸就問我響邊度換衫，咁我就話後面果間木屋仔就係更衣室，不過我只係見到有女更衣室咋....唔係掛，老爺半信半疑，淨係得女更衣室？唔通要響男湯果邊除晒衫再走過黎呢邊？！我就話真係唔覺呢邊有男更衣室喎 ......咁佢見我只係包住條毛巾，又落住咁大雪，唯有叫我快D落去個溫泉度浸住先，佢去男湯果邊換埋D衫就過黎啦~~~

各位，其實間更衣室係有分男女架，就響女更衣室隔離，不過好簡陋只係搵塊板隔開左，而我實在太緊張發雞盲所以無留意.....

就係咁樣，當我響個著名嘅混浴享受緊熱喇喇嘅溫泉之時，亦都係老爺經歷佢呢一生最慘痛嘅時刻......

佢走返去男湯果邊，除晒衫褲鞋襪後，拎住一條毛巾仔將佢摭住全身最重要嘅部位，然後就赤裸裸咁沿住條小路走返去混浴呢邊~~

呢條就係老爺赤裸裸走過嘅小路~~

唔好睇呢條路好似好短咁，試想像當你全身一絲不掛，只得一條丁屎咁大嘅毛巾仔，摭得前唔摭得後，響大雪紛飛下赤腳咁行呢條鋪滿沙石嘅雪地真係好惡頂.....最主要係，呢張相係後黎趁無人時補影架咋，當時係有好多遊客響度行黎行去，好似睇老爺表演咁.......諗起都覺得可怕........

老爺飽受一眾途人貪婪嘅眼光，以保特百米選手嘅速度走返黎混浴呢邊同我會合.....經過左呢一連串咁騎呢嘅經歷，幾經辛苦終於可以一齊浸呢個日本第一秘湯，兩個人真係有種彷如隔世嘅感覺！

下面兩張相係轉載自鶴の湯嘅官方網頁，呢個秘湯嘅泉水係奶白色架，好似左面張相嘅色水，我覺得自己好似浸緊牛奶浴咁囉.....而當時真係好多人一齊浸，D人仲多過右面果張相，所以唔好意思影相~~

唔知係唔係因為露天嘅關係，個溫泉D水唔係好熱，不過當時落住好大雪，D雪飄落塊面度凍冰冰，但個身浸響水入面就好暖，個感覺真係好正、好舒服...，再加上四周係樹木蘆葦，又有古樸嘅木建築，後面係雪山，成個湯彌漫住淡淡嘅硫磺味，每個人都剝晒光豬，真係好似同大自然融為一體咁......

現場所見，D女人全部都包晒毛巾先落水，不過有人D毛巾好薄，一起身條毛巾貼住晒，成個身形表露無遺.....好彩我醒目條毛巾勁厚，所以響個溫泉度行來行去一D難度都無.....至於現場嘅男士，最初我都唔係幾好意思望佢地，不過諗下有得望無理由唔望咁嘥架，有D男人上水落水都會用條毛巾仔摭住重要部位，不過有D就一D避忌都無，大模斯樣俾個小弟弟你睇.....最可惜係個個都係麻甩佬，想搵個靚仔睇下都無......

呢個秘湯都好大，可以容納幾十人架......有一邊有條喉開左條水柱，有班男人響果邊浸完移過黎我地旁邊時，示意我地過去條水柱果邊浸.....嘩！原來果邊D水近源頭，所以D水熱好多架~~

其實所謂嘅日本第一秘湯，我諗係指位置偏僻、交通轉折啫，講到呢個混浴本身其實一D都唔隱秘，因為要通過條小路先去到個更衣室，個溫泉就響正條小路旁邊，D人無論係唔係浸混浴都好，一行過絛小路就望晒成個溫泉，響溫泉浸緊果班人 (即係我地...)只可以好無助咁俾D遊人睇晒架.....

浸左無耐我地開始發覺好多人響溫泉嘅另一面落水.......原來響個更衣室後面有出口直達混浴架......最重要係好多男士由個更衣室走出黎....呢個時候先知原來呢邊真係有個男更衣室！.....老爺響果一刻雙眼幾乎想向我放毒箭，我從來未見過佢咁幽怨嘅眼神，最慘就係一陣間佢仲要再一次赤裸裸走返過去黑湯果邊....唉....唔好意思囉，咁我頭先真係見唔倒嘛.....

同老爺一齊浸左十幾分鐘真係好唔捨得走，咁原始嘅露天混浴真係唔係成日有機會浸架，不過幾唔捨得都唔可以浸太耐，D手指開始縐皮.....本來我仲想浸埋個白湯同女性專用露天風呂，不過無帶錶唔知時間，我地要搭14:20果班車出返去，老爺話頭先騎呢左咁耐恐怕已經嘥左唔少時間，我仲要響呢邊著返衫行返過去內湯果邊再除衫，邊夠時間喎.....佢就好D，因為就咁走返過去即刻就可以浸.....(哈哈~~~)

於是我地懷住非常不捨之情咁各自離開個風呂，臨上水之前掉過頭望下老爺，佢已經上返條小路，咁啱有兩個人行緊過黎正眼金金咁望實佢......只見佢緊緊地將條毛巾仔護住前面最重要嘅部位，但係後面個 pat pat 就被人一覽無遺......雖然慘不忍睹，但係果一刻我真係忍唔住笑左出聲~~......而家每次諗返起都仲想笑架~~~~~~~~

走返去更衣室，想話著返D衫，先醒起無帶多條乾毛巾抹身....Shit!! 果條用黎包身嘅大毛巾濕左水之後不知幾重，我都唔夠力將佢扭乾.....無辦法最後只有用tissue係咁意抹下身算囉.....著返晒D衫後行返去內湯果邊，老爺已經攪掂響度影緊 video cam ....睇下個錶嚇一跳原來就快兩點！

快手快腳響度影返幾張相先啦......