2009年2月日本東北8日溫泉之旅 - Day 5 (Part 3 挑戰山寺‧上篇)

2月18日   星期三   (藏王山 > 山寺 > 山形 > 銀山溫泉)

離開藏王山，坐巴士返到去山形車站已經11:20，見當時無咩落雪，我地就決定都係照去山寺睇下乜野環境先.....

我地會搭11:34班次嘅仙山線~

將行李放左響locker，見仲有D時間就走入去觀光案內所兜個圈啦~

山形站呢個觀光案內所都好細下，攞左D資料就去上車喇.....天氣好凍，順手買左熱粟米湯暖暖肚，120yen~~

唔好以為淨得湯無粟米咁，其實沉晒響底咋! (大家千祈唔好誤會，上面嗰隻咁粗嘅手唔係我嫁，下底嗰隻先係~~)

 

 

由山形去山寺只係需要二十分鐘，差唔多十二點就到喇~

響月台望過去已經覺得個山景好靚!!

我地就係想要行上去呢D寺院喇....

先check下個時刻表先.....因為我地下午約左旅館專車響大石田站載我地去銀山溫泉，無論如何一定要搭14:56班次嘅新幹線由山形去大石田，所以一陣間就預算搭13:42班次返山形，換句話即係只有個半多鐘頭嘅時間響山寺呢度逛.....

出左站影下個車站先啦，都幾古色古香喎~~

車站外面有個好大嘅山寺地圖.....

個地圖仲有show埋俾遊客知上山寺每個stop嘅所需時間，左手面第一個column就係上山寺.....老爺話我地時間唔多，以我一貫嘅笨手笨腳，如果真係行唔掂，去到中途站仁王門就打回頭啦.....

好啦，一於去馬，出發啦~~~ 

沿路有呢D小僧侶紙板指示方向，幾得意~

由車站行到去登山口大約七、八分鐘，老實講我係嗰D平時行多兩步都喊攰嘅人(shopping當然另計啦)，未去到入口我已經有D喘氣......一去到仲先要上條長樓梯!!

行完條長樓梯就去到根本中堂，呢座野據講係日本國家指定文化遺產~

原來山寺又叫立石寺~

未上山周圍D景色已經好正~~~

根本中堂隔離係日枝神社~

下面呢個係俳聖松尾芭焦像，呢位人兄好似係幾出名嘅詩人，曾經黎過山形縣玩，玩完又作下詩紀念咁，所以響山形成日都見到佢個名~~

再過D就到左山門，即係登山之門，又即係科水俾錢入場嘅地方~

登山參拜料金每位300 yen~

入口地方除左有紀念品賣外，仲有水鞋供應，可以借用，入口個伯伯會睇你著嘅鞋適唔適合上山，我最初唔知，以為佢做咩一路昅住我對腳.....我同老爺對鞋都OK嫁，係早兩年特登響Aigle買黎專係去北海道踩雪地著~~

俾左入場費就開始登山旅程喇.....即係要開始行我呢世女最唔鍾意行嘅樓梯，仲要係舖滿晒雪，不過樓梯旁邊基本上都有扶手~~

山路邊成日都見到呢D著左衫嘅小佛像....

行完一段又一段，都係長長嘅石級，真攞命!! ....好彩大部份山路嘅旁邊都有欄杆可以借下力，如果唔係對於一向運動zero嘅我黎講恐怕行唔到二十級就叫救命，而且若果無扶手俾我扶實，睇怕我已經碌返落登山口跌Q死好耐.....

不過唔知點解其他人都行得健步如飛，連老人家都可以唔使扶欄杆就輕易咁爬我頭，而我因為打死都要霸住個旁邊位捉實條欄杆，由上面行落黎D人我都無讓俾佢地扶，但係佢地都可以好自在(or 好無奈!)咁行落去，睇黎我真係要檢討一下.....

老爺基本上由得我自生自滅，已經行前左好多，佢行得快，通常同我維持一段距離，距離拉得太遠就停低等我，響等緊我嘅時候就可以影下相同video囉~~

睇下我已經行到成隻狗咁

....頂唔順要停一停抖抖(其實一路都已經抖左好多野)，咁就俾機會老爺偷影左我個小狗樣

.....

唔覺唔覺，由登山口開始行，行左二十分鐘，又係行到去一段好長嘅石級，真係已經氣喘如牛，正當對腳開始有D發軟踶嘅跡象之際，忽然聽到好多人聲響上面傳落黎，當中夾雜住老爺叫我嘅聲音....吸口氣走埋呢段樓梯，上到去老爺已經急不及待大叫話呢個stop嘅景好靚.....

老爺講得無錯，睇下真係好靚呀，好多人上到黎都忍唔住呼叫~~~~

D樹好靚呀!!

原來呢個景點叫せみ塚~

D樹好靚呀~~~

個峭壁都好靚呀!!

睇完せみ塚又繼續向上行.....無窮無盡嘅石級，真係行到扯晒氣......

無耐又去到另一個景點，就係彌陀洞~

彌陀洞係一面大型風化垂直岩壁，據講有緣人會響壁上睇到阿彌陀如來佛像.....

我地呢D凡夫俗子當然唔會係有緣人啦，佛像就梗係見唔到，我只係覺得壁上好似鑿左好多墓碑，同埋好似好多神主牌放左響地上，如果夜晚黎一定嚇死

離開彌陀洞，行過D就去到仁王門~~~Yeah!! 亦即代表我地已經行左整段山路嘅一半路程喇!!

呢個角度望上去個仁王門真係好正~~

幾經辛苦，終於爬到上黎，真係要自己讚下自己呀!! 睇下時間，原來只係12:35咋!! 自己都覺得好勁呀，只係用左25分鐘就行左一半路，仲係無PK添~~~

攤抖左一陣，我地就諗到底係繼續行埋上去山頂定落返山喇.....咁我就問老爺上面有咩睇啦，佢話上面都係D寺院咁，但係由山頂望落去個view應該好正....我地要搭13:42班次嘅車，都仲有成個鐘，老爺就話如果我可以維持番之前咁嘅速度而唔hea太耐，上埋去都應該無咩問題喎....

到底我地最終即係有無上埋山頂呢? 我唔賣關子喇，呢篇野叫得上篇，即係有下篇啦，咁即係有上到頂啦，可以預告山上面嘅view真係好靚!!......BUT，對於一向爬樓梯仲慘過做苦工嘅我黎講，平時行步路都會PK，仲試過響平地無啦啦拗柴扭親腳要睇跌打!

......咁究竟響結左冰滑溜溜嘅石級走返落山，仲要係響好趕時間嗰隻，到底成個磨碌又笨手笨腳嘅我係碌落黎

定係跣落黎

呢? 呢個就真係要請看下回分解喇........

 

---> Day 5 - Part 4 挑戰山寺‧下篇