2009年2月日本東北8日溫泉之旅 - Day 2 (Part 3 趕頭趕命泡孫六)

2月15日   星期日   (東京 > 田沢湖 > 乳頭溫泉鄉)

離開蟹場就快步向孫六溫泉進發....行返出去大釜溫泉，旁邊有條路棟左個牌指示去孫六嘅方向....

呢個溫泉嘅地點好偏僻，公共巴士去唔到不特止，私家車去到一半亦都入唔倒去，因為後段D路好窄，一定只可以步行先去得到....真正嘅秘湯呀~~

去孫六途中會繞過妙乃湯嘅後山，望過去見到旅館外面嘅人工瀑布嫁~~

由蟹場去孫六需要行大約二十分鐘，呢個旅館日歸浴嘅時間係至到五點，當時已經過左四點，真係好趕.....

其時天色已經開始暗，沿路一個人都無，又唔覺有街燈，我地個心開始十五十六，因為無帶電筒，有D擔心陣間浸完返出黎個天會黑晒，而且行左一陣，個天仲開始落起點點嘅雨雪.....

感覺上好似已經行左好耐，但係條路行極都好似行唔完咁，好耐先見到有一、兩組人迎面同我地相遇，應該係浸完孫六離開.....我地開始猶疑係咪應該打退堂鼓掉頭放棄.......

睇下係一條好似無止境嘅山路，渺無人煙嫁.....

不過最後我地都無放棄，因為難得一場黎到，今次唔去唔知幾時先再有機會黎過....旅行嘅野我成日都覺得好講因緣際遇，唔係有錢就可以，每去一處地方其實要配合好多野嫁~~

決定左照去，我地就加快腳步.....其實沿路嘅環境都幾靚，每一處地方都好似比D雪蓋住晒，四周白茫茫一片，成個世界好似只係剩得我地兩個人咁，老套D講句，即係有一種地老天荒嘅感覺，好浪漫......不過我地掛住趕路，行到成隻狗咁，都無時間停低慢慢欣賞浪漫一番，連相都無乜點影.....

行到幾乎嘔白泡終於去到 (真係！唔知點解次次去親日本都要趕頭趕命咁~~~)......呢個時候發覺相機無咩電！......我地只係帶左一部相機出黎，又唔記得帶多舊電，所以無影到門口.....(又俾機會老爺翻白眼....)

呢間溫泉旅館仲奇怪過鶴之湯，未去到門口響條路嘅右手面已經隱約見到露天風呂，咁嘅設計，真係衰D唔俾入浴費走入去浸左都無人知.....

行到入去reception入面，裡面靜悄悄，鬼影都無一隻，叫左幾聲無咩反應，正當唔知點好之際，忽然有個阿伯施施然咁出現，佢個樣好似啱啱瞓醒咁，仲呆滯過我地，望住我地木口木面.....見佢咁吽睇怕十成唔會講英文，於是我地都唔嘥時間同佢講野，就自動自覺攞1000 yen俾佢，佢面黑黑收左我地錢，一句野都無講過，唔知係咪嫌我地阻住佢瞓教.....

我地走返出去，成間旅館靜英英，真係好懷疑有無人入住.....行返出去有絛樓梯仔落去風呂果邊，好快就搵倒更衣室，一個人都無.....呢度個更衣室好過蟹場果邊，有門.....不過或者係開始夜嘅關係，氣溫仲凍過之前，一路除衫一路媽媽聲.....

除除下衫忽然聽到老爺響另一邊把聲問得未....就得啦.....到左呢個時候，我地已經無諗過要搵沖身嘅地方，一來唔知響邊我地趕時間費事搵啦，二來無耐之前先浸過兩個湯，咩都乾淨晒啦！

攪掂包返條毛巾就推開另一邊門出去，見到個露天風呂，無人，但係亦唔見老爺喎，應該係女性專用外湯......走返入去更衣室大叫問老爺響邊啦，原來仲有另一個門口通去混浴露天風呂.....入到去發覺係個室內混浴，要落條樓梯，有個男人響度浸緊，今日都未浸過內湯，好想試下，不過個風呂好細，無理由走入去同個男人一齊迫架.....呢個時候老爺響出面伸個頭入黎叫我出去.....

個混浴露天風呂就響室外.......出面...好...凍...呀)))))) 對腳仲要踩落D雪度，簡直慘過受滿清十大酷刑~~~~~

即刻衝落去個溫泉入面......呢個風呂唔係好大，不過一個人都無，正！終於可以同老爺享受下二人世界喇~~~~

半身人又出現喇......孫六呢個混浴嘅泉水係三個湯之中最清徹嫁~~

浸左一陣，個人已經暖返晒，周圍望下，發覺響隔離過D仲有另外一個露天風呂，於是又走過去浸下.....另外呢個風呂仲細D，不過因為一個人都無，所以我地浸得好舒暢，浸左一陣都係走返過去大D果個度浸，玩下雪又玩下水，真係好鬼正.....好似浸緊私家風呂咁呀~~~

玩左其實唔係好耐就要起身走，老爺驚出返去天黑段路好難行.....返入去室內，好想浸果個混浴內湯，不過個男人仲響度浸緊，見我地入返黎都無意思起身走.....心入面忍唔住@#$@%!!!.... 阿哥，唔走都唔該移過小小俾D位人浸下得唔得.....

下面張相係影自孫六嘅宣傳單張嫁，想俾大家睇個混浴內湯.....真係好細咋，當時個男人就係exceptly好似張相入面個男人咁坐正響中間，佢赤條條嫁，你話喇，我點好意思走入去同佢一齊浸喎~~~

走返去更衣室，準備著返衫，諗下諗下，雖然好趕，但都係順便去浸埋個女外湯啦.....出到去見又係無人，即刻跳落個溫泉度浸浸，都唔敢浸得耐，好快就走返入去更衣室，老爺已經響另外一邊呼喊催我快D，拿拿林抹身著衫出返去就走喇~~

離開孫六，就雞咁腳沿返條雪路走喇.....天色無想像中咁暗喎，梗係啦，頭尾都唔夠半粒鐘，早知浸耐D啦~~~

行到返去大釜，燈亦已經著左....睇真D乜原來大釜係某小學分校？

終於返到去妙乃湯.....今日三個秘湯總算叫做順利浸過，最後黎到主打妙乃湯出名嘅金銀湯喇，到底我地兩個傻仔又會唔會發生瘀事呢？.....請看下回分解......

---> Day 2 - Part 4 妙乃湯‧上篇