2009年2月日本東北8日溫泉之旅 - Day 3 (Part 4 松島二‧絕景の館)

2月16日   星期一   (妙乃湯 > 角館 > 松島)

返到去酒店個天已經黑得七七八八~~

酒店門口有名牌寫住當日住客個名嫁.....但係點解會將我地當成from花川??

我地間房係和室~

間房雖然唔係好大，不過基本嘅設備好似電視、夾萬、暖爐都有......講真其實論房間嘅設施係好過妙乃湯 (至少有電視)......有toilet但係無浴室，露台出面個私家風呂旁邊有得沖身，不過咁凍嘅天氣無咩人會頂得順響出面沖掛，只可以落去樓下大浴場沖涼囉~~

七點鐘先食晚飯，趁空檔當然去大浴場浸浸浴先啦~~

女湯個更衣室設備都好齊全，仲有細細個locker~

唔好睇呢間酒店好似好細間，個女湯化妝間有齊女性所需嘅野，除左風筒，仲有髮箍、綿花棒，潔面lotion同護膚面霜都有....

呢間酒店嘅男女湯都各有內湯同外湯......沖涼後就先響內湯浸暖個身，有兩個女人響內湯一路浸一路嘰嘰喳喳講唔停嘴.....浸左陣內湯就走出去個外湯睇下....出到去無人噃，正！自己一個人浸晒~~

個外湯其實算係半露天，有排矮花棚摭住個海景，如果夠高可以望到個海同福浦橋，同響房望出去差唔多，不過我太嬌小，彈跳埋都睇唔到，見無人就走上池邊企高望.....嘩！D冷風迎面吹過黎，夾離點點嘅雪花，好Q凍...，不過個海雖然黑媽媽，但係條福涌橋著左燈，望落去都幾正......望左陣實在頂唔順，跳返落個浴池度繼續享受一個人浸浴嘅悠閒~~

下面呢張係酒店網頁圖片....我就係赤裸裸咁一條友企高左響個池邊對住個花棚打晒冷震咁欣賞個夜景.....如果當時有人入黎一定會以為我係傻嘅~~

浸夠後就離開，果兩個女人仲響度雞啄唔斷喎.......著返衫出返去，老爺已經浸完，又響度飲緊水....

呢處係俾人泡湯之後hea 嫁.....可以沖茶飲，或者凍檸水都有....坐左陣，開埋電視睇，好舒服呀~~~

Hea 左陣就返入房等食晚飯.....呢D梅係迎賓菓子，好好食嫁~

呢間酒店嘅晚餐係響自己房食嫁.....準七點就有兩個女侍攞住一盤盤野食入黎....

擺好晒之後嘅陣容係咪好鼎盛呢~~

開餐啦~~~老爺已經急不及待......

前菜....左面果D蜆肉好好味嫁~~

好豐富嘅sashimi！D海膽好甜呀~~~

長腳蟹刺身

炸蠔

唔記得係咩喇....好似係魚掛??

牛脷、生蠔、蝦、蟹腳.....要自己燒嫁~

D生蠔好好味呀~~~

呢個羹入面有好多類似魚翅嘅物體.....唔知真定假....

茶碗蒸蛋

個湯清清地，正好中和一下.....

甜品....~超讚！

食到飽飽，今晚呢個晚餐真係好正，再加上響自己房食，雖然坐tatami，但係鍾意點坐都得，棟高隻腳又得....瞓響度食都得啦.....

之後就call D女侍入黎收拾，然後佢地就幫我地鋪埋床舖~

攤抖夠後梗係去浸下個私家風呂啦.......個風呂係一個陶缸，有個蓋響水面用黎保暖嫁.....不過D溫泉水擺左大半日已經唔熱......

旁邊有電子溫度器調較溫度同加水....

等左一陣D水就熱返晒.....拿拿林除衫沖身先....

好簡單嘅沖身設備，露台鬼咁凍，我地只係開猛熱水係咁意沖一沖身然後就跳落個缸算.....

呢個私家風呂唔係好大咋，一個人浸係無問題，兩個人一齊浸就要屈小小腳囉....不過總括黎講都OK嘅，而且因為間房唔係好大，個電視咁啱係向住個風呂，當時做緊Smap，將個電視移過小小就可以一路浸一路睇，真係浸到有D唔願起身......

浸完浴因為房間入面無風筒吹頭髮，所以就走去大浴場個更衣室度吹，橫掂去到就浸多次個半露天風呂啦.....又係無人，自己一個人霸晒成個風呂，再加上外面仲落住雪，有好多雪飄左入黎，真係好正呀~~~

之後就返去房瞓教，老爺等我返黎已經等到洽緊眼瞓......今日嘅行程要完結喇，因為我地打算聽朝晨咁早起身睇日出，而且聽日就要去我地期待已久嘅藏王山呀~~~

---> Day 4 - Part 1 松島三‧日出篇