PIGGYBREAD: 2009年2月日本東北8日溫泉之旅 - Day 4 (Part 6 令人忍唔住爆粗嘅藏王國際酒店)

2月17日星期二 (松島 > 山形 > 藏王山)

上一回講到離開松島向住山形縣進發.....山形可謂我地今次東北旅遊嘅重點，我地會響呢個縣住宿三晚嫁~~

由松島去山形，需要先去仙台轉車.....

12:24返到仙台....由仙台再去山形，可以有兩條線揀，一係搭東北新幹線去福島再轉山形新幹線去山形，二係搭仙山線由仙台直去山形......唔好以為搭新幹線一定快D，要轉兩程車加埋等車時間反而仲耐，仙山線快速直通車只需要73分鐘咋

.....當時12:45有班車喎，唔駛諗梗係搭仙山線啦~~~~

仙台站仙山線響7號月台~

火車準時開行，我地就好自然咁開始瞓~~~~

瞓左唔知幾耐，醒返去到一個叫作並嘅站，原來開始又落返雪.....

對面月台有兩個姐姐仔等緊車，咁凍都唔怕仲要著短裙....不過又真係幾靚噃~~~

響呢度要向大家推介呢條仙山線，除左快同方便外，沿途嘅景色真係靚到不得了，尤其係過左作並站，之後無耐會經過一條隧道，過埋條隧道後一路嘅雪景真係好好好好好~~正))))))...

叫得山形縣應該係好多山啦，正因為多山，火車穿過大大小小嘅山林，樹林河流等都披滿白雪，真係好靚嫁！

相片其實反映唔倒沿線嘅景色有幾靚，有興趣可以睇下片 (其實video都未係最反映倒有幾靚，因為響火車入面影出去都幾暗，D色水唔係咁真實，最好就係自己去睇啦

~~).....

坐左個幾鐘，13:58終於去到山形喇.....山形站係一個大站，人來人往，仲有好大個shopping mall響上蓋，完全係城市feel~~

我地無響車站逗留，因為今日要趕車去藏王溫泉.....出左車站地下轉左就見到山交案內所~~

由山形去藏王溫泉要搭山形交通巴士，案內所入面有自助售票機....案內所個職員叔叔好好人，主動教我地點樣買票~~

單程980 yen 一個人~

去藏王嘅巴士響案內所對開嘅1號巴士站，已經有人響度排緊隊，唔駛一陣仲愈黎愈多人，始終冬天嘅藏王溫泉都係人氣旅遊點，所以早D去排定隊穩陣D~~

我地搭14:20班次，車程大約半個鐘多DD~

暫別山形站啦~~

巴士響市內兜左都好耐下.....

美容院??

巴士行左好耐先離開市區，跟住開始上山，經過迂迴嘅山路，差唔多三點就到達藏王溫泉喇~~

呢個巴士總站望落去都幾大~

落左巴士就先去觀光案內所.....

入面唔係好大，只得一個女職員，佢識講英文嫁，溝通完全無問題，我地請佢幫我地打電話俾酒店搵酒店車黎接我地......我地今晚入住嘅係藏王國際溫泉酒店，呢間酒店響藏王溫泉差唔多係最具規模嘅大型酒店，除左藏王國際，同一集團仲有藏王四季、藏王之風等........ 係就係大集團，不過D service 認真麻麻，俾我地第一印象已經好差！下面好快就會講到.....

等候之際就響附近影下相先啦，案內所對出就係溫泉街~~

其實由案內所行去酒店都係大約十五分鐘，路程唔係好遠，不過出發之前曾經同酒店e mail 聯絡過佢地話可以搵車接我地......

上面提過話呢間藏王國際好差，點解? 就係響案內所等佢地架shuttle bus，等左十幾分鐘都未見有車黎！

......十幾分鐘喎，攪邊科?? 於是我地又請案內所嗰位姐姐幫我地再打電話催催.....佢打完電話之後好唔好意思咁叫我地繼續等，架車好快就到......於是就繼續等.....

等呀等，等極都未到，究竟仲要等幾耐呀??

......佢老闆，等左二十幾分鐘都仲未見，攪咩呀??? 咁Q耐，行都行到啦！真係火都黎

......我地D時間好趕嫁，想要趁個天仲光上去藏王山睇樹冰嘛......咁樣阻左我地好多時間，如果安排唔倒車可以話俾我地知，唔好要D住客企響度等浪費晒D時間，而事實上一路都見到好多藏王國際、藏王四季酒店嘅shuttle bus 經過，但就係全部都唔係接我地.....真係媽媽聲.....

終於等到架車黎嘞，足足等左三十分鐘!!!!!

....好過份呀))))))) .....最火滾就係個司機一句對唔住或表示歉意都無！個樣仲要黑口黑面，又唔幫我地手攞D行李上車......頂佢個肺，都唔知係咩service！......

@#%&^@#xyz~~!!!!! 離晒大譜!!! 真係好頂住條氣，嗰剎那對呢間酒店真係非常不滿，咩國籍、幾多個字嘅粗口都響心入面叫過晒!! 真係唔爆粗都唔可以順返條氣......

所以話都唔係所有日本人好nice......都唔緊要，我覺得如果響街邊是但搵個人問路遭不禮貌對待，雖然唔老嚟，但都係無辦法嘅事，你唔能夠要求人地一定要幫你，但係我而家話晒都係消費者，真金白銀俾出黎，唔係話有錢就大晒，而係大家公平交易，酒店都係provide service啫，呢間藏王國際咁樣嘅service真係令人好失望！~~

發完牢騷，繼續講返個行程.....懷住一肚氣，唔駛五分鐘(xyz!!) 好快就到左酒店....去到想話發作，但係嗰兩個女職員又好有禮貌喎，知道我今日生日仲同我講happy birthday，又話會響晚飯時送紅酒俾我地，而且我地都真係好趕時間，所以大人不記小人過都無再追究....(人品太善良，無計~~

)

攪完check in，就預約埋晚飯同貸切風呂時間，之前上網check過呢間酒店除左有個八右衛門之湯嘅露天風呂好靚之外，仲有三個貸切風呂都好正，所以一定要試下.....點知貸切風呂已經俾好多人book左，只係剩返19:00同20:00嘅時段咋 (心入面又媽媽聲~~)....！於是唯有揀20:00時段，18:30食晚飯啦~~~

有晒地圖指示D location ....我地間房響南館4階~