Dinner @ 白木屋

平時如果夜晚諗唔到去邊度食飯，好多時都會去Mega Box，因為貪嗰度人流唔多，基本上d食店都唔駛等位，而且泊車好平，shopping 之餘又有間幾大嘅大眾，食完飯可以去逛下~

今次我地揀左白木屋，呢間食店嘅style同和民好相似，碟頭細細，食物嘅選擇都好大眾化，以前有一間分店響APM，不過就已經執左~

先要一個五式刺身拼盤....普普通通，未至於好新鮮，但亦唔算差~

無油甘魚，改為鏗魚，第一次食，都ok~

鐵板鹽燒牛舌，賣相麻麻，味道一般~

三文魚pizza，餅底好薄下，都幾脆~

長崎雜菜炒麵....無論賣相抑或味道，我都覺得自己食緊中式肉絲炒麵~

牛油粟米，牛油味好香濃，我覺得最好食，每次都要叫嫁....不過老爺好不以為然，佢話我遲早會肥死~

整體上個人認為如果同和民比較，和民d野好食d，不過呢度d位就幾闊落，坐得都幾舒服，service 都ok，d waiter 成日黎幫你加茶，上菜都幾快，價錢亦唔算貴，不過又係要收茶介每位$5....Mega Box上面有間鳴門又係咁，唔通係呢度d日本食店嘅共識?!