2009年2月日本東北8日溫泉之旅 - Day 5 (Part 6 雪映銀山)

2009年2月18日   星期三   (藏王山 > 山寺 > 山形 > 銀山溫泉)

響房hea左一陣，我地就出去逛下呢條期待已久嘅銀山溫泉街....旅館有供應雪褸同雪靴，仲有雨傘，現場所見，每一間旅館嘅雪褸都有各自嘅顏色，有紅色，有紫色，古山閣就係藍色，響外面如果有著佢地D雪褸一睇就知你係住邊間旅館~

我地只係著佢地D雪靴，因為見D雪褸好似幾薄咁，驚唔夠暖~

銀山溫泉鄉其實好細，短短一條溫泉街，前後都被高山環抱住，好似響個深山入面，好有一種遺世獨立嘅感覺.....成條溫泉街都係古色古香嘅建築物，響白雪紛飛之下，真係有一種形容不盡嘅淒美同浪漫~~

溫泉街兩邊都係十九世紀大正時代嘅木造建築，絕大部份都係兩、三層高嘅旅館，中間流過一條銀山川，有好多條小橋響條溪流上，我地就係不斷咁響D小橋上走黎走去，因為每間旅館都有唔同嘅特色，想要影晒成座建築物，一定要走過溪流對面影返過黎~

我地住嘅古山閣~

呢間就係好出名嘅藤屋，老闆娘係美國人，嫁左過黎日本仲親自打理埋旅館，雪映移城都有介紹過，呢間旅館嘅設計好現代，單獨睇好靚好型，個feel同六本木Mid Town好似，不過個感覺好似好刻意囉，同呢度其他旅館嘅懷舊古樸感覺好唔協調~

懷舊嘅街燈亮起左喇~

條溫泉街唔係好多遊客行咋，周圍都好寧靜，真係好似仙景咁呀~~

呢間旅館叫永澤平八，個名咁得意嘅?

 

能登屋旅館，有成一百年歷史，除左係千與千尋入面個湯屋藍本外，仲係好多年前我好鍾意睇嗰套阿信的故事，阿信媽媽打工嘅地方就係搵呢度做場景嫁~

真係好靚呀!!

江戶屋，手信店!! 梗係即刻衝入去瘋狂掃貨啦~~

雖然溫泉街好短，但係每一座建築物都有唔同嘅特色，再加埋茫茫嘅白雪，簡直係影唔停手呀~~

溫泉街行到盡頭就係白銀之滝，係條溪流嘅源頭，潺潺嘅水聲，四周渺無人煙，只有河水嘅流動，更加顯得四圍好幽靜~

呢間伊豆工房響雪映移城有介紹過，入面有好多阿信木頭公仔賣嫁~~

真係好多木頭公仔呀，呢種公仔其實叫小芥子，全部都係人手做，個個都獨一無二嫁......我一定要買返個呀!!!

舖入面放左好多相，都係阿信D演員響銀山呢度影嫁，一路睇我一路諗返起阿信嘅主題曲︰雲與清風可以常擁有......

望住阿信嘅老年，我就諗起八百伴.....

右面嗰張，個細路女就係阿信童年，佢好cute嫁，我記得佢塊面成日紅卜卜~

揀左好耐，最後我地買左呢個，都幾貴，要1890 yen~

仲即刻幫我地響個底寫返今日日期~

同老闆娘講左一陣價，佢最後送左張証書俾我地~~

舖頭嘅招牌有小芥子個頭嫁~

響伊豆工房買完野出黎，個天開始黑喇....見江戶屋仲未close，我又拉住老爺入去再行多個圈呀~

我又買左好多阿信公仔造型嘅電話繩同鎖匙扣做手信送俾人呀~~

銀山入夜之後嘅景色又有另一番味道~~

古色嘅樓房，響昏黃嘅燈光映照下，華麗得黎好浪漫呀~

我唔講咁多啦，已經成日俾老爺話我講得太多廢話，俾大家靜靜咁欣賞一下美麗嘅銀山夜景啦~~

行到返古山閣喇~

我超愛嘅銀山夜景

都未夠六點，個天已經差唔多黑晒，呢度仲早天黑過北海道呀.....欣賞完銀山溫泉美麗嘅景色，係時候要返番去旅館入面浸下溫泉同食晚餐啦~~ (待續)

---> Day 5 - Part 7 古山閣