2009年2月日本東北8日溫泉之旅 - Day 4 (Part 4 松島六‧遊船篇)

2月17日   星期二   (松島 > 山形 > 藏王山)

松島係日本三景之一，所指嘅景係指有二百幾個大小島嶼嘅松島灣.....而去松島遊玩，坐觀光船遊海灣幾乎係指定動作.....松島有幾條唔同遊船路線，我地揀左最人氣嘅松島灣巡迴路線~~

松島其實唔大，D景點好集中，松島海岸遊覽船碼頭嘅位置就響五大堂同觀瀾亭中間~~

觀光船叫仁王丸~

船費1400 yen，用折扣卷就1260 yen~

加500 yen 可以坐二樓豪華艙~

豪華艙，唔係好多人喎.....

未開船買杯咖啡飲先~

開船啦))))

海面上有好多好似小盆栽嘅小島~

船開左一陣，小食部就攞左籃蝦條出黎賣，每包100 yen....我地買左一包就走出去船尾....外面D風都幾大，不過有太陽未至於好凍囉~~

遊船餵海鷗已經係香港遊客必做嘅指定動作.....係呀，係香港人咋，成架船只得我地同另外一pair香港人玩，其他日本人只係好悠閒咁坐響船艙入面欣賞個海灣~~

好多海鷗已經如狼似虎咁響度等緊我地.....

D海鷗嘅覓食能力同動作真係好勁嫁.....

睇住喇，我手上即紅色圈入面有條蝦條嫁....

一眨眼條蝦條已經無左~~~

又做下第二個試驗.....我地放左D蝦條響枱面....

一群海鷗立刻飛過黎鬥搶....

眼明口快....攪掂....easy job 啦~~

雖然上次響北海道網走坐破冰船都餵過海鷗，今次玩已經無上一次咁high爆，不過依然都好興奮....用手餵過我地又將D蝦條拋落海，睇住成群海鷗衝向海面爭食都幾得意~~

睇下我餵海鷗嘅美態~~

下面呢後隻海鷗食唔到不特止仲整跌左條蝦條，個樣好傻好攪笑~~

究竟有無食到呢....???

餵晒包蝦條就影下D小島啦~~

呢個係最出名嘅小島嶼，叫仁王島，因為話個樣似仁王喎.....(...唔係掛，呢舊野似阿仁王先生?! 超低能勁攪笑啫....)

影下D海鷗嘅靜態先......

響外面玩夠就返入去船艙坐下，慢慢欣賞下松島海灣嘅景色~

D島有大有細，奇形百怪.....老爺話其實咁多小島嶼嘅形成，都係因為一個大島嶼被腐蝕左，然後就分割開成好多個小島.....唔知真定假，因為佢成日都講假野呃我.....

小島上面種左好多松樹嫁~

忽然發現我地兩個人D衫有好多雀屎！一定係頭先餵海鷗時中左招.....Shit!!! 俾野佢地食仲要搵野招呼返我地.....好彩我地有帶備消毒紙巾~~

有人揸飛機玩花式做左愛神邱比特......

觀光船行駛左大約45分鐘就開始埋岸.....經過福浦橋~~

Century Hotel....我細妹要求我要響呢度補充話佢地舊年響呢間酒店同佢地個trip玩得好豪喎~~ (佢地兩公婆真係好無聊....)

見到我地住嗰間酒店呀~~

埋岸時見到觀瀾亭~

返黎喇....有乘客等緊坐下一班船.....

成個航程要50分鐘.....悠悠閒閒咁坐下船餵下海鷗，都幾寫意....不過唔係好明點解會講到話係日本三景之一，D島嶼係幾特別，但成個日本咁大，應該仲有好多更靚嘅景掛???...

落左船，睇下錶就快十一點，行程緊湊，係時候去我地響松島最後一個景點 ---> 松島海鮮市場....(待續)

---> Day 4 - Part 5 松島七‧告別篇