Mother's Day Dinner@泉章居

今日係母親節，響度同所有嘅媽咪講聲母親節快樂!!

同往常一樣，我地都係提早同老媽子老豆食呢餐母親節晚飯，除左因為費事同人迫同埋大圍野又貴又唔好食外，又要就細佬嘅時間，所以就揀左平日食喇~

今次揀左泉章居，我地大大話話都真係有好幾年無去幫襯過....一向都知道呢間野平時係無得訂位，之前早一日就試下打電話去睇有無得訂啦，點知又OK喎，不過只係有兩個時段可以訂，一係6:30，一係7:00，仲要講明話夠半數人先俾枱喎，真巴閉，雖然係寸，但係算啦，呢度D野又真係幾好食嘅，而且又經濟，真係幾抵食嫁~~

我地七個人(六大一小，妹夫開OT黎唔倒，老爺患感冒被迫自動隔離)，於是叫左個$488六人套餐另加多一個小菜，個套餐有湯、一隻雞同四款自選小菜，雖然只係六人餐，但因為我地大部份人都好細食，所以竟然食唔晒仲有淨添~~

呢個霸王雞其實即係招牌鹽焗雞，不過上面加左好多蔥絲.....D蔥絲好惹味，雞好嫩滑，果然係鎮店名菜，點埋沙薑好好味呀~~

炆班頭腩，魚肉都幾滑，不過成碟野得好小班腩，我只係食得一舊咋~

咕嚕肉，雖然係女人天敵，但水準都唔錯~

豬頸肉，OK幾爽口~

全餐最唔好食嘅粉絲中蝦煲，賣相唔掂，成煲野都無咩味~~

大良炒鮮奶，炒得幾香滑，不過真係要襯上碟熱喇喇食先好食，凍左真係麻麻地~

整體食物質數唔錯，service一開始已經唔會有咩特別期望，價錢合理.....不過最衰要遷就細佬放工時間同地點，結果去左旺角分店食，因要行上二樓，老媽子對腳生骨刺，睇佢上樓梯上得咁辛苦，仲話係母親節晚飯，真係罪過，扶住佢上樓梯時個心好唔安樂，決定以後無咩必要唔會再同佢黎食~~