2009年2月日本東北8日溫泉之旅 - Day 6 (Part 4 橋本屋‧究竟有幾豪呀?!)

2月19日   星期四   (銀山溫泉 > 最上川 > 天童 > 葉山溫泉)

上回講到無啦啦響天童食左個lunch，之後我地就搭15:08班次嘅奧羽本線返山形，只係二十分鐘車程，去到差唔多三點半，跟住會搭15:57班次新幹線去葉山溫泉，未夠鐘上車，我地就響山形車站逛下~

見到有呢D jelly賣，梗係唔放過買返D啦....

車厘子味，真係勁多車厘子嫁....yummy!!

呢隻梨都幾好味，唔會太甜~~

Hea 左一陣就夠鐘上車....葉山溫泉個JR車站其實叫做かみのやま溫泉站~

只係八分鐘就到喇~

今晚入住葉山溫泉嘅橋本屋，之前做booking時已經約左旅館專車四點鐘響車站接我地，出左閘口就見到橋本屋嘅職員拎住個紙牌響度等緊，個職員一見我地就即刻幫我地攞左D行李，然後就帶我地出去上車~~

車行左幾分鐘就到旅館喇，幾個職員即刻笑容滿面走出黎招呼我地，其中一個職員幫我地拎晒D行李話放入房間先，一個職員就遞熱毛巾俾我地抹手，另一個職員就遞拖鞋....咁大個女都未試過俾咁人服侍過.....

攪掂晒後就請我地去左一處休憩嘅地方休息下先，有花茶同果子welcome我地....個花茶淡淡香味，幾好飲~~

茶几上面放左靚靚嘅香薰蠟燭~

好快就有個女侍走黎同我地核對左個人資料，個女仔好後生，不過好有禮貌，同埋佢都識講英文，溝通完全無問題，之後都係由佢全程招呼我地，包括服侍我地晚餐同聽朝早餐~

然後佢就帶我地去揀浴衣，係女士先有得揀嫁，男士嗰件已經放左響個室入面，無得揀款~

揀完就帶我地入房....通向房嘅走廊，好典雅~

我地間房嘅門牌，不過唔知寫咩....

個女侍同我地介紹左房嘅設施，約埋夕食同早食時間，之後我地問佢聽日可唔可以安排旅館專車載我地返出去JR車站，佢話旅館定左九點半同十點半有專車出車站，但係我地打算搭9:15班次去米沢，時間唔夾，原本諗住自己打的，但佢就主動話幫我地問一問睇下可唔可以特別安排下，後來佢都有再覆我地話可以安排九點鐘車我地一轉去車站....呢間旅館一開始已經俾倒我地好好印象啦~~

有兩條房門key，一人一條，出去浸溫泉都唔駛驚返黎無門口入~

好喇，成日話呢間旅館係此生暫時最貴嘅旅館，咁究竟有幾豪先??? 都係時候要向大家介紹下我地呢間露天風呂付客室係點樣喇....

Welcome drink 係一枝紅酒~

Welcome snack

一入門口有基本設備好似雪櫃呀、電熱水壺呀咁~

靚靚嘅水杯....飲杯水都開心D~~

呢個toilet其實無咩特別，一般比較先進嘅酒店都係呢種有得洗pat pat嘅toilet，特別嘅係除左有兩卷tissue外，響牆上面仲有多一盒抹手紙，同埋有個藤盒入面有女性用品供應嫁，幾周到......而且呢個toilet係無燈掣，燈光係自動感應，無人就會慢慢熄，試過響入面大大時，呆坐左一陣開始變暗，郁一郁又光返，好好玩~

兩張好柔軟嘅床

流線形嘅電話

衣帽間，又係自動感應燈光~

一般嘅溫泉旅館都會有供應和式嘅襪，但係呢間旅館供應嘅唔係一般白襪，係有佢地logo嫁....

呢隻兔仔係旅館嘅logo，好多用具器皿都有，仲有分男女，女士紅或粉紅色，男士藍綠色，所有野都每種顏色各一套~

去浸大浴場用嘅索繩袋都有兔仔同分左顏色~

偏廳

好多茶包，仲有咖啡奶茶，飲淨全部俾我攞走晒~

大電視

主廳....望出去係一個私家小庭園~

靚靚嘅盆栽擺設

估下係咩?

原來係茶具~

化妝間

連個sink盆都特別過人.......不過唔係幾好用嫁，個水龍頭好高，D水酒到周圍都係.....

一般梳洗用品.....最特別係護膚品，唔係雜嘜噃，係Kose嘅雪肌精!!

唔駛講梗係俾我攞埋返屋企啦~~

最離譜係有埋一整套指甲油，全新未開過嫁! 連護甲同base coat都有!!

沐浴嘅地方

最後黎到呢間個室最矜貴之處......

就係用藏王石做成嘅私家風呂....個池都好大個嫁，兩個人浸都好鬆動~~~

望出去係園林雪景，一邊浸溫泉一邊觀賞美景，絕對係人生一大樂事!!

亦可以坐響旁邊D藤椅休息~

由外面望返入去個室嘅樣貌....好快已經俾我攪到亂七八糟.....

響房休息左一陣，趁天未黑，我地就去換浴衣先去大浴場觀光一下.....

電梯入面貼左張用和紙寫上旅館入面嘅各種設施

女湯入口

男湯入口

入到去女湯，一個人都無，正!! 拿拿聲攞部DC出黎影返幾張相留底先....

好古典嘅locker

梳妝嘅地方，設備齊全，乾淨企理，一人一格，夠晒私隱~

sink盆又係好靚

有一籃夾子俾人用黎夾住自己對拖鞋嫁，唔駛驚會同人掉轉左右腳啦~

愛貪小便宜嘅我竟然唔記得順手牽羊.....好彩老爺知我鍾意又食又拎嘅本性，已經幫我收起一個.....返黎香港用黎夾boot好方便呀~~~

內湯....因為好驚會有人入黎，所以隻手不受控抽筋，D相震得好緊要.....

出面有兩個露天風呂

其中一個係好大塊藏王巨石做嘅溫泉池，就算唔住私家風呂房都可以黎浸藏王石風呂....據講因為石頭傳熱平均可以有保暖嘅效果，窩進熱剌剌嘅溫泉水，望出去有被白雪鋪蓋嘅點點燈火，一個人響度浸嘅感覺真係好美妙，超正呀!!!

周圍嘅設計都好優雅~

浸夠後就返入房，老爺已經浸完，仲沖定壺綠茶等我返黎....未夠鐘食飯就飲杯茶食和果子hea下先啦~

 下一篇吃醉人嘅山形牛刺身，

一於繼續豪落去.....

---> Day 6 - Part 5 橋本屋‧夕食篇