2月17日 星期二 (松島 > 山形 > 藏王山)
坐完觀光船，離開碼頭.....碼頭前有一大片空地，大概係俾遊人響度欣賞個海灣~
可以望到五大堂~
我地沿住條購物大街行，時間比較趕，只係入左一、兩間店shopping~~
呢間南部屋之前響網上見過有網友話OK，不過我地無咩時間，只打算去海鮮市場搵野食~
松島海鮮市場響伊達政宗博物館後面，由碼頭行過黎只需要大約五分鐘路程~
呢個海鮮市場好細，一入去已經一眼見晒，而且有D舖無開.....行左個圈都唔見有聞名嘅即開即食生蠔，好失望......
但係一場黎到，點都要幫襯下.....我地揀左串燒帶子同生蠔，每串350 yen~~
呢間舖仔賣海鮮飯，不過叫左好多聲sumimasen先有人走出黎招呼.....十一點幾啦，仲未係做生意嘅時間咩???
我地要左個三色丼，1890 yen~
二樓有地方俾人買左野食後拎上去慢慢食，地方寛倘，設備齊全，冷熱水、筷子、調味一應俱備.....
開餐啦
D海膽好鮮甜呀)))))......咀嚼響口中簡直有種好幸福嘅感覺
食飽後差唔多十一點半，係時候要離開返去酒店.....
走嘅時候先發現原來附近有個展望台喎，幾古色古香~~
我地沿住海岸邊行返去酒店.....
其實成個松島都種左好多松樹~~
響山下已經見到我地住果間酒店.....
中間凸出黎有蓋嗰間應該就係尋晚去浸嗰個女露天風呂喇....我地間露天風呂附客室應該俾D圍欄摭住左~~
原來有條旅館專用通路，有條樓梯直上去旅館，唔駛行斜兜個大圈....(臨走先留意到....
沿石級上到去可以望到呢個景~
返到去酒店水靜河飛，一個人都無，按鐘等左一陣有個類似清潔女工走出黎，我地示意話攞返D行李，原來係咁意就放響reception counter下面.....跟住我地話想請佢幫我地call架的士去JR站，同佢用口用手溝通左一輪佢先明，之後叫我地等一陣就走返入去.....
我地要搭12:12開嘅JR返仙台，嗰時就快十一點九，所以有D緊張
再等多一陣，之前出左去嗰兩個女侍又走入黎幫我地拎行李，我地以為架的士到左，出到去發覺原來佢地搵左架私家車載我地，真係好nice呀.....
呢架就係我地架專車喇
嗰兩個女侍招呼左我地上車，然後就上埋前面座位，原來佢地做埋司機.....呢間酒店D女人真係一腳踢，由服侍朝食、夕食、check in / out、搬行李，甚至連司機都做埋，其間真係一個類似男性物體都未見過.....真係要大力表揚一下︰女人萬歲!!!!!....
車程唔係好長，但係嗰兩位女侍都有同我地搭訕，雖然佢地只係識少少英文單字，但係都聊得好開心.......專車好快就到左車站，佢地一路鞠躬一路送我地入車站，真係好多謝佢地咁體貼嘅service呀..
原本打算搭12:12班次，早左D竟然可以趕得切搭11:57早一班車~~
東北本線班次都幾密，平日都無咩人搭咁，車廂大部份都無咩人~
Bye bye 啦松島~~
講到呢度，呢一篇日誌應該可以告一段落，不過借此機會又想揭示一下老爺嘅惡行....
話說頭先響酒店臨離開之際，嗰兩位女侍叫我地出去上車，出到去發覺原來佢地揸左架私家車黎載我地，多謝佢地之餘，梗係要講清楚俾佢地聽個目的地啦，因為松島有兩個JR站，我地係去松島本線嘅松島站，去錯左松島海岸站就唔好啦......但係我地唔識講松島站個日文名嘛，咁咪諗住攞張地圖出黎show俾佢地睇囉......咁就大鑊嘞，一時間張松島市地圖響邊恕呢??????
理論上一向係老爺負責睇地圖搵地方，咁大家話嘞，係咪響正常情況下睇完張地圖係佢自己keep住啦！於是就叫佢攞張地圖出黎......條友係咁意摸左摸個衫袋就話無，咁都算，仲聲大夾惡好肯定話睇完已經即刻俾返我
當時我地企響酒店門口，門口上面唔知做咩滴緊水，我企正響下面，但係掛住搵野都唔覺俾水"dub"，個女侍好好人想拉開我行出D.......外人都識得體貼我啦，但係我家嗰件牛就淨係響旁邊猛咁催
大家睇下下面張相.....我兩個衫袋就係放滿晒呢D地圖單張，霎時間要人即刻揪張野出黎，真係佛都有火
發洩完畢，繼續行程，一連七篇嘅松島日誌終於寫完，下一站正式踏入山形縣......Bye bye
---> Day 4 - Part 6 令人忍唔住爆粗嘅藏王國際酒店
沒有留言:
發佈留言