2009年2月日本東北8日溫泉之旅 - Day 4 (Part 7 藏王樹冰‧日篇)

2月17日   星期二    (松島 > 山形 > 藏王山)

今次終於講到上藏王山睇樹冰喇，呢個景點係我地今次東北遊嘅第一目的呀，所以真係好緊張.....萬分期待......

上藏王山睇樹冰，必先要乘搭吊車.....藏王溫泉有三種登山空中吊車，我地揀左最近酒店嘅藏王ロ一プウエィ，又叫藏王空中纜車~~

由酒店行去纜車站只需要五分鐘時間，不過因為酒店響個山上，要行條斜路落山，為左早一D上藏王山，我地以小跑步嘅恣態碌落山，地面上舖左厚厚嘅白雪，有D仲結左冰，所以都走得好刺激~~

呢個就係藏王ロ一プウエイ喇.....呢個ropeway有兩段吊車路線，分別係山麓線同山頂線~

山麓線係指由山下嘅藏王山麓站至樹冰高原站，車程大約十分鐘~

兩段吊車來回費用每位2500 yen，都唔平喎~

上第一段纜車喇~~

纜車開喇~~

車廂入面都幾大，有工作人員同車.....唔知係咪已經比較晏，唔係好多人搭纜車，同車只有兩個外國人，都係全副滑雪裝備同帶住雪橇，應該係坐纜車上山再滑雪落去山下~~

望出去白茫茫一片，D樹全部都係白色嫁，一大片一大片嘅白色森林，好靚呀~~

愈上得高外面嘅景色就愈唔清晰，因為吊車入面D人呼出嘅氣好快就將車窗結左一層厚冰，所以影出黎D相嘅效果好差，好在video 都勉強影倒D~~

條片入面聽到嘅刮刮聲，就係個工作人員不斷咁好努力響度用塊膠片將窗上嘅冰刮去嘅聲音~~

大概十分鐘就到樹冰高原站~

落車嘞，之後要再轉搭另一條山頂線~

當時嘅氣溫係-8.5度，但係唔知點解我一D都唔覺得凍，可能之前太趕跑得太急，個背脊仲出緊汗tim~~

樹冰高原站有一段路係半露天，可以睇到外面嘅景色~

仲未見到樹冰喎，不過D樹舖滿晒白雪都好靚.....

好似聖誕樹~~

搭第二段吊車去地藏山頂站喇，呢款吊車有D似香港嘅昂平360~

呢一段吊車嘅車廂比較細，不過無人同車，成架車得我地兩個人....今次無工作人員幫手刮冰，再加上天色好灰，所以由車廂望出去係完全睇唔到野.....究竟有無好浩翰一片嘅壯觀樹冰群都唔知囉........

睇下我著到好似一隻糉咁~~

好快就到左山頂喇，一落左吊車就感覺到D冷風響四方八面吹過黎.....外面嘅溫度係-12.8度!!! 好....凍....呀~~~......

唔理咁多，笠返頂冷帽拉好件羽絨拉鍊就即刻衝出去......嘩！出到去好大風呀！白濛濛一片，咩都睇唔到.....企左一陣對眼先開始適應，發覺好多人響門口附近遠少少嘅位置影緊相.......樹冰呀!! 原來有好多樹冰響嗰度，終於見到期待已久嘅樹冰啦!!!!.......即刻衝過去.....but....

呢D就係樹冰??? 咁瘦弱嘅?? 唔係應該似一隻隻怪物咩.....有D失望，不過是但啦，形狀都奇奇怪怪嘅....狂影一輪相先算啦~~~

興奮左一輪就向前行，無耐就見到指示牌指示樹冰原同地藏尊嘅方向....先去睇睇個地藏尊先啦~~

行左一陣就見到個藏王地藏尊.....嘩！佢俾D雪掩蓋只淨返個頭同小小上半身咋，下身全部埋響雪入面，即係話我地而家企緊嘅地方都係D積得好厚嘅雪呀~~

摸摸地藏尊個頭先，話會帶來好運嫁~~~

影完相就行返過去另一邊嘅樹冰原.....響大風雪中行雪地真係好難行，四周白濛濛一片，地下D雪都唔知有幾深，好驚會差錯腳唔知踩左落邊度.....

幾經辛苦，終於行到去另一邊嘅樹冰原......嘩!!! 真係好開心!! 好多樹冰呀~~

樹冰呀~~

其實樹冰原呢邊真係有好多樹冰，遠望過去簡直數之不盡，不過當時能見度好低，又有風雪阻擋，所以相機同video都影得好唔清楚.....

因為愈黎愈大風雪，老爺唔俾行得太遠，驚有危險....(我其實想行遠D，睇下樹冰林入面嘅樹冰會唔會肥壯D似冰怪多D，不過老爺話天氣咁差唔好繼續行，佢有時都幾專制...).....咁就唯有響度影下造型照啦~~

狂影左一陣相，雖然個mood好high，但D風雪愈黎愈勁，塊面赤赤痛，將條頸巾摭住塊面都唔掂，眼睫毛都舖晒雪......真係頂唔順，都係走返入去車站室內先~~

有個吊鐘響車站外面，不過實在太大風，經過都完全無意識要走去搖下佢~~

同風雪搏鬥一輪，終於爬到返去車站，D風雪刮得勁大!! 橫風橫雪咁迎面撲過黎，好似置身於成日響電影睇嗰D災難片咁.....

都未走到入門口，忽然見到有幾個工作人員走出黎叫我地快D返入室內，然後就拎起好多繩欄住左通去樹冰原嘅方向.....聽D人講好似話太大風雪，所以要暫時封山.....嘩~~好彩早幾個字黎到，如果唔係行唔到去樹冰原嗰邊睇唔倒咁多樹冰群就真係揼心~~~

返到去室內，手腳都僵硬晒.....望下老爺，你眼望我眼大家忍唔住爆笑，因為兩個人由頭到腳都舖滿雪，成個雪人咁.....同老爺你拍我我拍你兩個人拍打左一大輪先將D雪拍走.....

車站入面有間餐廳，拿拿聲走入去攤抖下搵野填下個肚暖暖個身先啦~~

是但點左幾樣野食.......是是但但都要1250 yen!! 好貴呀~~~

呢個肉包熱喇喇，都OK嫁~~

香腸包

咖啡，有塊餅送嫁~

呢個係買錯嫁，叫sweet bean，600 yen，我地最初以為係粟米湯之類，點知拎出黎嚇左一跳，遠睇以為係納豆！原來係紅豆湯啫.....老爺話好好味，簡直讚不絕口，完全陶醉響紅豆嘅甜味上....我就覺得甜左D囉~~~

入面有D栗子，無咁甜，都幾好味~~

由餐廳望出去都可以見到外面D樹冰，不過就好矇查查，睇得唔係咁清楚~~

響餐廳hea左一段時間，個人已經暖返晒，望見外面D樹冰好似有D光咁，莫非已經亮左燈?? 因為呢度D樹冰會響夜晚五點後亮起燈....望下個錶，好準時! 原來剛剛五點，於是決定又再衝出去再戰風雪.....(待續)

---> Day 4 - Part 8 藏王樹冰‧夜篇