2009年2月18日 星期三 (藏王山 > 山寺 > 山形 > 銀山溫泉)
離開山寺，我地搭13:42開嘅仙山線返山形，只係十幾分鐘嘅車程，兩點鐘就到喇，之後我地會搭14:56班次嘅新幹線去大石田會合今晚入住嘅銀山溫泉旅館專車.....仲有一個鐘嘅時間，就周圍去搵地方食野~
呢座建築物幾有型~
得一個鐘，都唔敢行太遠，最後都係響車站外面間Lotteria食burger~
講真，我覺得日本人基本上都好有禮貌，但就真係比較鈍
.....我地見到呢間野有蝦漢堡，咁就諗住要一個，另加一個cheese burger，如果order burger set就有埋野飲同薯條，同埋見有限定薯仔就叫左一盒試下.....個counter無menu，只係show左D selected items，個full menu就響後面牆上，係有英文，但係個sales就唔識英文，講極都聽唔明咩叫shrimp burger
，我地唯有示意佢望牆上面個大menu啦，個蝦漢堡係排響第三個item，咁我地咪指住佢後面同佢做手勢話要第三個囉，佢跟住我地方向望去後面，好nice咁指一指後面再同我地confirm D order，然後就叫我地搵位坐低等.....我地以為掂啦，坐低等緊嘅時候老爺睇返張單計極條數都唔係好明，但係張receipt全部日文，都唔知order左D咩items......
等左一陣另外一個sales拎左D野食黎，D main items竟然係一個cheese burger，一個bacon burger，同埋四盒薯仔
....我地當堂O晒嘴，四盒!! 黐筋咩，咁都不特止，攪咁耐竟然係無最想要嘅蝦漢堡!!! 
當時真係唔係咁高興
，不過已經即刻俾老爺禁住，佢話算啦，同佢地雞同鴨講要理論一定有排攪，我地又唔係有好多時間，而且都攞左出黎費事要人難做啦.....佢知我想食蝦漢堡就再出去叫多次，唔知點解今次又無攪錯......
，老爺講嘅野基本上我都會聽嘅，見佢咁息事寧人，所以都無堅持追究，而且D burger又真係幾好食~~呢個係煙肉漢堡，yummy~~
Cheese burger，都好好味~~
呢個就係蝦漢堡，係最好味嫁.....
真係有兩隻大蝦響入面，yummy yummy!!
限定薯仔，total 四盒!!!
不過熱剌剌其實幾好食~
食飽差唔多夠鐘喇，於是去locker攞返D行李，然後就去搭新幹線.....入左閘有藏王山樹冰介紹，D樹冰model好攬野....我好想見呢種size嘅樹冰呀~~
我地搭14:56山形新幹線去大石田~
車程約半個鐘，聞來無事，整返個下午茶先.....其實呢隻薯仔都幾好食，盒內有包鹽，加左鹽好好味，不過今日已經係第二盒，真係好滯，淨返兩盒真係唔想再食，最後留左俾旅館~
Bear bear熊都有野食(我知，好變態
...)，粒糖係今朝響藏王酒店check out後任攞嫁~~
沿路又係一大片一大片嘅雪地~
15:26就到左大石田喇.....今晚我地入住嘅溫泉旅館叫古山閣，做booking時已經預約定旅館專車響大石田車站等我地~
出左站已經見到有好多銀山溫泉旅館嘅職員揸住個牌響度等客人，我地搵番我地入住嗰間古山閣嘅職員哥哥仔，同佢對左名，佢就帶我地行去前面架旅館van仔，叫我地坐住等下先.....等左十分鐘先齊人，或者落雪天係銀山溫泉旅遊旺季，都有好多客人，成架車full晒，好彩我地無帶大行李箱，因為真係無位放，我地早到揀左司機後面兩個位，先可以將兩個旅行袋放響司機後面闊少少嘅位置咋~
沿路又係大片大片嘅雪地~
去到中途，經過一個好大嘅湖，個司機一邊將架車慢駛，一邊做埋導遊同我地講話個湖嘅遠處有好多鴨仔....我諗大約係咁嘅意思啦，因為佢用日文講，我地完全唔明，只係聽到wild ducks兩個字，不過我地點望都望唔倒有鴨仔囉~
架車行左大約40分鐘就到左銀山溫泉，因為銀山溫泉入面D路好窄，基本上稍為大小小嘅車係行唔倒入去，個司機將架van停左響街口古山閣自己個專用停車場，當時已經有兩個旅館職員響度等緊我地.....
