2009年2月日本東北8日溫泉之旅 - Day 5 (Part 1 早晨! 藏王山)

2月18日   星期三   (藏王山 > 山寺 > 山形 > 銀山溫泉)

旅程唔經唔覺已經過左一半，好快趣今日係第五日啦~~

今日晏左起身，八點幾先去食早餐.....

食早餐嘅地方依然係尋晚食晚餐嗰間宴會廳，食嘅係自助餐~

窗外嘅雪景好靚~

一朝早有酒店工作人員清理雪地~

食食下忽然有個稍為上左年紀嘅男waiter捧住碟野走過黎，佢話原來我尋日生日，酒店特別provide左唔同嘅甜品同生果俾我，不過佢尋晚一時攪錯左只係俾左普通料我地，所以今日補返俾我，仲一路講一路鞠躬一路猛咁say sorry.....

個生果同甜品真係幾正嫁，其實佢唔話俾我地聽我地都唔知啦，日本人真係好軍真，本來我對呢間酒店D service 嘅印象唔係咁好，依家就改觀左DD啦~

食完早餐已經九點，我地就去酒店隔離個滑雪場行下....可以睇返食早餐嘅地方~

呢條藍色嘅橋就係連接酒店同滑雪場嘅通路~

好多雪呀~

條橋下面原來係條溪澗，俾白雪蓋住好鬼靚~~

過左條橋就係滑雪場....

好多人一早已經響度滑緊雪~

成班人一齊學滑雪噃~

老爺睇到唔想走，又問點解行程唔安排滑雪.....滑雪? 唔好攪我掛，我同運動呢家野幾乎係絕緣，近呢幾年基本上我嘅運動量只限於拖下個地同陪陪小姪女玩!! 滑雪呢D咁激嘅野咪再預我.....早幾年去韓國玩都叫做有試過跟教練學過下滑雪，我知老爺鍾意滑，但對於我黎講，能夠響個小山坡滑落黎唔跌仲完成個乜鬼A字，已經好對得住鄉村父老，之後我已經決定左同滑雪呢樣野此生緣盡嫁喇~~

老爺好恨滑雪，話有機會再去雪山地方一定要俾時間佢滑雪.....其實都OK嘅，咁我下次揀一處可以俾佢去滑雪，而我又可以有地方shopping咪得囉~~

而家係咁意俾佢重溫一下藏王山滑雪高手嘅小小片段先啦~

之後我地就行返去酒店周圍影下相~

風呂區入口

尋晚我地浸足湯嘅地方~

呢度係通去南館嘅通路，環境唔錯~

呢條斜路就係出左酒店行去滑雪場嗰邊嘅必經之路~

又有人帶備雪具去滑雪啦~

返到去房已經差唔多九點半，執埋野就去check out，埋單35475 yen!

仲有紀念品送喎，對酒店嘅印象真係好返好多呀!!

幫我地check out係個男士，佢都幾nice，check out完我地就問可唔可以安排酒店車載我地去巴士總站，佢話無問題，請我地等等，我地仲諗住唔知會唔會好似尋日黎時一樣要等咁耐，點知個男職員好快就揸左架車出黎響門口，然後走入黎幫我地攞行李上車，仲做埋司機，門口兩個女職員又俾farewell candy我地食又鞠躬送我地上車......

今朝呢間酒店D service真係好好多，我條氣真係順返晒呀~~

下面張相車頭嗰個gentleman就係酒店幫我地check out同埋做司機嘅職員喇，佢真係俾尋日嗰個黑面司機有禮貌十倍呀!!

去到巴士站，將行李放左落locker，然後就出發去逛逛條藏王溫泉街喇~~

---> Day 5 - Part 2 漫步藏王溫泉街