2009年2月日本東北8日溫泉之旅 - Day 5 (Part 2 漫步藏王溫泉街)

2月18日   星期三   (藏王山 > 山寺 > 山形 > 銀山溫泉)

上回講到離開酒店，返到去藏王巴士總站，我地就去搵左個locker放低D行李先~

然後就買定10:40開嘅巴士返山形，車費一樣係980yen~

今日我地嘅行程因為朝早晏左起身而behind schedule，原本打算搭早一班巴士出山形然後再去山寺，而家遲左成個鐘，再加上朝早都幾大雪，去山寺實在怕好難行上山，所以我地都十五十六，未決定出到山形去唔去山寺好~~

仲有一個鐘唔夠嘅時間，我地就先出返去車站影相先啦....晨早嘅藏王山響白雪飄飄下好有一種靜態嘅美~~

之後就開始行下條溫泉街喇.....

朝早條溫泉街無咩人，間唔中先見到有一、兩個人行過~

行到呢度聞到好重嘅硫磺味....原來下面有條河流，係天然溫泉水~~

溫泉街兩旁都係D溫泉旅館、紀念品店咁，不過愈行愈大雪，加上溫泉水嘅蒸汽，四周白茫茫一片.....

行左無耐就去到下湯共同浴場，呢個係公共浴場，即係俾入場費就可以入去浸~

下湯旁邊有個手湯....

手湯旁邊又有個足湯~

呢個手足湯D硫磺味好勁嫁，D泉水仲係淡青色~

足湯旁嘅櫈都舖左層厚厚嘅雪，點坐呀??

都係浸浸對手算.....D水好鬼熱嫁!!

浸完手就繼續向上行~

行多一陣遠遠就見到酢川溫泉神社響山頭上面，要行條長長嘅樓梯先上到去，成條樓梯都舖滿白雪，愈上D雪就愈深.....

望住呢條樓梯，響白雪紛飛下個感覺又令我地諗起將要上山寺嘅山路，其實我地到呢一刻仲係未決定去唔去，心入面好想去但係又驚我應付唔倒，於是老爺就講笑話叫我試下行呢條舖滿雪嘅樓梯，如果上到去就決定照去山寺啦.....

幾經辛苦終於上到去(其實條樓梯真係唔係好長，不過舖滿晒雪每踏一級都有DD心驚~~)....望返落去，行上黎嗰條樓梯完全係被雪蓋住，都唔明自己係點樣行上黎.....

仲有得繼續上嫁，不過上面嗰段D雪仲深，完全睇唔到條樓梯邊級打邊級.....老爺問仲上唔上......咪攪我，條氣仲喘緊，實在無能為力....

有兩個細路好快就行左上去.....細我唔係好多啫，點解身手咁敏捷?!

我都係死守響原位影下相，攤抖下算把啦~~

抖返順條氣後就落返去，但係望住條雪路真係有D腳震，老爺望左望四周，就話不如試下改行另一邊睇有無第二條路落去啦......好彩有行去另一邊，因為除左有另一條路比較易行D外，原來過小小就係我地一直好想住宿嘅深山高見屋...!

呢間溫泉旅館好正嫁，個私家半露天風呂客室係兩層樓設計，好鬼豪，不過實在太貴喇，當時為起成五千幾蚊晚!! 痴線咩，我地今次個trip住五晚溫泉旅館，已經好奢侈，再住埋呢間返黎香港要乞食嫁喇~~~

無得住都影下相啦~~

之後就要行呢條雪梯落返去~

深山高見屋下面就係另一個公共溫泉，上湯共同浴場~

落到下面一對腳都舖滿晒雪，"凳"左好耐始終都仲有大截雪黐住條褲唔甩~

之後我地就回程行返去巴士站，當然途中有經過幾間商店，梗係無放過走入去成功掃掃貨啦~~

10:30返到車站，嘩好多人已經響度排緊隊，老爺拿拿聲去locker攞返D行李，我就去搵條龍尾.....

當時真係好多人響車站入面，D人龍打晒蛇餅，我地排排下發覺D人排到亂晒大龍，明明排響我地後面有班人唔知點解忽然排左響我地隔離，之後其他人仲跟佢地尾開左另一條line，變左我地後面無晒人，我地擔心D人會掉返轉話我地排錯隊最後上唔倒呢班車，所以咪行前DD諗住攝返入條line囉，點知排響我地前面嗰個扮到好lady嘅亞蟬唔知係唔係以為我地打佢尖，即刻拉住佢老公而衣哦哦一番，又一路向我地眼超超，好似想殺左我地咁!  黐孖筋!!! 使唔使咁樣衰，我地問心無愧，咪照同佢互"啤"囉!! ....真係頂佢個肺，到上得車時佢仲要慌死我地會同佢爭位咁，一路行一路掉返轉頭"倔"我地，D眼神仲要係好兇狠下嗰隻.....響咁樣情況下，屬於潑婦一族嘅我當然唔會粒聲唔出俾人踩上面啦 (咁我地真係無打尖嘛!)....除左一路同佢互"啤"外，我眼見佢一身貴婦look，但係就要自己拎個大行李袋，佢老公相反兩手空空，去到車門口仲無讓位俾個女人先上車，完全係極度typical嘅日本大男人款! 本來我一向都好唔抵得日本女人今時今日仲要服侍男人，但係要緊關頭就唔係咁講法，於是我就一改我一向溫柔嘅聲線，以高八度嘅聲音望住嗰位亞禪話︰「望咩望，你做人咁小家，抵你要成世服侍D日本臭男人！」.....當然係用廣東話啦，話晒人地地頭嘛，而且我都唔識講日文粗話，用英文佢都係唔明嫁啦，梗係用母語先最能貼切表達有幾氣憤啦~~~

發洩完畢，繼續行程.....順帶一提，山形交通巴士行走藏王呢一段車線嘅行車時間唔係咁準時，唔準時嘅意思係未夠鐘只要上滿晒客就會開車，尋日響山形站我地搭14:20班次，14:17就開車，今朝回程車又係咁，10:40嘅車，提早左兩分鐘開車，好明顯係架車full左就開囉，下次有朋友去要注意呢一點啦~~

離開藏王山，結束左呢一段我地期待已久嘅樹冰之旅，巴士向住山形進發，又開始向另一個景點前進，到底我地會唔會響大雪紛飛下挑戰1015級嘅山寺呢? 請看下回分解.....

---> Day 5 - Part 3 挑戰山寺‧上篇