鳴門@Mega Box

Mega Box 平時夜晚去就水靜河飛，但係星期六、日就鬼死咁多人，淨係排隊等入停車場都等到你火滾，D車位仲要上到去16樓先有，攪到我地尋日去UA差D趕唔切入場!

講返入面呢間鳴門，其實前身係目黑，裝潢間格都無乜點變，D野食同價錢都好大眾化，service 一般，兩個人食埋單$354~

海膽軍艦 $28，響北海道食過超正嘅海膽，返香港就算幾出名嘅食店你都一定唔會expect好鮮甜好好味，求其唔係太差已經算係咁~

呢個火焰三文魚芝士沙律壽司，$20咋，味道唔錯~

腐皮$9 (雖然$9 only，但真係好Q細舊!)， 鱆紅魚$15 (都OK啦)， 劍魚$20 (一D魚味都無)， 油甘魚$25 (唔錯) 

呢個網燒安格斯牛肉眼，$78，味道還可以，略嫌薄左D，最衰就係唔夠熱，上左無耐已經凍晒~

雜錦天婦羅 $55，D蝦都幾大隻，幾抵食~

海鹽燒蒜香雞翼 $32，普普通通，略嫌細隻~

最好食係呢個朝鮮燒三文魚腩，$35 咋!! 好肥美，明知又會加磅，都係忍唔到嘴同老爺爭食咁滯.....

另外仲叫左個三文魚手卷 $15，同吞拿魚腩手卷 $20，一黎到掛住食唔記得影相，不過老爺話個三文魚手卷真係一般，我個吞拿魚腩都算OK啦，咁嘅價錢想點喎~~

不過最令老爺唔老嚟係上壽司時竟然無跟wasabi!! 要問waiter攞，仲要係俾得一小舊....又要收茶芥一蚊位，雖然係一蚊，但有幾可聽過話日本食店要收茶芥嫁??

結論︰老爺評價麻麻地，無咩必要唔會再去.....