2009年2月日本東北8日溫泉之旅 - Day 7 (Part 3 上杉神社)

2月20日   星期五   (葉山溫泉 > 米沢 > 東京 > 新宿 > 東京)

米沢上杉神社係響米沢市中央が岬公園入面，落左巴士行幾分鐘就到.....呢個神社係供奉上杉一族嘅先人，據講上杉家當年好威猛嫁，不過對於我地黎講真係無乜所謂，都係當一個景點咁行下啫~~

要先行一段長長嘅參道....

今日唔係幾好天，成朝都落住雨，仲要係愈落愈大嗰隻....我諗應該係連東北都唔係咁捨得我地離開啦~

呢位先生睇怕應該好出名~

雖然唔知呢度嘅歷史，不過如果純粹當觀光嘅話，呢個公園都幾大，四周都鋪滿層層嘅白雪，景色好靚呀~

行行下見到有條河流水面結左一層薄薄嘅冰~

我地又玩左一陣....玩咩? 就係將D石仔拋落個河面上，睇住D冰裂開....其實幾無聊，不過又幾好玩.....

就係呢條鋪滿晒雪嘅樓梯，老爺一見就話影相會好靚，不斷要我走上走落擺造型....真攞命，D雪已經鬼死咁深，仲要擔住把摭......

終於行到去神社嘅正門入口....

神社入面應該係供奉呢D猛人~

其實都係一d古舊嘅木建築.....

搖搖個開運鐘先~

講真，其實無咩特別嘅野好睇，當係到此一遊，影幾張相~

又去洗洗手潔淨一下心靈先.....

啱啱擧行過雪燈籠祭，夜晚呢D雪燈籠會點著火光~

可以想像成條道路都火光閃閃，應該好有氣氛~

好快就行完上杉神社，之後就順路行埋去上杉伯爵邱.....

由上杉神社行過去上杉伯爵邱，只需要兩三分鐘~

上杉伯爵邱係上杉家族響明治時期以檜木建成嘅大宅，係日本國家文化遺產之一...

鋪滿白雪嘅庭園好靚~

庭園對開嘅水池都好靚~

不過無咩好行，影左幾張相就離開嘞.....

上杉伯爵邱旁邊仲有一個博物館

博物館嘅外形設計好現代化，同上杉神社好唔同feel~

之後我地行去附近嘅shopping centre, 上杉城史苑....當然係shopping一番啦~

呢個shopping centre好大，係米沢市入面最大型嘅手信店，米沢所有嘅特產都可以響度搵得到~

當中最好之處就係有好野試食，我地檔檔試下，簡直食到停唔到嘴....下面嘅米餅好好味，我地都有買黎做手信~

  

  

  

  

  

  

  

  

  

 

 

 

    

  

  

  

    

逛完晒米沢嘅景點，我地就行返去巴士站，準備搭11:56班次嘅巴士，向東北山形縣最後一站進發....

下一篇，今次旅程最昂貴嘅午餐....

米沢牛，我地黎探你啦~))))))

---> Day 7 - Part 4 米沢牛!! 我地黎啦~~~