2009年2月日本東北8日溫泉之旅 - Day 4 (Part 10 藏王國際‧溫泉篇)

2009年2月17日   星期二    (松島 > 山形 > 藏王山)

食完個晚餐差唔多八點，都無時間去消化下就要即刻去浸溫泉~~

返到去房見到已經幫我地舖左床鋪喇.....唉，一下子醒唔起溫泉酒店通常都係襯住客人去食晚飯時幫佢地舖床，下午黎嘅時候趕頭趕命，都無時間影下間房，而家又無得影未舖床前嘅樣喇.....

不過都可以係咁意介紹下嘅，呢間酒店D個室都真係幾大，值得同大家分享下~

呢個係門口玄關位，都幾闊落嫁~

靚靚嘅裝飾，插香薰用~ (好想攞走佢，不過老爺唔俾....)

Pantry

唔好以為響呢度洗面刷牙喎，呢個係小型廚房咋，睇怕你唔會響屋企個廚房sink盆刷牙掛? 未俾亞媽鬧過咩~~

呢個先係洗面嘅地方....兩個洗手盆，唔駛爭，正呀! 不過爭張凳....

仲有電動乾毛巾掛架~

浴室，都幾大嫁，不過我地都無用過~

休憩嘅地方......睇下講左咁耐先黎到主廳，證明間房真係唔細~

電視 (好無聊...)

張茶几本來放響房中間，而家因為擺左床鋪，所以推埋左響電視前面....枱面已經俾我攪到亂七八糟....

茶具

迎賓菓子....右手面嗰D係藏王名物，叫稻花餅，都唔錯幾好味~

 

 

介紹完間房，又講返風呂喇.....拿拿林換過浴衣就去reception counter度攞鎖匙....真誇張，除左要登記，仲講到明需要響20:50分交返鎖匙俾佢~

除左鎖匙，仲俾左個籃我地，入面係個風筒~

呢間酒店真係幾大，由reception行去風呂區都要行一段時間~~

貸切風呂入口....由入口行入去都仲有一段路，不過環境幾靚.....

酒店總共有三個貸切風呂，佢地安排左森の惠み湯俾我地~

嘩，間貸切風呂真係好正，地方又大設備又齊全，好舒服又夠私隱! 

同大家介紹一下.....首先係面積都真係好大下，成個貸切風呂分隔左兩面，一邊係風呂同沖身地方，另一邊係化妝間同休息嘅地方~~

休息嘅地方個地下鋪晒蓆，好乾淨好舒服嫁~

仲有電暖爐，除衫唔駛媽媽聲~

化妝間D野都好齊全好四正喎~

浸完浴仲可以坐下攤抖下，玻璃後面就係風呂喇~~

沖身嘅地方....呢度當然無暖氣啦，一路沖身一路喊救命

.....

呢個就係私家風呂喇，兩個人浸綽綽有餘....

溫泉水係偏奶白色嫁，同埋D硫磺味都幾重，D水仲好鬼熱tim....不過浸左一陣就慢慢適應喇.....好正呀!! 浸到幾乎唔想起身~~

浸完就坐低影下相先啦~

以呢間酒店嘅貸切風呂黎講，其實得一個鐘頭係好唔夠嫁，五十分就要俾返鎖匙，reception同風呂一來一回又無左五、六分鐘，換衫同沖身又唔見咁D時間，仲有影相呢.....實際浸浴嘅時間唔係好長，所以真係唔係浸得好夠本囉~~

交返鎖匙後我地就順手各自去浸下個大浴場同佢最出名嘅八右衛門之湯啦~

貸切風呂D設備都咁齊全，可想而知public bath有幾正啦，入面好鬼大，裝修都好新好靚....呢間酒店D裝潢全部都係木建，樓底又高，真係幾好feel ~~

以下三張相都係酒店網頁圖片....我去嘅時候入面好多女人響度，所以影唔倒相~

大浴場

露天風呂....真係好靚嫁~~

個露天風呂都好大，雖然係露天，但係D泉水都好夠熱，硫磺味仲勁重，應該唔會係假掛....(我地好小人，自從日本有新聞話有D地方嘅溫泉唔係純正溫泉水，我地每去一處溫泉就會推敲佢究竟係真定假!...)

以前對於自己一個人去浸女湯始終有D唔係咁習慣，總要搵條毛巾摭摭掩掩，自從去完呢次東北返黎，可以話已經完全習慣晒，個轉捩點其實就係響呢個露天風呂....當晚好多女性一齊浸，有兩班好後生下嘅女仔響度浸得好熱鬧，佢地響個浴池度走黎走去，赤裸裸咁響你面前行過，一D唔自然都無.....雖然望住佢地D身材好自慚形穢，但係見佢地咁自然，諗深一層，大家都係女性，佢有嘅我都有啫(雖然佢有嗰D比我嗰D有睇頭好多，不過我後生時都曾經一度叫嗒得杯落嫁....哈!!)，黎得浸浴就應該毫無保留咁豁出去，講真，大家三唔識九，又有幾多人會真係好刻意咁留意你喎~~

雖然浸呢晚無乜落雪，但係咁正嘅露天風呂，抬高頭望住個夜空個感覺真係好舒服，浸到又有D唔願起身呀~~

浸夠後著返衫就出返去搵老爺，點知條友仲未浸完出黎，咁就周圍影下相先啦~~

呢度係外面俾人hea嘅地方，旁邊有飲用水供應嫁~

另外又有溫泉水飲，個擺設好古色古香~

等左一陣老爺都攪掂出黎....離開時行過見到有足湯呀，梗係唔放過入去浸一野先啦~~

老爺隻天蠶腳~

個走廊都好靚~

大堂

靚靚嘅蕙蘭~

南館lift lobby

返到房已經十點幾，hea左一陣就瞓教喇，而呢一日咁豐富嘅行程亦終於完結啦~~~

---> Day 5 - Part 1 早晨! 藏王山