終於去左坐昂坪360啦~

自從昂平360通行，最初就話多人，成日要排好耐，之後仲要跌左個車廂落黎，所以一路都無諗過要去搭呢架纜車，直到最近知道有款新出嘅水晶吊車，見都好耐無去過睇大佛，所以就一於去一次大嶼山一日遊喇~~

票價有幾種，我地淨睇水晶車嗰D，平時我地會去埋大澳，不過今次唔打算去，因為寶蓮寺附近起左個心經簡林我地都未去過，所以就買來回飛......水晶車來回$157，水晶車去+普通車返$142， 爭十幾蚊啫，我地就梗係揀水晶車來回啦.....另外有一種係私人包廂連市集D影院門票咁，$2400!!....唔知係咪真係會有咩人包車呢?!

乘坐水晶車廂有條記認手帶，我地好乖咁一路帶住響手~

每部車規定坐滿十個人~

水晶車其實唔係好多部咋，大約八、九部車先有一部水晶車，去呢一日都幾多人，條隊尾有顯示話排水晶車大約要等半個鐘，都買左飛咯，都要排啦.....排左一陣忽然聽見有職員問existing部車有兩個位，有無人想上，咁我地梗係即刻彈出去上車啦，部部車都要十個人一齊迫，無咩所謂啦，但慳返半粒鐘唔駛等喎~~

一車十個人其實真係幾迫，特別當你隔離有鬼佬一齊坐.....雖然大家三唔識九，但係部吊車一離開車站，大家就好自然互相幫對面嘅人影合照，都幾熱鬧~

原來纜車有經過去機場嘅公路，點解平時去機場時唔多覺見到有呢D昂平360嘅??

大家影完合照，發覺原來已經過緊海~~

真係360度望景嫁，睇住個大海響腳下好舒服呀~~

之後就上山喇~

腳下係大片大片嘅樹林~

初初上車時都有D擔心會驚，不過上左車後又覺得無咩野，望落底部都唔係好得人驚啫，或者係因為有條幾粗嘅橫樑響車廂底中間，阻咁D視線，而且部車都幾定，所以無咁恐怖啦.....老爺一向怕高，見佢都無咩野咁，不過後尾佢話係死頂，其實驚到腳軟喎，唔知真定假....

嘩~有人行上山，以前未有纜車搭巴士都要大半個鐘啦，咁遠唔知要行幾耐?!

纜車會經過兩個中途站，有好多行山人士會響度休息，有纜車經過佢地都會好熱情咁同我地打招呼......

行左大約十五分鐘就見到個大佛啦~~

臨到站嘅時候會有個位向吊車影相，好似Disney嗰D咁，差唔多到嘅時候我地就提車入面其他人一齊望鏡頭，所以我地張集體相都影得幾好，張相$80，唔鍾意可以唔買~

呢個就係我地坐嘅水晶車廂喇~

出左車站就係昂平市集，好多人呀，簡直人頭湧湧.....呢個市集基本上係內地同胞或外籍遊客嘅天地，香港人除左D小食檔睇怕都無野啱行，我地嘅目標當然係遠方嘅大佛啦~

又要行樓梯喇.....

上到去循例都要走入去大佛入面睇睇粒舍利子，不過入到去咁啱有電話入，掛住一路八一路行，終於唔記得望一下梅艷芳個位就上左樓.....上到頂遠遠向粒舍利子望左眼就落返黎喇~

又循例圍住個佛行個圈先~

圍繞住大佛嘅其中一個天母像~

可以望到大雄寶殿~

之後就去大雄寶殿....唔係拜神，而係食齋~~

寶蓮寺入面有兩間齋堂，兩間齋宴嘅價錢唔同，一間$60，另一間$100，次次去老爺都係買$60嗰間，次次我地都有以下嘅對話︰

我︰兩間有咩分別?

老爺︰無分別~

我︰貴D嗰度好似門面靚D喎.....(忽然好驚) 唔通$60呢間無冷氣???

老爺︰(沒好氣) 有呀~

我又問︰咁點解唔同價錢，會唔會$100嗰度多野食D?

老爺又答︰唔會，一樣都係嗰D菜單~

我︰你又知?

老爺︰都係同一個廚房，煮嘅咪又係嗰D野~

我︰你點知? 你食過另外嗰間咩?

老爺︰(若無其事) 無噃!

我︰(反白眼) 你無食過又咁肯定??

老爺︰(木無表情) 總之我就係知啦!!

我︰.....(無言 + 面上有三棟.....)

其實次次都係差唔多嗰D菜色，四餸一湯，味道都OK嫁~

食飽飽就走喇....離開寶蓮寺，就去附近嘅心經簡林~

周圍都可以見到大佛~

心經簡林嘅英文叫wisdom path.....

有遊客跌左條電話繩呀~

經過一個茶園，D稻草人公仔好得意呀~~

棵樹有個心....

原來係四棵樹分別寫上心經簡林....

都要行一段時間，大約十五分鐘......好攰....

終於到喇，好多條大木柱插左響個小山岥上，每條木都刻左波羅蜜心經嘅經句嫁~

沿住個山坡行左個圈，之後就行去鳳凰山嗰邊嘅觀景台，可以望返過去成個心經簡林~

望過去另一邊見到石壁水塘~

睇過晒D景就行返出去寶連寺，係時候食下午茶，整返碗豆腐花先~

好滑~~

咩角度都見到大佛嫁~

一場黎到，雖然明知無野買但都要響個市集打個圈先嘅~~

無上午咁多人噃~~

逛左陣就搭返cable car走喇~

Bye bye 啦~

走嘅時候排纜車嘅人未至於好多，排左一陣下一班車就到我地，不過排響我地面前嗰八個人(應該係一家人)都係外藉人士，仲要係類似中東嗰種，我就同老爺講唔係好想同佢地一架車，其實唔係驚咩或者歧視佢地，只係佢地好鍾意搽香油，身上總有好濃嘅香料味，我唔係咁頂得順囉.....好彩今次唔駛滿十個人一架車，所以我地可以等下一班車先上~~

又要感受一下腳底凌空嘅感覺喇~~

經過機場....

有飛機起飛呀~

個海兩種色嘅?

好多人響淺水地方摸蝦~~

返到去東涌，最後一個節目--> 逛outlet~~

呢個所謂嘅outlet都幾多shops行嫁，可以話係遊大嶼山嘅餘興節目.....今次呢個一日遊都幾舒服，間唔中去下香港郊區其實都幾好玩~~

Bye-bye~~