2月18日 星期三 (藏王山 > 山寺 > 山形 > 銀山溫泉)
上回講到話幾經辛苦終於上到去仁王門，攤抖左一下，我地就決定繼續向上爬.....
過左仁王門之後就會開始經過一D寺院，下面張相右上角嗰座就係五大堂....個地勢係咪好似好險峻咁呢，一陣間我地都會去嫁~
雖然經過D咩開山堂、中性院咁，不過我地無咩時間慢慢逛，打橫嘅小路都skip左，只係一路直上向住最高點奧之院進發~
偶然掉過頭望返落去......睇下我地已經爬得好高喇~~
行左大約十分鐘，好開心呀
，終於到左奧之院喇~~~
行得咁辛苦，終於行到上黎最高點，真係要俾返D掌聲自己先得呀
將周圍嘅景色影返夠本先....同埋都要乘機企定定抖返順條氣先啦~~
影完晒相，離開奧之院，見仲有時間，我地就行埋過去另一邊嘅五大堂....行行下就見到響其中一坐山嘅中間無啦啦有座寺廟，唔知係咪就係胎內堂，只可以遠望，因為條路好簡陋危險，所以封左唔俾人行去....
咁D僧侶唔知係點樣行呢?
周圍D路都舖滿晒雪，係就係好靚，不過因為其實都有好多分叉小路，講真都真係幾易蕩失路....
我地愈行就愈唔對路，原來行行下唔知點解行左去一個懸崖邊，旁邊係無野扶手，一個唔覺意就會跌落崖下面
.....行行下見條路封住先知行錯路，唯有行返轉頭......真攞命，慌死我行唔夠咁.....
上五大堂D石級好窄嫁，又無欄杆扶手，得條幼繩俾人借下力.....唉~我真係已經無晒氣喇~~
Yeah!!! 終於去到五大堂啦! 原來係一個展望台式嘅佛堂，好開揚嫁，可以180度望到山寺四面同山下嘅景色....
四面嘅景色真係好靚呀.....我唔多講喇，俾大家靜靜欣賞一下啦~~
望返落山下可以見到山寺車站~
咁啱有架火車埋緊站噃~~
響五大堂影完相就真正完成左呢個1015級嘅爬山旅程喇，自己真係要讚下自己呀，平時行多兩步路都呻攰，今次竟然一口氣可以行咁多樓級，老爺都讚我叻女啦~~~
望下錶已經一點鐘喇，係時候要返落山.....開講有話，上山容易落山難，頭先一路上山已經見到有D舖晒雪嘅石級俾人踩得多變左滑溜溜嘅冰，要逐級行返落去都咪話唔心驚.....
不過明知自己論論盡盡，當然響黎山寺之前早有預備啦.....
睇下我預備左D咩?
¯
登凳....就係呢D鞋釘喇~~
將佢套住對鞋，鞋底有三粒釘，踩落個冰地就唔會跣啦~~
真係好掂嫁，踩落去D釘好似有小小啜住個冰面，一D都唔會跣~
睇下，簡直可以話係健步如飛呀!! 
唔使扶住欄杆都得~~
行返落山先留意到原來沿路有好多墓碑響山路旁邊....
對鞋釘真係好正，上山差唔多需要一個鐘嘅時間，落山就只係用左大約十五分鐘咋，話咁快就行返去登山口喇.......咁快走返落黎，有剩時間梗係走入去事務所shopping下先
~~
揀左少少紀念品就俾老爺催走喇.....咁我話都未夠鐘做咩咁快走喎，難得有地方shopping嘛.....佢就一句答我話乜你唔想去車站附近D shop逛下咩.....只係一句話就令我即刻好聽話咁跟佢走喇.....
通去出口嘅路有個幸福之鐘喎....走去搖兩野攞返D好運先啦~
之前響登山口個事務所因為要入室內買紀念品，所以就除左對鞋釘費事刮花人地個地板啦，點知原來離開登山口後仲有一大條長石級，旁邊仲要係無欄杆扶手!
.....無套鞋釘踩上D冰度真係好鬼跣嫁，所以如果大家打算響冬天去山寺玩，就要好似我之前咁做足準備喇.....
大家唔好睇我好似自己都行得好掂咁，其實全程都要老爺好似侍候老佛爺西太后咁扶實嫁，如果唔係以我嘅能耐行唔夠兩級就碌落去啦
，呢張相係已經行到尾剩返幾級特登叫老爺影低用黎向朋友吹嫁咋.....真係行得好牙煙~~
成功完成山寺之旅，行返去車站途中有條河舖晒雪好靚呀~
車站在望啦~~
仲有時間，梗係唔放過機會shopping先啦~~
成功掃左貨，不過磨得太耐，攪到好趕呀，即刻衝去車站啦....山寺車站細細咁，幾有鄉間嘅風味~
舖滿白雪嘅路軌，好靚呀~
望返過去，可以見到五大堂，而紅色圈住嗰處就係響せみ塚望過去好靚嘅峭壁，至於奧之院就應該響五大堂後面俾個山摭住左......
望住咁靚嘅山寺，真係好唔捨得走呀....
告別山寺，我地搭13:42嘅JR返山形，繼續向下一個景點銀山溫泉進發~~~
山寺，bye-bye~~
後話︰從來無諗過自己會可以堅持行咁多樓梯，去之前我地仲係十五十六，不過好彩無放棄，如果唔係就睇唔到咁靚嘅景色，上山無疑真係好辛苦，尤其對於我地呢D"港女"，不過其實如果可以有多D時間，行下抖下，趁攤抖嘅時間影下相，唔覺唔覺就上到山頂......事實上連我呢個懶人都可以行晒全程，我諗無咩邊個係會行唔倒囉~~
山寺觀光協會網址︰http://www4.dewa.or.jp/yamadera/index.htm
後後話︰show俾大家睇下響山寺買嘅DD紀念品.....
老爺買左本書仔係山寺簡介，入面有張guidemap，睇返自己行過嘅山路，響一個鐘頭之內由山腳爬到上最高點，真係覺得好勁呀~~
呢盒線香唔錯，淡淡嘅香味，唔會太濃，好清香!
唔知係咪因為係響山寺買呢，D香都比一般嘅店舖神性D嫁，燒起上黎覺得成間屋都充滿住一種靈氣同祥和嘅感覺呀~~~
F
回覆刪除