一落車已經覺得個雪地好跣，話口未完有個女仔一落地就成個跣低坐左響地上面，嚇到我行一步驚一步
，好彩唔使自己拎行李，旅館安排左部私家車幫我地運行李......
由街口行左兩、三分鐘就見到條溫泉街喇，雖然路程唔長，不過個雪地結晒冰，真係好鬼跣腳，都唔知點解東北呢度唔似北海道咁，唔興響雪地上面洒滿黑砂粒等人易行D嘛.....真係一路行一路叫救命
~~~
自從睇過雪映移城就一直好想黎銀山溫泉，今日終於黎到啦~~~
真係好靚呀
古山閣就響條溫泉街嘅街頭~
入到去旅館入面個個人都迫晒響門口位除鞋換拖鞋，我見咁多人(一車都有十幾人)，拿拿聲剝左對鞋就走上去個接待處排隊先啦，唔係話自己讚自己，香港人真係醒目D嫁，一見勢色唔對就做定野先啦
，當D日本人仲好舒服咁坐響度慢慢換鞋除衫之際，我地已經排左響頭位做緊check in喇
，其實唔係想話爭排第一，而係經驗話俾我地聽日本人做野一般都係有板有眼，呢個係禮貌嘅講法，講得唔好聽就即係慢
，真係唔想將D時間浪費響排隊等check in上面.....唔知係咪真係比較多人，旅館個職員都無check我地個passport，係咁意填左張form就攪掂喇，之後有個女將就幫我地拎住D行李帶我地上房.....其實我地D行李都幾重，無理由要一個女人幫我地拎咁無風度，所以老爺都堅持自己拎返一個袋~
我地住響三樓，行三層樓梯已經攞命，仲要著住佢地嗰D硬拖鞋行，樓梯係通"loan"嫁，行唔夠兩步就飛左對拖鞋出去
~
旅館D裝修好有懷舊嘅味道，好古色古香呀.....三樓仲有兩個貸切風呂，我地一出房門就見到，好方便呀~~
入到去房個女將同我地講解左一下，又幫我地沖茶，問埋我地dinner同早餐時間，攪左一輪先離開.....
估唔到原來間房都幾大，睇下下面張相，驟眼睇好似有塊鏡響中間，其實係有兩個廳嫁~~
呢張茶几又係有暖氈....有細細個電視同保險箱~
呢邊就係今晚食飯嘅地方~
個室好闊落，設備都好齊全，有雪櫃，亦有toilet，同一個細細嘅洗手盆，不過就無浴室~~
Welcome drink and food 係好好味嘅綠茶同溫泉饅頭~~
仲有個露台，地下放左cushion俾人坐響度欣賞外面嘅雪景.....
由房望出去就係呢兩個景.....
因為旅館個位置響溫泉街嘅盡頭位，所以望出去望唔晒成條溫泉街，不過都OK啦....有個免費足湯，本來想去浸浸，仲帶定左毛巾諗住浸完抹腳，不過攪完一輪已經開始天黑，第二朝D櫈又舖滿左好厚嘅雪，所以最終都無浸過.....
我地間房叫"福壽"，都幾好意頭呀~~~
個門鎖好古舊呀，老爺好有興趣，向我講解左一輪點樣鎖，我一路哦、哦咁應佢，其實我最後都唔係好明係點鎖~~
響房hea左一陣，我地就出去外面逛呢條期待已久嘅銀山溫泉街啦..(待續)
沒有留言:
發佈留言